MATHI 2

Nyü Chürolangnü Axodhingrü

1Yangthsaba Herod chichah, Judea lih Bethlehem la Jisu surocho. Tunyah mülipü, nyüchürolangnü asithsamüdherü khürü Jerusalem lang ro 2tsingdhingcho, “Jihudarü michah yangthsanungba akhunga tsü khüde suro liro? Ihrünü abi püti nyüchürolang chüro nguko, ko ihrü abi mübünung rore.”

3Hi yuchi yangthsaba Herod ko Jerusalem la lirü atümung dee müci rohchocho. 4Abinü bebü ayingti ko Yuzeng adorüti atümung dsinü tsingdhingcho. “Khrista tsü khüde suronung?”

5“Judea lih la Bethlehem yangdila” arühnü lalingcho, Tunüo azikehrünü hiroh-i thrah lile:

6“‘Judea lih la liba Bethlehem,#Mik 5.2

nüh Judea lih la yangditi yola khütakhi azauba mah;

nü chahnü langnürü khüdu chüronung,

sünü I nyitsarü Israelrü xükümnung.’ ”

7Achotsü Herod-nü nyüchürolangnü axodhingrü tsü rang dsiro püti chürocho bekhyah tsü tsidsacho. 8Hütsüpü abinü arüh Bethlehem lang hiroh-i yopü müthehcho: “wüng ko azarü tsü dee müzah yangching, ko khode nührünü abi ngunang, Ihnüsü wü abi mübünung I tesü müdhesong.”

9-10Hütsüpü arüh tsicho ko arüh langla arühnü nyüchürolang nguba püti abükyü tsü ngucho. Khode arühnü püti tsü ngucho arüh dee künyangcho, ko azarü liba kuh tsü müchide arüh bekhu wüdu wücho. 11Arühnü kuh la tsü züducho, ko khode arühnü azarü tsü atpa Mary te ngucho, arühnü mükhukeh abi mübücho. Arühnü hon, müchiji, ko axümlichi khyücheh jiyücho.

12Hütsüpü arühnü palu lih lang lang pa langnü thalicho, tunüo Herod yang müthalinung Tsingrangba-nü melang arüh iiticho.

Ijip Lang Tsicheh Tsicho

13Arüh tsipü Abüdongba riwürü khüdu Josef melang chüro yocho, “Herod-nü azarü tsü müpsehnung yangchile. Hütsüeko shemüsung, azarü e atpa nyüh nüng, ko Ijip lang tsieng, ko Ihnü nüte tsinung müyode hütsüla lieng.”

14Josef jesucho, ko azarü e atpa nyüh nüpü Ijip lang ama lanü tsicho, 15ko hütsüla Herod müsü yingcheh licho. Hi Abüdongba-nü, “Ihnü I tsurü Ijip lih lanü dsichehcho” ko azikehrü khu chocho tikehnung nengdang nguchicho.#Hos 11.1

Azarü Mapsehcho

16Khode Herod-nü nyüchürolangnü axodhingrü tsünü abi rahmütsakopü müdhecho, abi dee rihlong chürocho. Abinü Bethlehem ko amükang dhrezarüti kang anyüh ko apohki atümung müpsehnung yuzengjücho, hi axodhingrü chahnü abinü nyisiba püti chürocho bekhyah müchehpü nguchicho.

17Hiroh-i azikehrü Jeremia-nü chocho yuje tikehcho:

18“Rama la yuva khüdu yuchire,#Jer 31.15

dee khaa tracho yuva.

Rachel-nü atsurüti nengdang trare;

abükyünü kihchocho dhsonglire,

tunüo arüh sopehko.”

Ijip Lanü Thalicho

19Herod süpü, Ijip la Abüdongba riwürü khüdu Josef te melang chüronü 20yocho, “Shemüsung, azarü e atpa nyüh nüng, ko Israel lih lang thali wüng, tunüo sürünü azaba akang yangchicho arüh tsü süko.” 21Hütsünü Josef shemüsucho ko azarü e atpa nyüh nüpü, Israel lih lang thalicho.

22Ta khode Josef-nü Judea la Herod müli atsurü Arkelas-nü yangthsa thsalepü yuchicho, abinü hütsülang wünung drücho. Melang abi te alaa dsechichonü abinü Galil lih lang wücho, 23ko Nazaret yangdila licho. Hütsünü azikehrünü chochoba tikehsohcho: “Abi te Nazarene pü dsinung.”#Mrk 1.24; Luk 2.39; Jhn 1.45

Atualmente Selecionado:

MATHI 2: SANGBSI

Destaque

Copiar