Marcos 13
13
Ẽg jagtar ke
(Mt 24.1-14; Lc 21.5-19)
1Kỹ tóg Topẽ ĩn tá kãkutẽ mũ sir. Re tá ti mré tĩ ũ tóg ti mỹ: “ve ra ha, Senhor,” he mũ. “Pó sĩnvĩ tãvĩ tỹ tóg há nỹtĩ, ĩn tag ti”, he tóg, Topẽ ĩn to. 2Hã ra tóg ti mỹ: “ã mỹ ĩn mág tag ti vég mũ'? Kejẽn pó tag tóg jagnẽ kri nỹtĩ mãn ke tũ nĩ. Ag ránhráj kãn ke vẽ,” he mũ.
3Kar kỹ tóg krĩ tỹ Oliveiras ra tĩg kỹ tá nĩ nĩ sir, Topẽ ĩn kakãm. Kỹ Pedro, Tiago, João, André ag tóg ag pin kỹ ti mỹ: 4“ẽg mỹ ag tỹ kókén ke kurã ti tó. Ẽg ne ve kỹ ti kurã ki kanhró nỹtĩnh mũ? Kurã tỹ hẽ ki ẽg hỹn tag venh ke mũ?“ he mũ.
5Kỹ tóg ag mỹ: “ker ũ ãjag lograr hé hẽ',” he mũ. 6“Cristo vỹ tỹ inh nĩ,” he jé ag tóg ke mũ, ijiji tó kỹ. Ũ tỹ hẽn ri ke ag tóg tag tónh mũ, kỹ ũ tỹ hẽn ri ke ag tóg ag vĩ kri nĩm ke mũ. 7“Vẽnh génh kãme mẽgmẽ jé ãjag tóg ke mũ, tag ki vẽnh génh ke to, kuvar há tá vẽnh génh to ke gé. To jũrũn ke tũg nĩ hã ra. Vẽnh génh enh ke vẽ. Hã ra kurã tỹ ẽgno to hã ke vẽ ver,” he tóg. 8“Nação ag tỹ jagnẽ kato tẽgtẽnh ke vẽ. Pã'i krẽm ke ag tỹ pã'i ũ krẽm ke ag to jũnh ke vẽ gé. Kỹ ga tỹ ragrag ke tỹ hẽn ri ke han ke vẽ gé, ẽmã tỹ hẽn ri ke ki. Vẽjẽn tỹ tũ' henh ke vẽ gé. Ãjag jagtar ke vẽnh ven vén vẽ ha,” he tóg.
9“Rẽngag nĩ. Ãjag jyvẽn tar han jé ag tóg ke mũ. Vẽnh kanhrãn jafã krẽm ag tóg ãjag mrãnmrãn ke mũ, isũgrĩn. Ãjag jé ag tóg prẽr ke mũ gé, pã'i mág tỹ ãjag ve jé, pã'i mág kar ti, ãjag tỹ ag mỹ inh vĩ tugtó jé. 10Kỹ inh kãtĩg ke to hã povo kar vỹ inh vĩ sér mẽnh ke mũ,” he tóg. 11“Ag tỹ vãhã sir ãjag sigse kỹ, ãjag tỹ nén tónh ke mũ to jykrén tũg nĩ! Jatu nỹtĩm nĩ! Ag tỹ ãjag ki jẽmẽn kỹ Topẽ kuprĩg tóg ãjag mỹ tónh ke mũ. Ti vĩ hã tó jé ãjag tóg ke mũ. Ãjag tỹ tó tũ vẽ sir, ti tỹ tó vẽ sir,” he tóg. 12“Ũ vỹ tóg ti régre senh ke mũ, ti ter jé, ẽn kã. Kỹ ũ panh tóg ti kósin senh ke mũ gé. Kỹ ũ krẽ tóg ti han mũ fag sigsenh ke mũ gé, fag kãgtén jé. 13Vẽnh kar vỹ tóg ãjag to vĩ kónãn ke mũ gé, ijiji tugrĩn. Hã ra ũ tỹ isovãnh tũ pẽ ẽn kren ke vẽ,” he tóg.
Vẽsỹrénh mág ke
(Mt 24.15-28; Lc 21.20-24)
14Kỹ tóg ag mỹ: “kejẽn ãjag tóg vãhã ãjag tỹ nén kamẽg tĩ ẽn venh ke mũ, ẽg kavénh mũ ẽn ti,” he mũ. “Topẽ vĩ tó tĩ tỹ Daniel vỹ ti tó ja nĩgtĩ. Ti jẽnh ke tũ tá tóg jẽnh mũ. Ũ tỹ to ke mũ ẽn jé ki kanhró nĩ. Kỹ Judéia ki ke kar ag jé vẽnh pigjunh mũjẽg, pãnónh ra, fag mré hã. 15Ũ tỹ re tá nĩ ẽn jé ti ĩn kã ra rã tũg, ti tũ mãn jé. 16Kỹ ũ tỹ ti japỹ tá jẽ ẽn jé vỹn ke tũg gé, ti kur mãn jé. 17Ũn kufy fag tỹ vẽsỹrénh ke vẽ, kurã ẽn kã, ũ tỹ gĩr pygfãm mũ fag ke gé. 18Topẽ mré vĩm nĩ, ti tỹ kusa kã vẽnh ven tũ nĩ jé! 19Vẽsỹrénh tỹ ge ve ja tũ ẽg nỹtĩ, Topẽ tỹ ga han jãn ki. Kỹ ẽg ge venh ke tũ nĩ gé, kar kỹ. 20Ẽg tỹ kurã ki vẽsỹrénh ke mũ vỹ e nỹtĩ vẽ, hã ra tóg térem kỹ nỹtĩ nĩ, Topẽ tỹ ũn kuprẽg ja ẽn ag tugrĩn. Ti tỹ térem tũ nĩ ra ũ vỹ kren ke tũ nĩ vẽ, ag vẽsỹrénh ẽn to,” he tóg.
