LUKA 23

O sekišwa ke Pilato. Simone wa Kirene le barwedi ba Jerusalema. Jesu o a bapolwa, a hwa, a bolokwa

1Gomme lešaba ka moka la ema, la mo iša go Pilato. 2Ba thoma go mmega ba re: Motho yo re mo hwetša a fapoša setšhaba; o iletša batho go ntšhetša Kesara motšhelo; o re: Ke nna Kriste, ke kgoši.

3Pilato a mmotšiša a re: A ke wena Kgoši ya Bajuda?

Jesu a fetola a re: O boletše.

4Pilato a bolela le baperisita ba bagolo le mašaba a batho, a re: nna ga ke hwetše molato go motho yo.

5Ya ba gona ba phegelelago ba re: O ferekanya batho ka go ruta gohle mo nageng ya Juda; o thomile kua Galilea a ba a tla fano.

6Pilato ge a ekwa ba bolela Galilea, a botšiša ge e le motho wa Galilea. 7Ge a ekwa gore ke wa mmušo wa Herode, a mo romela go Herode yo le yena a bego a le Jerusalema mehleng yeo. 8Herode ge a bona Jesu, a thaba gagolo, gobane e be e šetše e le kgale a rata go mmona ka baka la ditaba tše ntši tša gagwe tše a bego a di kwile; mme a holofela gore o tlo mmonna ge a dira mohlolo. 9A mmotšiša ditaba tše ntši; fela, Jesu a se mo fetole le ka se tee. 10Baperisita ba bagolo le bamangwalo, bona ba ema ba mmega ba befetšwe. 11Ge e le Herode a mo nyatša, a mo kwera, a na le bahlanka ba gagwe, a mo apeša kobo e tšhweu, a mo gomišetša go Pilato. 12Ka lona tšatši leo, Pilato le Herode ba thoma go kwana, gobane kgale ba be ba hloyane.

13Pilato a bitša baperisita ba bagolo le bagolo ba sethšaba ba tle kgauswi, 14A bolela le bona a re: Motho yo le mo tlišitše go nna la re o fapoša setšhaba. Gomme šefa, ke mo sekišitše, ka hwetša ditaba tše le mmegago ka tšona di se gona, le ge e le e tee ya tšona. 15Le Herode o realo; gobane ke le rometše go yena, gomme šedi; ga a ka a dira se a swanetšego go bolawa ka baka la sona. 16Ke gona ke tlo mo itia ke mo golole. 17A realo ka gobane ka monyanya o be a swanetše go ba gololela e mongwe wa batlengwa.

18Gomme lešaba ka moka la goa la re: Tloša e; re gololele Baraba! 19Gomme monna eo o be a lahletšwe kgolegong a tsošitše mpherefere motseng, a bolaile motho.

20Bjale Pilato a buša a hlaboša lentšu a bolela le bona a rata go golola Jesu. 21Bona ba tšhologa legoa ba re: Mmapole! Mmapole!

22Pilato a bolela nabo la boraro a re: Gomme bosenyi bjo a bo dirilego ke bofe? Nna ga ka hwetša molato go yena le o tee o kago swanela polao. Ke gona ke tlo mo itia, ke mo golole.

23Bona ba tsoga ka lešata le legolo, ba re a bapolwe; mme megoo ya bona ya fenya. 24Pilato a ahlola a re: go dirwe se ba se nyakago. 25A golola motho eo a bego a lahletšwe kgolegong ka baka la mpherefere le polao, yo bona ba mo hlaotšego; gomme Jesu a mo gafela bona gore a dirwe se bona ba se ratago.

26Ba sa mo iša, ba swara monna e mongwe, Simone wa Kirene, e a bego a boa nageng, ba mo rwadiša sefapano ba re a latele Jesu a mo rwaletše.

