Yoni 9

Yesuʼa mago vekamo itaʼamoʼmo alino ateʼniya afinatetiʼmo aulagalaʼmo ali huʼniya vekamo alino ayakeno ateʼniya gemae

1Yesuʼa unoʼaeʼmo ageyana mago vekamo itaʼamoʼmo alino ateʼniya afinatetiʼmo aulagalaʼmo alagi aeno agufa heʼniya vekamo maiʼnigeno ageʼniye. 2#Hat 20:5; Iyi 18:20; Lu 13:2,4Geʼamo neʼafiya vayaʼmogimo huʼapaeʼmo, Tisao, huʼa, ina laʼmo huʼniya hosu kavaʼmoʼa itaʼamoʼmo alino ateʼniya afinatetiʼmo aulagamo aeno agufa heʼniya vekamo maiʼniye. Ani kavaʼmo aepaʼamo agaiʼamo huʼniya hosu kavaʼmoʼa huʼnifi itaʼafoʼalaʼmoganimo huʼnaʼa hosu kavaʼanimoʼa ani agufa kavaʼmo huʼniye, huʼa afi geʼnagenoʼaeʼmo 3#Yo 11:4Yesuʼa hunoʼaeʼmo, ani kavaʼmo aepaʼamo haneʼniyana agaiʼamo huʼniya hosu kavaʼmoʼa ohanege itaʼafoʼalaʼmogani huʼnaʼa hosu kavaʼanimoʼa ohanege huʼniyaʼmonanafa Goti himamuʼamo agaeteʼmo afole aisigeʼa muki vayaʼmogi agesayafeʼmo ani kavaʼmo huʼniye. 4#Yo 5:17,20; 11:9; 12:35Muki felugaʼamo nagaemo alino nateʼnigeʼna emiʼneʼnova vekamo hauʼniya aliʼyaʼamo aliguve. Haniʼmo hisigeʼapaeʼmo muki vayaʼmogimo aliʼyaʼmo afaʼa oʼaligae. 5#Mt 5:14; Yo 8:12Ma mopafiʼmo maiʼneʼnaeʼmo ma mopafi vayaʼai ha le yaʼapigana huʼna maiʼneʼna aeʼna ha leʼna neʼapatove, huno hapa paiteno 6#Mk 8:23Yesuʼa mopa atanamo alino avenatuʼnaʼmo heteno alino hapa hatiteno aulagalateʼmo faleno ateʼniye. 7#2 Kin 5:10Faleno atetenoʼaeʼmo, uka Silomi ani kotupiʼmo aniʼmo faleka kalo pao, huno ha paiʼniye. Ani Silomi ani kotune agimo aepaʼamo haneʼniyana alino ateʼnigeno uʼniya ani kotune. Ani vekamo uno anipiʼmo faleno kalo paeteno aulagalaʼmo ageno ayaketeno noʼalegamo uʼniye. 8Uʼnigeʼapaeʼmo noʼale vayaʼe hogoteno itopaleʼmo fai maiʼneno monieʼmo aukaya nehigeʼa ageʼnaya vayaʼmogiʼeʼmo huʼapaeʼmo, itopale maiʼneno muki afinaʼmo monieʼmo aukaya nehiya vekamofiye, huʼa ge huʼa apafi geʼnae. 9Mago vayaʼamogimo huʼapaeʼmo, ani vekamae, huʼa hapa paiʼnageʼapaeʼmo mago vayaʼamogimo huʼapaeʼmo, haʼao, huʼa, agaekana agufa vekamo maiʼniyana alu vekamo maiʼnegaiye, huʼa huʼnae. Agaiʼamo hunoʼaeʼmo, ani vekamo nagaekeʼmo maiʼnove, huno hapa paiʼnigeʼapaeʼmo, 10haiya kava huka kaulagamo ageka ayakeʼnane, huʼa afi geʼnagenoʼaeʼmo, 11mago vekamo agiʼamo Yesuʼa mopa atanamo alino hapa hatiteno naulagalateʼmo faleno natetenoʼaeʼmo, Uka Silomi ani kotupiʼmo faleka kalo pao, huno naha paiʼnigeʼna uʼna faleʼna kalo paeteʼnaeʼmo naulagamo ageʼna ayakeʼnove, huno hapa paiʼniye. 12Ani vekamo haiyate maiʼniye, huʼa afi geʼnagenoʼaeʼmo, oʼageʼnove, huno hapa paiʼniye.

