Jenesis 16

Dineythyans Yshmael

1Lemmyn Saray, gwreg Abram ny dhineythis flogh vyth dhodho. Hag yth esa dhedhi maghteth ejyptek, Hagar hy hanow. 2Hag yn-medh Saray dhe Abram, ‘Otta lemmyn, an Arloedh re'm lettyas na gavav flogh. My a'th pys, ke a-bervedh dhe'm maghteth. Martesen y hwyrvydh my dhe gavoes fleghes dredhi hi.’ Hag Abram a woslowas orth lev Saray. 3Ha Saray, gwreg Abram, a gemmeras Hagar, hy maghteth ejyptek, wosa Abram dhe driga deg blydhen yn pow Kanan ha'y ri dh'y wour Abram dhe vos y wreg. 4Hag ev eth a-bervedh dhe Hagar ha hi a gonsevyas. Ha pan welas hi y hwrug hi konsevya, dispresys veu hy mestres yn hy dewlagas. 5Hag yn-medh Saray dhe Abram, ‘Re wrello an drog gwrys er ow fynn koedha warnas tejy. My a ros ow maghteth a-bervedh y'th askra ha pan welas hi y hwrug hi konsevya, dispresys veuv yn hy dewlagas. Re bo an Arloedh breusyas yntra my ha ty.’ 6Mes yn-medh Abram dhe Saray, ‘Awotta, yma dha vaghteth y'th leuv. Gwra dhedhi dell vo plegadow dhis.’ Ena Saray a wrug hy thebeldhyghtya, ytho hi a fias dhiworth hy golok.

7El an Arloedh a's kavas ryb fenten a dhowr y'n difeythtir, ryb an fenten war an fordh dhe Shur. 8Hag ev a leveris, ‘Hagar, maghteth Saray, a-ble hwruss'ta dos, ha ple'th es'ta ow mos?’ Ha hi a leveris, ‘My a fi dhiworth golok ow mestres, Saray.’ 9Hag el an Arloedh a leveris dhedhi, ‘Dehwel dhe'th vestres hag omblegya dhedhi yn-dann hy diwla.’ 10Hag yn-medh el an Arloedh dhedhi, ‘Kressya a wrav dha has yn feur, ma na yllir y rekna drefenn y vraster.’ 11Hag el an Arloedh a leveris dhedhi,

‘Awotta, gans flogh osta ha ty a dhineyth mab

ha ty a'n henow Yshmael,

a-ban glewas an Arloedh dha alar.

12Y fydh den kepar hag asen gwyls.

Y dhorn a vydh erbynn pub den,

ha dorn pub den a vydh er y bynn ev,

ha trigys vydh yn fas y vreder oll.’

13Ha hi a elwis hanow an Arloedh neb a gewsis gensi, ‘Ty yw Duw a'm gwel’, rag hi a leveris, ‘A wrugavy ynwedh gweles Duw ha bewa wosa y weles?’#16:13 A wrugavy ynwedh gweles Duw ha bewa wosa y weles: Amendys. 14Ytho henwys veu an puth, Beer-lahay-roi. Awotta hi yntra Kadesh ha Bered.

15Ha Hagar a dhineythis mab dhe Abram; hag Abram a elwis hanow y vab a dhineythis Hagar, Yshmael. 16Hag Abram o hwegh bloedh ha peswar-ugens pan dhineythis Hagar Yshmael dhe Abram.

Atualmente Selecionado:

Jenesis 16: ABK

Destaque

Copiar