Matiye 11

Masləŋɗe na Zaŋ məgəɗ baptem

(Luka 7.18-35)

1Adan Zezu agrak wərban wən sit gewleɗ nan klaw kiyit sula, asilik sətəki nani, ambatka, vi kawpel wənna Maŋgəlva awalaŋ gəla naka dələv pakə.

2Pay nani Zaŋ məgəɗ baptem tay a daŋgay, apprəmək halabara na wəza na Zezu Messiya*, aslənək gewleɗ nan meɓɓet aza Zezu, 3vi dəssohonən gəni: Əstə məs məpprəm na məzukoh gəm wade tay sa? Walla məga ɗəf maɓɓani? 4Zezu apsit na: Mədoŋ, mənahsən Zaŋ an məs kəpprəmaŋ də an məs kulaŋ: 5Deŋgerɗe tahəŋ ulaŋ, vədelɗe tahəŋ wədawaŋ, məs kokoleɗ ambəlaŋka, goryomɗe tahəŋ wəpprəmaŋ, ɗii mimtit asilyoŋko, məs sahaŋɗe tamə məpel siti Wən Neneke. 6Zəzay aza ko naway məs dəpan wətaf nan ɓa.

7Pay gewleɗ na Zaŋ adawmbataŋ, Zezu atəŋgək wəpel wənna Zaŋ sit ɗiiyi, amna: Mi kəduwaŋ ula awra di? Ngav an səmnya adaɓlaŋ sa? Awwo vaski ɓa. 8Ya mi kəduwaŋ ula kan di? Ɗəf məgul lukutɗe moget sa? Amma ɗii məguloŋ lukutɗe moget ana məlĩ da adasoŋ. 9Ya mi kəduwaŋ ula kan di? Məs kleŋ sa? Əntatə nah sukum: Gesiŋ, aŋki dəday ki məs kleŋ. 10Vi Zaŋgi an məs ɗerewel apel akani: Maŋgəlva amna: Yaŋ əntatə slən masləŋ naw aboko, vi dəzaɓan gən tive viko. 11Gesiŋ nədawnah sukum: Suwaleŋgit kirtit ɗii pak tay məs dəday ki Zaŋ məgəɗ baptem də gakdak ɓa, amma ɗəffan dəgəsan zən adəv məlĩ na Maŋgəlva, ndəni dəday ki Zaŋ də gakdaka. 12Daga Zaŋ atəŋ wəpel wənna məlĩ na Maŋgəlva, məzu zeleŋ tahəŋ wiziw gənəni, məɗɗaŋ mambrayɗe tahəŋ wəmohunni. 13Ma henziŋ na Moyis dit məs kleŋɗe pakə, aɗɗaŋgək kleŋ aka məlĩ na Maŋgəlva ha gap wəzo na Zaŋ. 14An kətaf nənək məs nənahəŋka, Zaŋ ndəni Eliyas an məs ɗerewel arban wəziya nan daga far farə. 15Ɗəf an məs də sləman pak dəpprəma:

16Də mi nədaw sle ɗiiyen kakaŋ kiŋ di? Wanəsle dit kirin məsoŋ atəki awalaŋ gəla, tay ənzlaŋ vamvəl sən ziti, tay nahaŋ na: 17Məfon sukumək pozloro, kəsklaŋ ɓa, məy sukumək gəlya naw həmma, kəskaŋ morkoyo ɓa. 18Zaŋ ade awzəm zigeɗ nawzəm meɓɓet ɓa awsa mbazla ɓa, aɓɗaŋ na: Mitemni. 19Wətən Ɗəf* adeke tay zəma tay saa zəga, tahəŋ wənahaŋ na: Ɗəffaŋ na wəɗum nan pakə, say aka wəzəmmi, dəwəsaa zəga, tay bayna dit duwanɗe dit məɗɗaŋ mambraya. Amma wəsən an mogon na Maŋgəlva tay ərban zən adəv wəza nani.

Walaŋ gəla gugiriɗ də ɓoŋgoŋ də tubiyaŋ

(Luka 10.13-15)

20Yaŋ Zezu atəŋ wəheyet walaŋ gəleɗe məs agəɗ sokeneɗ adak diiɗa amma də ngəmaŋ wətubiyaŋ ɓa. Amna: 21Wakpaŋ bonoy azokis Korazin. Wakpaŋ bonoy azokis Baytisayda. Va sokeneɗ məs nəgəɗ awalaŋ gəla nokuməŋ, va awalaŋ gəla Tirus də Sidon nəɗɗe na, waguloŋ lukut net sakɗe, wavohoŋ moŋglo a zəti dərban gən na atubiyaŋka. 22Vi vaski nədarban sukum: Pay wəgrak dələv na, kita na Tirus də Sidon wasan ɗəɗaah ki kita nokum. 23Is Kafarnahum, azok na Maŋgəlva waslok a disiŋ sa? Aw haya! Kaw toŋguki atəki net ɗii mimtiti. Va sokeneɗ nəgəɗ anok da gbeŋkiŋ, a Sodoma nəɗɗe na, walaŋ gəla nan wasan ha dəpaŋka. 24Vaski nədawnah sukum: Pay wəgrak dəlva, kita na Sodoma wasan ɗəɗaah ki kita nok kpakə.

Təki nefet taya za Zezu

(Luka 10.21-22)

25Pay nani Zezu amna: Aw Affən Daya na disiŋ də dəlva fuŋ, soko azoko vi karban sitik kirin muzliyeɗ an məs kəɗaman azet məsənaŋ zəga dit məzapprəmaŋ. 26Vaski aw Affuwa, vaski an dəslə suk kana.

27Affu apan suwək zigeɗ pak a vawa. Ɗəf tay dəsən Wətən ɓa say Affən, ɗəf tay dəsən Affən ɓa say Wətəni, gəm an Wətən aŋgəl wərban pakə.

28Mide zawa munokum məyokum də wəsla zəga gədak diiyaŋka, wanəsgan zəga nan agisbe. 29Məsban wənnawa, məyagan azawa, ɗəf mogow nani nəzəm gukum na saha ɓa, zeŋgille kum warəhaŋ wəfete. 30Vi an məs nədawɗi sukum wənnan bo, tay tuwãh ɓa, an məs nədaw ɗisukum van bo asana akokum gədak ɓa.

Atualmente Selecionado:

Matiye 11: GDRNT85

Destaque

Copiar