13Apakaemo ani vekamo avaleliʼa Falasi mono vayaʼaitegamo uʼnae. 14#Lu 13:14Yesuʼa mopa atanamo alino hapa hatiteno aulagalateʼmo faleno ateteno alino ayakeno ateʼniya afinaʼmo Sapati afinaʼmae. 15Inagi Falasi vayaʼmogimo halate huʼapaeʼmo, haiya agufa kavaʼmo huʼnigeka kaulagalaʼmo ageka ayakeʼnane, huʼa loka huʼa afi geʼnagenoʼaeʼmo, agaemo hapamo alino naulagalateʼmo faleno nateʼnigeʼna uʼna anipiʼmo faleʼna kalo paeteʼnaeʼmo naulagalaʼmo ageʼna ayakeʼnove, huno hapa paiʼniye. 16#Yo 3:2; 7:43; 9:31-33Mago Falasi vayaʼamogimo huʼapaeʼmo, Sapati afina keʼaepa gemo akame nosiyaʼmofeʼmo Gotitegatiʼmo emiʼnoʼmeʼniye, huʼa huʼnageʼapaeʼmo mago vayaʼamogimo huʼapaeʼmo, haiya agufa kavaʼmo huno hosu kavaʼmo nehisiya vekamoʼa ani agufa noʼagona agufa aune kavaʼmo afaʼa hugiye, huʼa huʼnae. Ani gemo huteʼa aliʼa fako huʼa lole nofi vayaʼmo maiʼnae. 17#Yo 4:19Falasi vayaʼmogimo halate magoʼe huʼa, kaulagalaʼmo alino ayakeno kateʼniya vekaeʼmo na agufa gemo hugane, huʼa loka huʼa ge huʼa afi geʼnagenoʼaeʼmo, Gotitegati gemo alinineno aeno hakalo huno hapa nepaiya vekamo maiʼniye, huno hapa paiʼniye. 18Yu vayaʼmogimo aulagalaʼmo aeno agufa heʼnigeno ohaneʼniya vekamo aulagalaʼmo alo huno ateʼniya kavafeʼmo ava gemo afiteʼapaeʼmo, lama ge nehiye, huʼa apakesa oʼafiʼnayaʼmofeʼmo itaʼafoʼalaʼmoganifeʼmo ge huʼnageʼana eʼnaʼageʼanaeʼmo, 19mani vekamo mafaʼnetanimo maiʼnifiye. Lanakaemo hutanaeʼmo, alitaʼa ateʼnoʼa afinatetiʼmo aulagalaʼmo aeno agufa heʼnigeno ohaneʼniya mafaʼnemo maiʼniye, hutana nehaʼaʼmofeʼmo hemenimo haiya kava huʼnigeno aulagalaʼmo ageno ayakeʼniye, huʼa anafi geʼnageʼanaeʼmo 20itaʼafoʼalaʼmoganimo huʼanaeʼmo, ago ageʼnoʼana mafaʼnetiʼamo maiʼneno alitaʼa ateʼnoʼa afinatetiʼmo aulagalaʼmo aeno agufa heʼnigeno ohaneʼniya mafaʼnemo maiʼnigetaʼa ageʼnoʼae. 21Hemenimo haiya kava huno aulagalaʼmo ageno ayakeʼnifi, ina laʼmo alino ayakeno ateʼnifi, hutaʼa alagi oʼageʼnoʼae. Ani kavafeʼmo agaiʼaeʼmo loka huta afi gegenoʼao alopa vekamo maiʼniyaʼmofeʼmo agaiʼamo lapa paino, huʼana hapa paiʼnaʼae. 22#Yo 7:13Itaʼafoʼalaʼmoganimo Yu vayaʼaifeʼmo koli huʼnaʼaʼmofeʼmo ani agufa gemo huʼnaʼae. Apakaemo hogoteʼa vege huʼapaeʼmo, ina lagimo Yesufeʼmo, Kalaisi vekamo maiʼniye, huʼa hisafigeta mono nopatiʼmo alita hapafaita apatalegaune, huʼa ge hu maleʼnae. 23Huʼa ge hu maleʼnayaʼmofeʼmo itaʼafoʼalaʼmoganimo, alopa vekamo maiʼniyanagi agaiʼaeʼmo ge hutapa afi gegeno lapa paino, huʼana hapa paiʼnaʼae. 24#Yas 7:19Apakaemo halate ani hogoteno aulagalaʼmo ageno aya okeʼniya vekaeʼmo ge huʼnageno eʼnigeʼapaeʼmo, kagaemo kagaikageʼmo Gotiʼmo ala agiʼamo amiyo. Lagaemo ani vekamo ago ageʼnonana hosu kavaʼmo nehiya vekamo maiʼnigeta ageʼnone, huʼa ha paiʼnagenoʼaeʼmo, 25nagaemo hosu kavaʼmo nehisiya vekamo maiʼnisifi huʼna oʼageʼnove. Magoke kavaʼamo alagi ageʼnovana hogoteʼna naulagalaʼmo ageʼna aya okeʼnova vekamo maiʼnovaʼmonanafa hemenimo ageʼna ayakeʼnove, huno hapa paiʼnigeʼapaeʼmo, 26kagaetegamo na agufa kavaʼmo huʼniye. Haiya kava huno kaulagalaʼmo alino ayakeno kateʼniye, huʼa afi geʼnagenoʼaeʼmo, 27ago lapa paiʼnovaʼmonanafa oʼafiʼnae. Na kava higetapaeʼmo halate magoʼe hutapa afigefeʼmo nehae. Afole oʼaiʼniyesina agufa kavaʼmo hemenimo ago afole aiʼnigetapaeʼmo geʼamo neʼafiya vayaʼmo maisayafeʼmo nehafiye, huno hapa paiʼnigeʼapaeʼmo, 28kagaemo ani vekamo geʼamo neʼafina vekamo maiʼnanaʼmonanafa lagaemo Mosese geʼamo neʼafuna vayaʼmo maiʼnone. 29#Yo 8:14Ago afiʼnonana Gotiʼa Mosesefeʼmo ha paiʼniye, huta afiʼnonaʼmonanafa ani kanomo haiyategatiʼmo eʼnifi huta oʼafiʼnone, huʼa ha paiʼnagenoʼaeʼmo, 30aeto agufa gemo nehageʼnaeʼmo ani gemo afiʼna nahau neʼauve. Haiyategatiʼmo eʼnifi hutapa oʼafiʼnayaʼmonanafa naulagamo alino ayakeno nateʼniye. 31#Sam 34:15; 66:18; Aiy 1:15; Mai 15:29Afiʼnonana Gotiʼa hosu kavaʼmo nehaya vayaʼai geʼapimo noʼafiyaʼmonanafa agaefeʼmo mono huteʼa hauʼniya agufa kavaʼageʼmo nehaya vayaʼai geʼapimo neʼafiye, huta afiʼnone. 32Akeyaʼvilaga afinatetiʼmo eno hemenimo maiʼnona afinaʼmo muki vayaʼmogimo itaʼamoʼmo alino ateʼniya afinatetiʼmo mago vekamoʼa aulagalaʼmo aeno agufa heʼniya vekamo aulagalaʼmo alino ayakeno ateʼniya ava gemo oʼafiʼnae. Muki vayaʼmogimo ma mopamo alo huʼniya afinatetiʼmo ani agufa kavafeʼmo ava gemo oʼafiʼa maime maime eʼnae. 33#Yo 9:16Ani vekamo Gotitegatiʼmo emiʼnoʼmeʼniyesinana magoke alagepa kavaʼmo afaʼa osuʼniyesine, huno hapa paiʼnigeʼapaeʼmo 34#Sam 51:5; Yo 9:2Itakamoʼmo alino kateʼnigekaeʼmo hosu kavapikeʼmo maiʼnanagi hemenimo kagaemo alika laya malesanafeʼmo nehapiye, huʼa huteʼa mono nopatiʼmo aliʼa hafaiʼa ataleʼnae.

