If you have would like a copy of this version please contact info@davarpartners.org

Text: Otuho New Testament 2003, Bible Society in South Sudan Audio: Otuho New Testament Audio Bible 2023, Davar Partners International

Otuho New Testament

Ojio ihalu kai, ababalaru nyia Yesu totto tua matta to oloŋ Sabatto. Oniamai nyia ejifak honyi, attati isi igiluna omuk ossi himma ette iriaja. Ninyia igonyuni Farisei eram ania, ette isi jiaran jio Yesu, “Imijie, ihanie lejifak hoi ariŋ enne itihotie efahita hohoi ihaniere to noloŋ Sabatto!”
Itarraŋ nyia Yesu isi ojio, “Hèbiaŋata itai ihenuna erre hunyia ihan Dafide iko aati honyi, ninyia aniamai isi? Ojiŋak nyia inyi ihaji Hollum, ette inyi iko aati honyi iŋiyo emunio hunyia isiori jio Hollum. Itihotie nyia efahita isi iŋiyere emunio hua arari fe ehumak hama oŋiyei isi. Kuyya hèbiaŋata buo fe itai ihenuna to tua ifahita huno Mose jio, itafayacie ehumak efahita to oloŋ Sabatto, te egiama hosi itua Haji emojit enne ittokon, ati, obeŋi isi owoni iko epali. Eramak ni itai jio, owon obo ariŋ anna agalik Aaji emojit enne ittokon. Imijana duo itai awoyo hiram ono ekiana onno ojio 'to, ‘Awak ni amehino, obiaŋara aciaŋi ehumita,’ ibiaŋata duo itai iŋotonia epali jio hullo obeŋi 'to ipali. Nyio, ara Lonyi Tulo Lamonye olo Sabatto.”


Olo nyia Yesu teya, ette ijiŋana jio obo aaji emojit, ninyia awanari obo atulo ollo oye hani. Owoni nyia omuk aati diya hunyia awahi 'to itisiahina inyi. Ania, ette isi ifiyo inyi jiojio, “Aŋatani soho efahita hohoi itaŋidariere to oloŋ Sabatto?”
Attati inyi itarraŋ isi jio, “Ŋai tehiji hatai ollo obeŋ adi ipihu aker honyi to tua iwure to oloŋ Sabatto, alla akuahino aker honyi diya? Oyyu atulo agalik aker! Tania, aŋatani efahita hohoi iluahiere atulo to oloŋ Sabatto.” Attati inyi jiaran jio latulo lia, “Itabisak aani hoi.”
Ette inyi itabisana, buo aani honyi ette inyiak ŋidari ihuo ebotie hani. Attati Farisei ifuatan teya, ette iwwahuna ekoi ittohori Yesu.

Ninyia itayiru Yesu ewwahuna hosi ittohori inyi, ette inyi leten addi teya, buo eluluŋ waati enne ittok ette ijifaru inyi. Buo inyi ette itaŋida aŋuak hosi 'daŋ, ette ihum iramana isi hèlaha isi itisarrahini eram honyi jio aati hullomuk. Ihan nyia inyi ihuo nyia oŋida itasiruni ekiana Hollum ninyia ikianari inyi te etuk Isaya Ekianani Honyi jio:
“Imijata egiamani hoŋ olo alla anyimu ni,
inyi alia ollo obuor ataji hoŋ.
Inyi buo fe alia alla amuno ni bebe.
Esiarak adi ni Oloholio hoŋ jihonyi
buo inyi adi ette iramana jio aati hutta fau 'daŋ,
aleten hoŋ iŋocio eram onno obis.
Obeŋ adi inyi ilorisa kuyya ohosohita,
Obeŋ adi tulo itayiru inyi iwuwoŋita ilofirihi.
Obeŋ adi inyi isohu osiholoti onno oboina 'to,
kuyya itaduny allomo enne iliaha 'to adunyari.
Odulo adi inyi many iyaŋuniere inyi
aŋocio hiram onno obis 'to jio aati.
Buo aati 'daŋ ette adi iyihina ta afure honyi.”


