LIPOH 3
3
Nyitsarünü Yocho Mühnyicho
1 #
Mis 12.9; 20.2 Abüdongba Tsingrangba-nü külüpcho yola mürü tsü khura asithsa licho. Mürü tsünü khingkutpü te tsingdhingcho, “Nühjü te tbü la tsünü tu sing chahnüsü singsih mütsunung Tsingrangba-nü yuje yocho mah-o?”
2Khingkutpü tsünü lalingcho, “Ihjünü tbü la tsü alongla yaba singdong chah tsü khu apa masü chahnü singsih tsunung kohle. 3Tsingrangba-nü hütsüba singdong chah tsünü singsih mütsunung mahkhang athahpü mii müthahpünung; ko tsukhang, sünungepü yoko.”
4Mürü tsünü lalingcho, “Hütsü arahkheh, nührü müsünung. 5Tunüo khode nührünü hütsü tsunang, nührü Abi kyo kangnung ko atsa amütsa müdhe kangnung Abinü müdhechonü hütsüta yocho.”
6Khingkutpü tsünü hiba singdong tsü adhingnung atsa ko asih tsü atsunung tsara ngucho ko müdhe kangnung tsü khüta anyemüyangnung pü lümcho. Achotsü abükyünü singsih tsü laa rocho ko tsucho; ko abükyünü anii khyangsü jücho, ko abinü tsucho. 7Anyünü hütsü tsuyeng, anyüh tbhüdeng thsacho müdhe kangcho; achotsü anyünü ngurüsingva xürüta lüpticho.
8Hütsü anyüzehlang Abüdongba Tsingrangba tbü la tsü rachicho anyünü yuchicho, ko anyünü singdong yola Abi tenü rangkhucho. 9Ta Abüdongba Tsingrang-nü adhreba tsü dsicho, “Nüh khüde liro?”
10Abinü lalingcho, “Ihnü tbü la Nü yuva yuchiko; ta Ih tbhüdeng thsachonü, Nü tenü drü rangkhucho.”
11Tsingrangba-nü tsingdhingcho, “Nüh tbhüdengepü sünü yocho? Ihnü nüte tütsuba singsih sü tsucho mah-o?”
12Adhrebanü lalingcho, “Nühnü Ite linung jüba khingkutpü tsünü I khyang singsih tsü jücho, ko Ihnü tsucho.”
13 #
2 Kor 11.3; 1 Tim 2.1 Abüdongba Tsingrang-nü khingkutpü te yocho, “Tuepü nühnü hi nguchicho?”
Abükyünü lalingcho, “Mürünü Ih thsüyohchü hütsü tsusohcho.”
Tsingrangba-nü Yukhacho
14Achotsü Abüdongba Tsingrang-nü mürü te yocho, “Nühnü hi nguchicho ngang kanglungrü apüm yola nü müleng chah hiba chokehchola küdunung: Ade tinü nüminü chichinung ko nü kang ayung lihwü tsunung. 15#Mis 12.17Ihnü khingkutpü nühjü arorüh kangsohnung; abi za ko nü za lede arorüh thsanung. Abi zanü nü thah jürüpnung ko nühnü arüh thsühza la mükyühnung.”
16Ko Abinü khingkutpü te yocho, “Ihnü nüfü müdingde adhsangthsi alaa ko azarü surode adhsa alaa kangsohnung. Hitanye nühnü nü nii alaa mükhyahnung ko nüh abi dikehrü thsanung.”
17 #
Ibr 6.8
Ko Abinü adhreba te yocho, “Nühnü nü nitpü yu nyi Ihnü tütsucho singsih tsü tsuko. Nü thsacholanü alih chokehcholare. Nü kang ayung kheseh nguchipü du atsunung ngunung. 18Hütsüla za ko zeng chinung ko nühnü rangmü lanü singvarova tsunung. 19Khüi alihnü nüh külüpcho nüh thali hütsü mükangde nü romih lanü shikih threh nguchipü du atsunung ngunung. Nüh alihnü külüpcho, nüh thali alih kangnung.”
20Adam-nü#3.20: Adam: Ibri yula Adam adüzü “Amüi Tsurü” Eve: adüzü “Akang liba” tunüo abükyü tsü akang liba limih atpa. anitpü neng Eve dsicho, tunüo abükyü tsü amüi tsurü apüm atpa. 21Ko Abüdongba Tsingrang-nü Adam ko anitpü nyüh khyang kanglungrü küpnü shü külüp khümsohcho.
Adam ko Eve Nyüh Tbü lanü Iipehcho
22 #
Mis 22.14
Hütsüpü Abüdongba Tsingrang-nü yocho, “Adelü nyitsarü tsü Ihsa kyo atsa amütsa müdhe kangko. Akang singdong chahnü singsih latsu, lede akang linung mümülabae.” 23Hütsünü Abüdongba Tsingrang-nü Eden tbü lanü abi tsisohcho ko abi thriba alih la tsü nguchisohcho. 24Hütsüpü Eden tbü nyüchüro lahpi akang singdong shündhün mürosoh nyahnung shulüm Cherufim ko apümlang ximülachehba ariri nohsheng khüdu yohpücho.
Atualmente Selecionado:
LIPOH 3: SANGBSI
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.
