Matiye 9

Zezu ambəl gənək məs gbəgba' məɗeŋgreŋ

(Markus 2.1-12 / Luka 5.17-26)

1Zezu atoŋko adəv bəlay, agarək ki pe'e amndanka. 2Aki sənənək ɗəf də gbəgba' məɗeŋgreŋ, tahəŋ wəslanən də hargaŋgu nani. Adan Zezu awla wətaf neti, apsən məs gbəgba' na: Wətuwa arma makroko, mambray nok avika. 3Məsənaŋ zəga na ma henziŋ nadak aɓɗaŋ na: Ɗəffəŋka apelik mbrayen aza Maŋgəlva. 4Zezu asənək an aɗumoŋ. Amna vi mi kuɗumoŋ wəɗum mbrayen vas di? 5Awani tuwãh di? Wənahsən ɗəf na mambrayɗe nok avikaŋka sa walla wənahsən na: Asili doko? 6Amma nəŋgəl kəsənən gən na: Wətən Ɗəf* tay də sembe na viyan mambray na duniya. Yaŋ apsən məs gbəgba' nak na: Asili, agəm hargaŋgu noko, amndoko nokda.

7Asilke, amndanka annanda. 8Adan ɗii awlanəni, geslne abeyike a gakdakanənək Maŋgəlva vi apsənək sembe sən ɗəf vaska.

Va Zezu aya Matiye

(Markus 2.13-17 / Luka 5.27-32)

9Zezu asilik sədaka, ambatka. Adan ada toŋ aka tive awələk ɗəf taka tuŋgo adəv gəla na faɗ deleɗ na duwan, iya nan na Matiye. Zezu apsən na: Asbawa Matiye asilke asbanəka.

10Adan Zezu ada zəm dit gewleɗ nani eŋgil ana Matiye da. Mətafaŋ zomorgol meɓɓeti dit ɗii məs mambrayɗe, azoŋkəzəmaŋ dənɗaŋ. 11Farisiyenɗe* awleninik vaska, assohotinik gewleɗ nani: Vi mi Mərbə zəga nokuməŋ adawzəm dit mətafaŋ zomorgol gəm dit məɗɗaŋ mambrayɗe di? 12Adan Zezu apprəm wənneti, amna: Ɗiiyen dəzam aŋglaŋ na zloktor ɓa, say məs gbəgbaɗe. 13Mədoŋ məɗumon an məs dəɗam də wənəska, ula səsah nəŋgələ wənna zəga mamaya mətaw wəlan nəŋgəl ɓa. Naw nəde vi kawye ɗiiyen məɗɗaŋ mogon ɓa, say məɗɗaŋ mambraya.

Wəssoh aka wənna see' meme

(Markus 2.18-22 / Luka 5.33-39)

14Yaŋ gawleɗ na Zaŋ azoŋ aza Zezu, assohonənka: Vi mi mənam dit Farisiyenɗe* mənam tat əsee' meme, amma gewleɗ nok na aw see'eŋ meme ɓa di? 15Zezu apsit na: Ya ɗii məyet akki wəɓel wasee'eŋ meme an məzuɓel tay dənɗaŋ sa? Agəɗ na ɓa sam. Pay wade məzu ɓel wawɗak dənɗaŋ, pay nani wasee'eŋ meme.

16Ɗəf tay naw ɗisən lukut məsvan də gabaga meleketen ɓa, vi gabaga meleketen watəɗ lukut məsvani, wəŋgar nan wasan dayki laŋkəmpa. 17Ɗəf tay naw zi mbazla net wəleŋɗe məza dəhəs ɓa adəv konekone məsvan ɓa. Vi mbazla net wəleŋɗe waŋgar daw həsa, wambat afuŋ pakə konekone nan warayə. Pəram wəzi mbazla məza dəhəs ɓa adəv konekone meleketeni sulegit pak wasoŋgu.

