SAN MATEO 26
26
Jesusta japichingapac yuyarinacushcamanta
(Mr 14.1-2; Lc 22.1-2; Jn 11.45-53)
1Tucui chaicunata nishca q'uipami, Jesusca paipac yachacuccunamanca:
2—Caimanta ishcai punzha q'uipaca, pascua*f** punzha chayamugricushcataca cancunallatac yachanguichicmi. Chai punzhapimi, Runa Tucungapac shamushca*f** ñucataca, cruzpi chacatachun japichingacuna— nirca.
3Chai punzhacunapimi Israel*f** curacunata mandac curacunapish, cunac yuyaccunapish, curacunata jatun mandac Caifaspac huasipi tandanacurcacuna. 4Chaipi tandanacushpami, Jesusta umashpa pacalla ima shinapish japishpa huañuchinata yuyarinacurcacuna. 5Chashna yuyarishpapish paicunaca:
—Cai fiesta punzhacunapica mana japishpa, casilla saquishunlla, pacta tucui gentecuna jatarishpa ñucanchictarac imata ruhuanman— ninacurcacuna.
Jesuspac umapi mishquilla ashnacucta churashcamanta
(Mr 14.3-9; Jn 12.1-8)
6Jesús Betania puebloman rishpaca, lepra*f** ung:uimanta alliyashca Simonpac huasipimi carca. 7Jesús mizapi tiyacucpimi, shuc huarmica alabastro rumimanta ruhuashca botellapi, achca valishca mishquilla ashnacucta apamurca. Chashna apamushpami, Jesuspac umapi churarca. 8Chashna ruhuacta yachacuccuna ricushpaca, p'iñarishpami:
—¿Ima nishpatac cai mishquilla ashnacuctaca, yangamanta t'allinyari? 9Chashna t'allina shinaca, achca cullquipi c'atushpa huacchacunaman cunachari, ashtahuan alli canman carca— ninacurcacuna.
10Jesús chaita uyashpaca:
—¿Ima nishpatac cai huarmitaca rimaricunguichic? Saquichic. Pai chashna ruhuashpaca, allitami ñucamanca ruhuashca. 11Huacchacunaca ima punzhapish mana illangachu, ashtahuanpish ñucaca mana cancunahuanca causacushallachu. 12Cai huarmica pai ruhuai pudishcatami ruhuashca. Ñuca huañucpi enterrangapacmi, ñucapica ña utca cai mishquilla ashnacuctaca churashca. 13Cai pachapi maipipish quishpirinamanta alli huillaita huillacushpaca, cai huarmi imata ruhuashcatapish huillangacunami. Chashna huillacpica, tucui uyaccunami yuyaringacuna. Chaica chashnatacmi canga— nirca.
Judas Iscariote Jesusta japichisha nishcamanta
(Mr 14.10-11; Lc 22.3-6)
14Chai q'uipami chunga ishcai yachacuccunapuramanta Judas Iscariote runa, curacunata mandac curacunapacman rishpaca:
15—Jesusta ñuca japichingapacca, ¿mashna cullquitatac cushun ninguichic?— nirca.
Pai chashna nicpi, chai curacunaca quimsa chunga cullquita cushun nircacuna. 16Chaimanta pachami Judasca, ima shinapish Jesusta japichinata mashcashpa, chai yuyailla puricurca.
Jesús pai huañunata yuyarishpa micushcamanta
(Mr 14.10-11; Lc 22.7-23; Jn 13.21-30; 1 Co 11.23-26)
17Levadura illac tandata micuna callari punzha chayamucpimi, yachacuccuna Jesuspacman cuchuyashpaca:
—¿Maipitac can pascuata*f** yuyarishpa, micunataca allichigrishun?— nishpa tapurcacuna.
18Chashna tapucpi Jesusca:
—Puebloman rishpa, shuc runapac huasiman chayashpa cashna nigrichic: ‘Ñucanchicta yachachicca: “Ñucata japichina pachami chayamucun. Chaimanta cambac huasiman rishpa, ñuca yachacuccunahuan pascuata yuyarishpa micugrini” ninmi’ nigrichic— nirca.