Attati omuk aati iyaŋuno jihonyi obo oloŋodo elle ittallik ikiana nyio, owon nyia aminiaŋati jihonyi. Buo Yesu ette itaŋida atulo lia many oremik inyi inyiak ikiana buo fe omijio. Illillihai nyia eluluŋi waati 'daŋ ette ifiyo jiojio, “Lonyi Dafide 'tadi olo?”
Ninyia itaniŋuni Farisei ekiana ania, ette isi jiaran, “Ifuhatio inyi aminiaŋa hunia ta aduaran Belsebul hobu miniaŋa.”
Ati omijak nyia Yesu egigilita hosi, ette inyi jiaran jihosi jio, “Elle ibubuanya obo afau eluluŋi eluluŋi hunno orriomonie isi hama, otturo adi inyi. Elle ibubuanya buo fe obo abore gala kuyya obo ahaŋ eluluŋi eluluŋi hunna aŋalafai, otturo adi inyi. Alla aŋalafarai eluluŋi hutto lobie Sittan isi hama itahutak inyi jio ibubuanya olobie ania. Tania, otturo adi inyi kuak. Elle efuhatio ni aminiaŋa ta aduaran Belsebul, buo lejifak hatai ifuhatie isi ta aduaran ŋai? Tania, arai adi lejifak hatai ahaŋotok hiram hatai. Ati, elle efuhatio ni aminiaŋa ta aluahio ono Oloholio Hollum, itahutak ania jio alum Olobie Hollum ihiji hatai.
“Ittallik obo atulo ijiŋara ihaŋ olottir ihorori asaŋ honyi, arari fe elle ifit inyi olottir alia do, ŋa ti inyi oremik ibialaru asaŋ honyi.
“Atulo ollo obeŋ 'to ara aholoŋ, oliwari inyi ani luŋa; buo lia, ollo obeŋ 'to oluak ani isuduhaniere, ikukurio inyi luŋa. Tania, eramak ni itai jio, oremehini adi ihohina eyyata waati 'daŋ iko etarrohojita hosi afure Hollum, ati ittallihi adi ihohina eyyata lia elle ittarrohojio 'to afure Loholio Olibo. Lia, elle ittarrohojio 'to afure Lonyi Tulo oremehini adi ihohina eyyata honyi. Ati lia, elle ittarrohojio 'to afure Loholio Olibo ittallihi adi ihohina eyyata honyi ihuania…ara duadi bu moi.


“Oŋijak ayyani onno oyyu 'to eŋijiti hunno oyiji, buo ayyani onno orroho 'to oŋijak eŋijiti hunno orrohoji 'to. Nyio, oheruni aati ayyani te eŋijiti honyi. Itai amunuok hulo! Aŋai iremehina itai ikiana erre hunno oyiji 'to buo itai isata arrohojak? Nyio, ikiana etuk erre hunne ifuti 'to itua taji. Iyaŋuno oloyijio erre ayijok to hirre ayijok hunno owoni 'to jihonyi; buo olorroho iyaŋuno arrohojak to hirre arrohojak hunno owoni 'to jihonyi.
“Eramak ni itai jio, Iholoŋ ono Aŋocio Hiram, ofuoi adi aati 'daŋ ababo iramuna awoyo hirre huno ekenita 'daŋ hunyia ikianai isi asai asai. Nyio, ekenita hunne ikianati itai isi adi hunno oŋotonierek jihatai epali kuyya abiaŋan ipali.”


Attati omuk ettiyanak ifahita iko Farisei jiaran jio Yesu, “Hettiyanani, ewak hohoi igonyuna iyye ihanio obo eduarit.”
Ati itarraŋ inyi isi ojio, “Orrohoji aati hula ahana buo fe otimoi Hollum. Nyio, awahi isi itahutani isi obo eduarit. Ati obeŋi adi itahutani jihosi obo arari fe etamijani ono Yona ekianani Hollum. Nyio, ihuo ninyia otuhori Yona oŋitek iko aruejin hunihoi to tua hami enne ittok, otuk adi buo fe Lonyi Tulo oŋitek iko aruejin hunihoi to tua fau. Odiotoi adi aati Ninife Iholoŋ ono Aŋocio Hiram, ette itisiahina itai. Nyio, ihari nyia isi eyyata hosi ninyia itayiruni isi ettittoyo ono Yona. Eramak ni itai, owon obo ariŋ dini anna agalik Yona! Odioto adi noobu ono Seba Iholoŋ ono Aŋocio Hiram, ette itisiahina aati hula ahana. Nyio, ottu nyia inyi ta fau honyi anna alama 'to itayiruniere olofioro huno Solomon Hobu. Eramak ni itai owon obo ariŋ dini anna agalik Solomon!


“Alla ajiŋu aminiaŋati jio obo atulo, ilor inyi ta amaji onno oyoho 'to, ittifiari amaji eyirit, ati obeŋ inyi onyurak obo. Attati inyi jiaran, ‘Acaharu adi ni ihaji hoŋ noduo ediehuno ni.’ Ninyia acohuno inyi, onyurak nyia inyi aaji honyi oyur, alibo, buo fe ilaman. Attati inyi leten, ette iloŋuno omuk aminiaŋa hattarik hunno orrohoji 'to agalihini inyi, ette isi ijiŋana, ette imanya diya. Ania, ninyia atuho 'daŋ, orroho nyia jio latulo alia agalik ninyia tetteri. Ara adi buo fe inyi ihuo nyia jio aati arrohojak hula ahana.”


Ninyia hèkiana Yesu jio aati hia, afanyi nyia bo honyonyi iko illarak honyi, ette iwotia illet. Awahi nyia isi ikiana jihonyi. [ Ania, ette obo atulo tehiji waati iramana inyi jio, “Imijie, honyohoi onno owotia illet iko illarak hoi. Awahi isi ikiana jihoi.”]
Itarraŋ nyia Yesu jio, “Ŋai iyaŋ? Haŋai illarak hoŋ?” Attati inyi ihut ajio lejifak honyi, ette jiaran, “Imijiete, iyaŋ ana iko illarak hoŋ! Lia, elle ihanio 'to erre hunna awak Monyoŋ ettedou, inyi ara illaŋ iko haniyoŋ buo iyaŋ.”

Ouça Matteyo 12