Yuʼilaga mafaʼnemo aulagamo ali huʼniya kavafeʼmo huʼniya gemae

35Yesuʼa aliʼa hafaiʼa ataleʼnaya kavafeʼmo ava gemo afiteno uno kahauya huno agetenoʼaeʼmo, kagaemo Goti mafaʼneʼaeʼmo kagesamo afika fatago nehapiye, huno afi geʼnigenoʼaeʼmo, 36Ala nene, huno, ani vekamo ina laʼae. Naha paigeʼnao agaefeʼmo nagesamo afiʼna fatago huguve, huno ha paiʼnigeno, 37#Yo 4:26ageʼnanageno hemenimo ge kaha nepaiya vekamo agaemae, huno ha paiʼnigenoʼaeʼmo, 38Ala kava nene, huno, nagesamo afiʼna fatago nehuve, huno ha paiteno agaefeʼmo mono huʼniye.

39 # Yo 3:17; 8:15-16; Mt 13:11-15 Yesuʼa ina ge huno hapa paiʼniye. Nagaemo aliʼna fako huʼna apatesuvafeʼmo ma mopafiʼmo emiʼneʼnove. Nagaemo apaulagamo ali huʼnisiya vayaʼmogi ageʼa ayakesayafeʼmo emiʼneʼnove. Ani kavaʼmo huteʼna apaulagamo afaʼa haneʼnigeʼa neʼagaya vayaʼmo apaulagamo ali huʼniya vayakana huʼa maiʼneʼa oʼagesayafeʼmo emiʼneʼnove. 40#Mt 15:14; 23:26Mago Falasi vayaʼmo agaeʼeʼmo magokepi lokaeʼa maiʼnaya vayaʼmogi ani gemo afiteʼapaeʼmo, lagaeʼeʼmo laulagamo ali huʼnifiye, huʼa afi geʼnagenoʼaeʼmo, 41#Yo 15:22lapaulagamo ali huʼniya vayaʼmo maiʼnaesinana hosu kavatapimo ohaneʼniyesinaʼmonanafa ageʼnone, hutapa nehayaʼmofeʼmo hosu kavatapimo afaʼa haneʼniye, huno hapa paiʼniye.

Atualmente Selecionado:

Yoni 9: kyg2013

Destaque

Copiar