Wətən Ɗəf metiŋ net Yahudiyenɗe dət guluk tərəŋgən lukut na Zezu

(Markus 5.21-43 / Luka 8.40-56)

18Pay Zezu adaw pel wən nəŋka, ɗəf metiŋ suweleŋgit Yahudiyenɗe adek taka aza Zezu, akdukuk takprani amna: Wətu tat təmtək kakaŋka. Ade kəɗi gən vok akata watəmbələ. 19Zezu asilke, gewleɗ nan bo asbanənka.

20Guluk tatə zəm saha də gbəgba' na zələha wəsva klaw kiyən sula təzarək aza Zezu dərɓagani, tərəŋgənək gabba lukut na Zezu. 21Vi təɗumuk na: An nərahək wərəŋ gən ko gaba lukut nan kaaka'ə, wanəmbələ. 22Zezu amanək haran dirɓe awlətəka, apsət na: Arma makroko, wətuwa wətaf nok akoh gukuko, təmbələk daska'a ləŋgə.

23Yaŋ Zezu agap eŋgil ana metiŋ net Yahudiyenɗe da. Adan awle məzufoŋ zəga dit məzu həmmaŋgə. 24Apsit na: Məgil saŋka, waŋ məmtətə ɓa, amma wəleŋ tədawleŋge, awlanənək va dərwa. 25Adan ɗii agilyoŋ Zezu atoŋko eŋgili armak vat waŋkə, təsilke. 26Halabara nan atrayək aka dələv nan pakə.

Zezu akol sitik heret deŋgerɗe sula

27Zezu asilik sədaka ambatka. Adan ada dan aka tive, deŋgerɗe sula asbanənka adawnahaŋ də vamvəlla: Aw Zezu wətən Davit* awəl saha akamə. 28Yaŋ Zezu atoŋ eŋgili, deŋgerɗe sula nek azaraŋka zani, assohotike: Kətaf nənək əntat də sembe na baah sukum sa? Azlan sənənka: Mətafəka Məsən zəga istat də sembe naɗɗani. 29Yaŋ Zezu arəŋgən hereti, amna: Dəgəɗ va wətaf nokumə. 30Go'ləŋ heret akolko. Yaŋ Zezu abay meti amna: Kədawnahaŋ wənnan sən ɗəf ɓa. 31Amma ambataŋka atrayanənək halabara nan aka dələv nan pakə.

Zezu ambəl gənək goryom!

32Pay adadoŋ, ɗii aki sənənək ɗəf məza awpel ɓa sən Zezu, tay də tuya akani. 33Zezu arɓəhək tuya nani goryom atəŋgək wəpele. Ɗii agətaŋgək diiɗa anahaŋ na: Zəga vaŋ mulani ɗaah aweleŋgit Israyelɗe ɓa. 34Farisiyenɗe* anahaŋ na: Məlĩ net tuyeŋɗe dəpsən sembe narɓəh tuyeŋɗe.

Zezu awələk saha aket ɗii məkelti

35Zezu abalka awlaŋ gəleɗe metiŋgiti dit memeɗeŋɗe pakə. Arban sitik zəga sit Yahudiyenɗe adəv gəla nawpel wənneti. Apelsitik Wən Nenek na məlĩ na Maŋgəlva, ambəl gitik məs gbəgbaɗe dit məmbər sit pakə. 36Adan Zezu awla ngaɓa net ɗiiyi, awələk saha aketi, vi ayaŋka sembe tay ɓa, va timeŋgiɗ məs tahəŋ də məzutaɗa ɓa. 37Apsit gewleɗ nan na: Wəbəl tay diiɗa, məɗɗaŋ wəza nan tahəŋ diiɗa ɓa. 38Məkaman Affən wəbəla dəslən gən məɗɗaŋ wəza azeti vi wəbəl nani.

Atualmente Selecionado:

Matiye 9: GDRNT85

Destaque

Copiar