19Shinami yachacuccunaca Jesús mandashca shinallatac ruhuashpa, pascuata yuyarina micunataca allichircacuna. 20Ña tutayamucuctami Jesusca, paipac chunga ishcai yachacuccunahuan mizapi micungapac tiyarirca. 21Chashna mizapi micushpa tiyacushpami Jesusca:
—Cancunapuramanta shucmi, ñucataca huañuchiccunaman japichinga. Chaica chashnatacmi canga— nirca.
22Chashna nicpica, munai llaquirishpami caishuc chaishuc Jesusmanca:
—Apunchic Jesús, ¿canta japichicca ñucachu cani?— nishpa tapurcacuna.
23Chashna tapucpi Jesusca:
—Cancunapuramanta ñucahuan cai platollapitac tandata jucuchishpa micucllatacmi, ñucataca japichigrin. 24Runa Tucungapac shamushca*f** ñucataca, Dios quillcachishcapi nishca shinallatacmi huañuchingacuna. Ashtahuanpish ñucata japichic runaca, ¡aij, imachari tucunga! Chai runaca mana huacharishca cashpachari ashtahuan alli canman carca— nirca.
25Chashna nicpi Jesusta japichic Judasca:
—Yachachic, ¿canta japichicca ñucachu cani?— nishpa, Jesusman tapurca. Chashna tapucpi Jesusca:
—Ari, canllatacmi cangui— nirca.
26Chashna micucushpami, Jesusca tandata japishpa Taita Diosta pagui nishpa chaupishpa, chaupishpa yachacuccunaman cushpa:
—Japichic, micuichic. Caica ñuca aichami— nirca.
27Shinallatac vino vasota japishpapish, Taita Diosta pagui nishpa yachacuccunaman cucushpaca:
—Cai vasomanta tucuilla ubiaichic. 28Cai vaso vinoca, achcacunapac juchacunata perdonashpa quishpichingapac jichana ñuca yahuarmi. Chaihuanmi Taita Diosca shuc mushuc ari ninacuita pactachigrin. 29Ñucaca ninimi: Dios maipi mandacucpica cancunahuan mushuc vinota ubiangacamanmi, cai uvasmanta vinotaca cutinca manatac ubiasha— nirca.
Jesusca Pedrota “ñucata mana ricsinichu ninguimi” nishcamanta
(Mr 14.26-31; Lc 22.31-34; Jn 13.36-38)
30Cantota cantashca q'uipami, Olivos urcuman rircacuna. 31Chaiman chayashpami Jesusca:
—Dios quillcachishcapica: ‘Michictaca huañuchishami. Ña huañuchicpica, ovejacunaca caita chaitami shiguaringacuna’ ninmi. Chashna nishca shinallatacmi, cunan tutallatac tucui cancunaca ñucata saquishpa caita chaita ringuichic. 32Shina cacpipish Taita Dios ñucata causachishca q'uipaca, cancuna manarac Galilea llactaman ricpimi, ñaupashpa risha— nirca.
33Chashna nicpi Pedroca:
—Caishuccuna canta saquishpa ricpipish, ñucaca manatac saquishachu— nirca.
34Chashna nicpi Jesusca:
—Cunan tutallatacmi gallo manarac cantacpi, quimsa cutin ñucataca ‘mana ricsinichu’ ningui. Chaica chashnatacmi canga— nirca.
35Chashna nicpi Pedroca:
—Canhuan pacta huañuna cacpipish, ‘mana ricsinichu’ nishpaca, manatac nishachu— nirca. Shinallatacmi tucui yachacuccunaca nircacuna.
Getsemaní huertapi Taita Diosman Jesús mañashcamanta
(Mr 14.32-42; Lc 22.39-46)
36Chai q'uipami Jesusca, paipac yachacuccunahuan Getsemaní huertaman rirca. Chaiman chayashpaca:
—Chainicpi ñuca Taita Diosman mañangacaman, cancunaca caillapi tiyacuichic— nirca.
37Chashna nishpami Jesusca Pedrotapish, Zebedeopac ishcai churicunatapish pushashpa rirca. Chashna rishpaca paipac shungupi llaquihuan cashpami, mai llaquiri callarirca. 38Chaimantami Jesusca:
—Ñuca shungupica, huañuna nanaihuan shinami munai llaquiricuni. Cancunaca ñuca shinallatac, ama suiñushpa caillapi chaparacuichic— nirca.