21“Kỹ ũ tỹ ãjag mỹ: ha vé, Cristo vỹ tag kã jẽ nĩ, tãtá ti jẽ nĩ, he mũ ra kri nĩm tũg nĩ. 22Ón kỹ Cristo vỹ vẽnh venven ke mũ, ón kỹ Topẽ vĩ tó tĩ ag ke gé. Kỹ ag tóg ón kỹ milagre tỹ hẽn ri ke hynhan ke mũ. Ag tỹ vẽnh kar krĩn kónãn sór vẽ, Topẽ tỹ ũn kuprẽg ja ẽn ag mré hã, hẽn ri ke mũn. 23Ha vé, sỹ ãjag mỹ tó kãn vẽ, ti kutẽnh ke to hã,” he tóg, Jesus ti.
Topẽ kósin kãtĩg mãn ke
(Mt 24.29-31; Lc 21.25-28)
24“Hã ra kurã ẽn kã, vẽsỹrénh ẽn kar kỹ rã vỹ nhyr ke mũ, kỹ kysã vỹ jẽngrẽg mãn ke tũ nĩ gé. 25Kỹ krĩg vỹ vár ke mũ gé, kanhkã krẽm. Ẽg tỹ kanhkã tá nén vég tũ kar ẽn vỹ ragrag ke kãn mũ gé. 26Kỹ vãhã vẽnh kar vỹ ẽprã ke fi kósin kãtére venh ke mũ sir, kanhkã góg kãmĩ, inh jykre tar pẽ nĩn kỹ. Inh ve vỹ kókov pẽ nĩnh mũ gé. 27Kỹ sóg isỹ jẽgnẽ jafã ag mỹ: ha mũjẽg, henh ke mũ, ag tỹ isỹ ũn kuprẽg ja ag vẽnhmãn jé, ga kar tá, kanhkã fyr mĩ hã,” he tóg.
Ka tỹ figueira kãme
(Mt 24.32-35; Lc 21.29-33)
28“Ka tỹ figueira to ki kanhrãn nĩ. Ti pẽ tánh kỹ, ti féj tãg han kỹ tóg kakó tĩ sir, ẽkré tygtánh ke kurã ti. 29Ri ke ti nĩ, ãjag tỹ inh kãtĩg mãn ke kurã ki kanhró nỹtĩ ti. Ãjag tỹ sỹ ãjag mỹ nén tó mũ tag ve kỹ tóg kakó tãvĩ tĩ ha, inh kãtĩg mãn ke ti. 30Sỹ ke há vẽ, ha mẽ. Ũri ũn rĩnrĩr mũ ag tỹ nén kar ẽn venh ke vẽ, ag kãgter ke to hã. 31Kanhkã vỹ tũ' henh ke mũ, ga ti ke gé. Jãvo inh vĩ vỹ tũ' henh ke tũ nĩ,” he tóg.
Jesus kãtĩg mãn ke kurã
(Mt 24.36-44)
32“Hã ra ũ pijé isỹ kurã kã kãtĩg mãn ke mũ ki kanhró nĩ', óra ki ke gé'. Topẽ tỹ jẽgnẽ jafã ag pijé ki kanhró nỹtĩ'. Inh pijé ki kanhró nĩ gé', isỹ tỹ Topẽ kósin ra. Ẽg jóg mág hã vỹ ti pin kỹ ki kanhró nĩ, kurã kã nén kutẽnh ke mũ ẽn ki. 33Ãjag kanẽ nĩm nĩ, rinfig nỹtĩm nĩ. Topẽ mré vĩ, ãjag tỹ ti kurã ki kagtĩg nỹtĩn kỹ. 34Ũ pasanh tĩg ri ke vẽ. Ti tỹ ti ĩn ki kutẽ kỹ tóg ti mỹ rãnhrãj tĩ ag mỹ: “ijo ki rĩr,” he mũ, Kỹ tóg ũ tỹ jãnkã ki rĩr tĩ ẽn mỹ: “ã kanẽ nĩm nĩ,” he mũ gé. 35Hã kỹ sóg ãjag mỹ: “ãjag kanẽ nĩm nĩ,” he mũ gé. Ãjag pijé ti jun ke ki kanhró nỹtĩ', Hẽn ri ke mũn tóg kutyg ke ra jun mũ, hẽn ri ke mũn tóg kuty kuju ki jun mũ, hẽn ri ke mũn tóg galo kyr mũ ra jun mũ, hẽn ri ke mũn tóg kusãg ki jun mũ. 36“Vẽnh ki ẽmẽm nĩ, nũr tũg nĩ. Ãjag tỹ ijãvãnh tũ ra sóg jun mũ. 37Vẽnh kar mỹ sóg tó mũ, sỹ ãjag mỹ tó mũ tag, hã vỹ: vẽnh ki ẽmẽm nĩ, he mũ,” he tóg, Jesus ti.
Atualmente selecionado:
Marcos 13: kgp
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido