THILSIEMBUL 14
14
Abram in Lot a Hukdawkna
1Chun, Shinar leng Amraphel, Ellasar leng Ariok, Elam leng Kedorlaomer, Goiim leng Tidal te damlai chun hiti hi a hung hi a. 2amau chun Sodom leng Bela chuh a do u a, Gomorra leng Birsha, Admah leng Shinab, Zeboiim leng Shemeber, leh Bela leng te chu le a do u a (Bela chuh Zoar ahi). 3Zie leng ngate chuh Siddim phaicham ah a pang khawm u a (zie phaicham chuh Tuisuohgiet Al hi ahi tai), 4kum sawm leh kum nih sung Kedorlaomer nuoi ah a um u a, a kum sawm leh thumna achun a kiphin tau a. 5Tichun a kum sawm leh lina achun Kedorlaomer leh a pankhawmpih leng haw leh a sepaihteu chuh a hung u a, Ashteroth Karnaim khuo ah Rephraim haw chuh a that u a. Ham khuo a Zuzim haw leh Kiriathaim phaizawl a Emim te chu le a that u a, 6A umnau Seir tângah, Elparan chanin Hor mite chuh a that u a (El-paran chuh thalek tawh kigamgi ahi). 7Tichun a vaikit u a, En-mispat a tung u a zie chuh Kadesh ahi Amalek mite gam chengcheng leh. Amor te, Hazazon-tamar khuo a umte chu le a that u a.
8Tichun Sodom leng, Gomorra leng, Admah leng, Zeboiim leng leh Bela lengte chun Siddim luiphai achun kido dingin a sepaihteu a pui u a; 9Elam leng Kedorlaomer, Goiim leng Tidal, Shinar leng Amraphel, Ellasar leng Ariok te chuh do dingin, leng li’n leng nga a do u a. 10Chun, Siddim guom chuh thingnai khuk in a dim a, Sodom leh Gomorra lengte chuh kidona apat a taihmang a guot lai un zie khuk achun a kie tau a, leng dang te chuh tâng gam ah a taimang tau hi. 11Tichun Sodom leh Gomorra mite sum chengcheng leh a nek ding chengcheng uh a lau a, a chieh tau a. 12Sodom khuo a Abram suohpihpa chapa Lot chule a neihlelam cheng tawh a pui tau hi.
13Himahleh a suokcha laka khat chun Hebrai mi Abram chuh a va hilh a: amah chuh Amor mi Mamre a gangpi thing kieng a cheng ahi. Mamre chuh Askol suohpih leh Aner suohpih ahi a; ziehaw chuh Abram tawh pangkhawm ahiu hi. 14Abram in a suohpihpa chapa chuh salin a pui ui tih a het phet chun, a In a pieng amah hilh thiemsa mi zathum leh sawm leh giet a pui a, Dan khuo chanin a delh tau a. 15Zan lai chun amau do ding chun a suokte leh amah chuh a kikhenzak u a, amau haw chuh a that u a, Hoba khuo chanin a delh u a Hoba chuh Damaska khuo mâllam ah a um ahi. 16Chun, gâllâk thil chengcheng chuh a la kit vek tau a. A suohpihpa chapa Lot leh a thil neih chengcheng leh numei chengcheng leh sala a matteu cheng chu tawh a la kit vek tau hi.
Melkisedek in Abram a Vangsak
17Chun, Kedorlaomer leh a kawma leng um haw that a a vaihkit nung chun Sodom leng chuh Shave guom achun Abram muok dingin a pawt a (Shave guom chuh leng guom ahi tai). 18Chun, Salem leng Melkisedek, Pathien Chungnung pên Thiempu chun Abram kawm achun chângthâk leh uain a hun chawi a.#Heb 7.1-10 19Chun amah chun Abram chuh vang a pie a, a kawmah, “Lei leh van neipa Pathien Chungnung pên chun Abram chuh vang pie hen. 20Na melmate hun zawhsakpa Pathien Chungnung pên chu le pahchak in um hen,” a ti a. Chun, Abram in amah chuh bangkim ah sawma-khat a pie a.
21Chun, Sodom leng chun Abram kawmah, “Mihiem cheng hi ei pie’n la, van haw hi chuh nang chang ah,” a ti a.
22Himahleh Abram chun Sodom lengpa kawm achun, “Patzang chakhat ahim, kengtawbek khau chakhat ahim le, nanga phawt chuh bangmah la puo’ng ka, 23ti’n lei leh van neipa Lalpa Pathien Chungnung pên ma achun ka kitiem ta a, khutilochun, ‘Abram chuh kei sukhauh sak ahi,’ ti kha’n la; 24Tangval haw nek mang leh ka mi puihte chanvo tihloh chuh la puo’ng ka; Aner te, Eshkol te, Mamre te chun a chanvo u chuh lau hen,” a ti a.
Atualmente Selecionado:
THILSIEMBUL 14: GANGBSI
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Gangte Holy Bible - PATHIEN LEKHABU THIENGTHO
Copyright © Bible Society of India, 2010.
Used by permission. All rights reserved worldwide.