39Shina nishpaca, Jesusca ashata chainicman rishpami pambapi tuparicta cumurishpa, Taita Diosman mañashpaca:
—Ñuca Taitalla, ima shinamanta cai jayacta ubiana shina llaquicunata ñuca mana apana cacpica, jarcaiyari. Shina cacpipish ama ñuca munashcata ruhuaichu, ashtahuanpish can munashcata ruhuai— nirca.
40Jesús chashna mañashca q'uipa, yachacuccunapacman cutimushpaca, paicuna suiñucucpimi tuparirca. Chaimantami Pedrotaca:
—¿Manachu ashallatapish ñuca shinallatac riccharishca cai pudircanguichic? 41Imapish mana alli yuyaicuna ama japichunca, riccharishpa Taita Diosman mañacuichic. Cancunapac shungu alli yuyaita charicpipish, cancunapac cuerpoca shaicunllami— nirca.
42Cutinllatac Jesús mañangapac rishpaca:
—Ñuca Taitalla, jayacta ubiana shina llaquicunata ñuca apanata mana jarcaipac cacpica, can munashca shina cachun— nishpami mañarca.
43Jesús chashna mañashpa cutimushpaca, yachacucuccunataca suiñucucpimi tuparirca. Paicunapac ñahuicunaca suiñuihuan huañucushpami, mana pascarisha nirca. 44Chashna cacpimi cutinllatac Taita Diosman mañangapac Jesús rishpaca, puntaman mañashca shinallatac mañarca. 45Chashna mañashca q'uipa, yachacuccunapacman Jesús cutimushpaca:
—¿Cancunaca samashpa suiñucunguichicllachu? Ña jatarichic, ñami Runa Tucungapac shamushca*f** ñucataca, juchayuc runacunaman japichina horasca pactamushcami. 46Jatarishpa jacuchic. Ñucata japichicca ñami chayamucun— nirca.
Jesusta japichishcamanta
(Mr 14.43-50; Lc 22.47-53; Jn 18.2-11)
47Jesús chashna nicucpiracmi, chunga ishcai yachacuccunapuramanta Judasca, tauca runacunahuan shamurca. Chai runacunaca curacunata mandac curacunapish, cunac yuyaccunapish cachacpimi espadacunahuan, caspicunahuan Jesusta japingapac shamurcacuna. 48Jesusta japichic Judasca, chai runacunamanca: “Maijantami ñuca muchani, chaimi Jesusca. Chaita japinguichic” nishcami carca. 49Jesuspacman Judas cuchuyashpaca:
—Yachachic, ¿allillachu cangui?— nishpami, chayashcahuan Jesusta mucharca.
50Chashna muchacpimi Jesusca:
—Uyai. Can imata ruhuangapac shamushca cashpaca, ruhuailla— nirca.
Shina nicpimi, paihuan shamuc runacunaca Jesusta huaicashpa japircacuna. 51Chaipimi Jesushuan caccunapuramanta shucca, espadata llucchishcahuan jatun mandac curapac servic runapac rinrita p'itirca. 52Chashna ruhuacta Jesús ricushpami:
—Saqui, espadata maipi huacaichinapi huacaichi. Maijanpish espadahuan macanacuctaca, espadallahuantacmi huañuchishca canga. 53Cunanllatac ñuca Taitaman huaranga huaranga angelcunata ñucata huacaichichun mañacpica, cunanllatacmi cachanman. Chaitaca, ¿manachu yachangui? 54Ashtahuanpish Taita Dios angelcunata cachacpica, ¿ima shinatac Dios quillcachishcapi cashnami tucunga nishcaca pactangayari?— nirca.
55Shinallatac Jesusca paita japiccunataca:
—¿Ñucataca shuhuata shinachu japingapac, cancunaca espadacunahuan, caspicunahuan shamunguichic? Punzhantami Diosman mañana huasipica yachachicurcani. Chashna yachachicucpipish, mana japircanguichicchu. 56Ashtahuanpish ñaupa huillaccunaman Dios quillcachishca pactachunmi, tucui caicunaca tucushca— nirca.
Chaipimi Jesuspac yachacuccunaca paillata saquishpa, tucui miticushpa rircacuna.
