THILSIEMBUL 16
16
Hagar leh Ishmael
1Chun, Abram zi Sarai chun cha himhim a hinsak puoh a: Sarai chun Aigupta mi suok numei khat a nei a, zie nu min chuh Hagar ahi. 2Chun, Sarai chun Abram kawmah, “Ngaitie, Lalpa’n cha ei neihsak phal puoh hi; lungsiet takin ka suoknu hi kuolpih mai in: amah apat a chuh chate ka neih khâk leh,” a ti a. Tichun Abram in Sarai thu chuh a zawp ta a. 3Tichun, Abram chuh Kanaan gama kum sawm a um nung chun, a zi Sarai chun, a suoknu, Aigupta mi Hagar chuh a pui a, a pasal Abram kawm achun a zi a um dingin a pie ta a. 4Tichun, Hagar chuh a kuolpih a; nau a vawp ta a: nau a vawp tai tih a kihet phet chun: a pi chuh a musit ta mai a.
5Tichun, Sarai in Abram kawmah, “Ka thil thawk hi nangin amawh na puok ding ahi: ka suoknu hi na pawm dingin ka hun pie a; nau a vawp hi tih a kihet phetin ei musit mai ta a: Lalpa’n nang leh kei thu hi ngaihtuoh hen,” a ti a.
6Himahleh, Abram chun Sarai kawmah, “Ngaiin, na suoknu chuh na khuta um ahi a puo; pha na sak bang takin a chungah hih in,” a ti a. Tichun, Sarai chun a sugimthei mah mah ta a, zieziekchun a taimang ta a.
7Chun, Lalpa vânsâwlchâk chun thaleka Shur zawtna lampi a tuikhuk kieng achun ana mu a, 8a kawmah: “Hagar, Sarai suoknu, khawi apat a hung a, khawia chieh ding na him?” a ti a. Amah chun, “Ka pi Sarai kawma pata taimang ka hi,” a ti a.
9Chun, Lalpa vânsâwlchâk chun a kawmah, “Na pi kawmah chieh kit inla.a thu thu’n va um in.” a ti a. 10Lalpa vânsâwlchâk mah chun a kawmah, “Na suonte chuh simsenloh khawpa tamin hun supung ding ka hi” a tikit a. 11Chun, Lalpa vânsâwlchâk mah chun a kawmah, “Ngaitie, nau na vawp ta a; chapa nei in na tin. Lalpa’n na gimtheih zie hi a het tâk ziekin a min in Ishmael na sak ding ahi. 12Amah chuh mihiem lak ah gamsabiltung tawbang hi’n tin; amah chun mitin do in tin, mitin inle amah do in au; a suohpihte chengcheng laka pat in a chuom in cheng in a,” a tikit a. 13Tichun, Hagar chun a hopih Lalpa chuh a sama “Mutheipa Pathien na hi” a ti a. Pathien chuh mu tak tak ngâla hing nalai ka hi die aw! a ti a. 14Zieziekchun tuisutdawk chuh “Beer-lahai-roi,” minvawh ahi ta a; zie chuh Kadesh leh Bered khuo kikal a um ahi.
15Chun, Hagar in Abram chapa a hinsak a: Abram in a chapa Hagar hinsak chuh a min dingin Ishmael a sa ta a.#Gal 4.22 16Hagar in Abram dinga Ishmael ahin sak lai chun Abram chuh kum sawmgiet leh gup mi ahi.
Atualmente Selecionado:
THILSIEMBUL 16: GANGBSI
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Gangte Holy Bible - PATHIEN LEKHABU THIENGTHO
Copyright © Bible Society of India, 2010.
Used by permission. All rights reserved worldwide.