27Gomme Jesu a ya a latetšwe ke lešaba le lentši la batho le la basadi ba ba bego ba itshetla dihuba ba mo llela. 28Bona, Jesu a ba retologela a bolela le bona a re: Lena barwedi ba Jerusalema, lesang go llela nna. Iteleleng, le llele le bana ba lena. 29Le tsebe gobane go tlo tla mehla yeo ba tlo go re: Ba lehlogonolo ke baopa, le mala a sa kago a belega, le mabele a sa kago a amuša! 30Ke mo ba tlogo bolela ba era dithaba ba re: Re weleng, ba era meboto ba re: Re khupetšeng! 31Gobane ge sehlare sa moketla ba se dira ka mokgwa wo, se se omilego se tlo dirwa eng?

32Le ba bangwe ba babedi ba disenyi ba išwa le yena gore ba yo bolawa. 33Ge ba fihlile mo ba bego ba re ke Legateng, ba mmapola sefapanong; ba bapola le disenyi tšeo, se sengwe sa ba ka letsogong le letona, se sengwe sa ba ka go le letshadi. 34Gomme Jesu a bolela a re: Tata! Ba lebalele, gobane ga ba tsebe se ba se dirago!

-- Gomme ba arolelana diaparo tša gagwe ka go dira matengwa. 35Batho ba be ba eme ba lebeletše. Ge e le ba bagolo, bona ba mo kgoba ba re: O phološitše ba bangwe; a a iphološe, ge e le Kriste Mokgethwa wa Modimo.

36Le bahlabani ba mo kwera; ba batamela ba mo tlišetša mokgope. 37Ba re: Ge o le Kgoši ya Bajuda, iphološe.

38Ka godimo ga hlogo ya gagwe go be go beilwe lengwalo, le le ngwadilwego ka Seroma le ka Segerika le ka Sehebere, la re: YO KE YENA KGOŠI YA BAJUDA.

39E mongwe wa basenyi bao ba ba bego ba fegilwe, a mo roga a re: Ge o le Kriste, iphološe; le rena o re phološe.

40Yola e mongwe a fetola, a mo kgala a re: Anthe le wena ga o boife Modimo, le ge o wetšwe ke kotlo bjalo ka yena? 41Ge e le rena go re swanetše, gobane re dirwa se se lebanego ditiro tša rena. Ge e le yo, ga a ka a dira se se sa lokago le se tee. 42A tsebo bolela le Jesu a re: Morena! O nkgopole ge o etla ka mmušo wa gago.

43Jesu a fetola a re: Ruri, ke a go botša lehono o tlo ba le nna Paradiseng.

44Ka nako ya go selela naga ka moka ya welwa ke leswiswi go fihla nakong ya senyane. 45Letšatši la fifala; gomme lešela la sešireletšo Ntlongkgethwa la gagoga ka bogare. 46Gomme Jesu a hlaboša lentšu a re: Tata! Moya wa ka ke o gafela diatleng tša gago! Ge a itšalo a fela moya.

47Gomme tona ya lekgolo, ge e bona tše di diregilego, ya reta Modimo ya re: Ruri, motho e e be e le moloki.

48Le mašaba ka moka a a bego a phuthegetše go bogela dilo tšeo, ge a bona tše di diregilego, a boela gae a itshetla dihuba. 49Ba ba bego ba tsebana le Jesu, le basadi bala ba go mo latela ba etšwa Galilea, ka moka ba be ba emetše kgakala, ba di bona.

50Gomme monna e mongwe, yo leina la gagwe e lego Josefa, e mongwe wa matona a lekgotla, monna yo bolo e a lokilego, 51yo a sa kago a dumela morero wa bona le tše ba di dirilego, e be e le wa Arimathea motse o mongwe wa Bajuda; mme le yena o be a letetše mmušo wa Modimo; 52yena a tla go Pilato a kgopela mmele wa Jesu. 53A o fegolla, a o phuthela ka mašela, a o bea lebitleng le le kgorilwego leswikeng, leo go sešogo gwa fihlwa motho go lona. 54Letšatši leo e be e le la go itokiša, gomme Sabatha e be e šetše e batametše.

55Basadi bala ba go tla le yena ba etšwa Galilea, ba be ba latetše, ba bona lebitla, le ka mo ba mmolokago ka gona. 56Ba boela gae, ba lokiša dinoko le ditlolo; mme ka la Sabatha ba khutša ka go ya ka molao.

Atualmente Selecionado:

LUKA 23: NSO51

Destaque

Copiar