Mandaccunapuralla tandanacushcapacman Jesusta apashcamanta
(Mr 14.66-72; Lc 22.56-62; Jn 18.15-18,25-27)
57Jesusta japishpaca, curacunata jatun mandac Caifaspac huasimanmi aparcacuna. Chaipica mandashcacunata yachachiccunapish, cunac yuyaccunapish tandanacushcami carcacuna. 58Pedroca caru carullatami chai huasi pungu pambacaman c'atishpa rirca. Chashna rishpaca, Diosman mañana huasita cuidaccunahuanmi Jesusta ima ruhuacta ricungapac canzhallapi saquirirca.
59Curacunata mandac curacunapish, tucui mandaccunapura tandanacushcacunapish, Jesusta huañuchingapacmi manapish cashcacunata nichun, llullashpa huillaccunata c'ayarcacuna. 60Shina cai tucui llullashpa huillaccuna chayashpa llullacpipish, imamanta juchanchinataca mana tarircacunachu. Shina cacpipish ishcai llullashpa huillac runacuna shamushpaca:
61—Cai runaca: ‘Diosman mañana huasita urmachishpapish, quimsa punzhapica cutin shayachishallami’ nircami— nircacuna.
62Chashna nicpi curacunata jatun mandac cura jatarishpa Jesustaca:
—Cai tucuita nicucpipish, ¿manachu imata ningui?— nirca.
63Chashna nicpipish, Jesusca imata mana nircachu. Chaimantami jatun mandac curaca:
—Causac Diospac shutipimi huillachun nini. ¿Canchu Diospac Churi Quishpichic Cristoca cangui?— nirca.
64Shina nicpi Jesusca:
—Ña canllatac nishcanguimi. Ashtahuanpish ñucaca cancunamanca cashnami nini: Cunanmanta pacha Runa Tucungapac shamushca*f** ñucataca, imatapish ruhuaclla Taita Diospac alli maquiman tiyacuctami ricunguichic. Shinallatac jahua pachamanta p'uyupi shamucuctapish ricunguichicmi— nirca.
65Shina nicpi jatun mandac curaca munai p'iñarishpami, paipac churanata lliquishpaca:
—Paita juchanchingapacca, piman ña mana ashtahuan tapunachu canchic. Cai runaca Dios tucushpa Diosta p'iñachicushcataca, ña cancunallatac uyashcanguichicmi. 66Paillatac cashna nicpica, ¿cancunaca imatatac ninguichic?— nishpami, chaipi caccunamanca tapurca.
Shina nicpi paicunaca:
—¡Pai chashna rimashcamantaca, huañunami can!— nircacuna.
67Chashna nishpaca, ñahuipi t'ucashpami macarcacuna. Cutin maijancunaca huactashpami:
68—Diosmanta huillac Quishpichic Cristo cashpaca, maijantac canta huactanchic huillai— nircacuna.
Pedroca Jesusta “mana ricsinichu” nishcamanta
69Chai huasi pungu pambapi Pedro tiyacucpimi, shuc servic huarmi cuchuyashpaca:
—Canpish Galilea llactamanta Jesushuan puricmi cangui— nirca.
70Shina nicpi Pedroca tucui chaipi caccunapac ñaupapimi:
—Mana ricsinichu, pimantachari nicungui— nirca.
71Shina nishpa Pedro chai huasi pungu pambamanta llucshicucpica, cutinllatac shuc servic huarmi paita ricushpaca:
—Paipish Nazaret pueblomanta Jesushuan puricmi carca— nishpami, chaipi caccunamanca parlarca.
72Chashna nicpica, cutinllatacmi Pedroca:
—Taita Diospac shutipimi nini: Chai runataca mana ricsinichu— nirca.
73Chashna nishca q'uipallatacmi, chaipi caccuna Pedropacman cuchuyashpaca:
—Canpish chaipurallatacmi cangui. Cambac rimaipish ricsinallami— nircacuna.
74Shina nicpica, cutinllatacmi Pedroca:
—Taita Diospac shutipimi nini: Pimantatacpish rimacunguichicchari, chai runataca mana ricsinichu— nirca.
Pai chashna nicucllapitacmi, galloca cantarca. 75Chaipimi Pedroca: “Manarac gallo cantacpimi, quimsa cutin ñucataca mana ricsinichu ningui” nishpa Jesús huillashcataca yuyarirca. Chaimantami Pedroca canzhaman llucshishpa, munai llaquirishpa huacarca.
Atualmente selecionado:
SAN MATEO 26: QXR96
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Quichua Cañar Nuevo Testamento © United Bible Societies in Ecuador, 1996.