Matteyo 9
9
Etaŋidaryo Yesu Atulo ol Ogolyo Hwan
Mk 2:1-12; Lk 5:17-26
1To obo oloŋ adak Yesu itogol illaŋari aari ette jiŋana imiji hosi. 2Iyaŋunie isi jihonyi obo atulo te ekafit nyo ogolyo ahwan honyi. Ligonyu Yesu neruk hosi, ette jaran jyo atulo ol ogolyo hwan, Illa, itagolo ataji hoi, ahohinie eyyata hoi. 3Igigiloi omuk egyorok ta ahwattek hosi jo, omoryo atulo olo Hollum. 4Omijak Yesu egigilita hosi ette jaran, ?Nyo igigiloti tai on orroho itajya hatai ihwania? 5?Anani an ilyaha’to, ajaran hoŋ jo, Ahohinie eyyata hoi, kuyya ajaran hoŋ jo, Totte, adahai? 6Ati oŋida itai imijana jo owon adwaran jyo Lonyi tulo ihohiniere eyyata wati hutta fau. Tania ojo inyi jyo atulo ol ogolyo hwan, Otte, obubunak ejotit hoi, ilo ihaŋ. 7Teyya ette inyi dyoto ette leten ihaŋ hosi. 8Ninya igonyuni aati arryai eram ana abaŋi isi ette itahabuyo Hollum al isyo’to nadwaran ihwa ana jyo atulo.
Eloŋuna Honyi Matteyo
Mk 2:13-17; Lk 5:27-32
9Lattu Yesu teyya, ette inyi igonyuna obo atulo al anya Matteyo. Itoŋo inyi lihaji on odumarik amusuru, ette Yesu jaran jihonyi, Ijifunie ani. Bwo ette inyi odyoto ette jifaru inyi.
10To obo oloŋ, al itoŋo Yesu iteremeja ihaji, ofwonni lomuk lamojok musuru iko leyyak iŋiyere ikonyi ojo leyiyanak honyi. 11Al igonyuni Farisei ana ojori isi jyo leyiyanak honyi jo, ?Nyo oŋiye ettiyanani hatai iko lamojok musuru bwo leyyak? 12Ati itayiru Yesu nekyana ana ette jaran jihosi, Laati hul oŋidari’to obeŋi bu isi igigiloi ta afwatan jyo akim, ati to hul oŋwai’to, igigiloi adi hya ette fwatan jyo akim. 13Ifwatta iyiyanari awoyo hiram ono nekyana an ojo, “Awak ni laati hul omehitai tajya hosi obyaŋara hul isyori’to ehumita.” Abeŋ ni attu iloŋori ayijok ati attu ni iloŋori eyyak.
Eram ono Aferuna
Mk 2:18-22; Lk 5:33-39
14Tania ofwonni leyiyanak hulo Yoane jyo Yesu ette jaran, Eferuta hohoi iko Farisei ati leyiyanak hoi obeŋi oferutai, ?nyo? 15Itarraŋ Yesu jihosi ojo, ?Oremehini mottyarak hayamani ijiriŋa al owon layamani ikosi? Ofwonni adi oŋitek hun iyarik ayamani t’ehiji hosi addi bwo to noloŋ to nya attadi isi feruna. 16Obeŋ tulo orifak ettafit boŋo aŋejuk jyo egwasit boŋo amarwani nyo ogwasaru adi ettafit aŋejuk to boŋo amarwani addi, bwo fe obolo adi egwasit ania agalik odwo. 17Bwo fe obeŋ obo ijuhok abalu aŋejuk itwa ihulo amarwani. Al ijuhok obo ihwania obor adi abalu ehulo bwo obyaŋarik abalu iko ehulo. Ati ijuhonia abalu aŋejuk ihulo aŋejuho ette isi rasa daŋ.
Ŋarri Yario iko Aŋotte an Owouno Hoto Honyi
Mk 5:21-43; Lk 8:40-56
18Ninya hekyana Yesu erre huna jihosi, ottu obo eleittok ette rigoŋi jihonyi ette jaran, Hetek ŋarri hoŋ ye. Waŋ, ilo iyyabak aani hoi jihonyi otte adi inyi isu. 19Odyotoi Yesu iko leyiyanak honyi ijifari inyi. 20Teyya ottu obo aŋotte on owouno hoto to hwan honyi ta aŋasi ’tomon harrihai. Ottu inyi ihorwoŋ Yesu ette ’tir esidi boŋo honyi. 21Nyo igigilo inyi ta atwa honyi ojo, ara dwo bu attir ni aboŋo honyi hama attadi ni ŋidari. 22Otte ati Yesu fyala jihonyi ette jaran, Hanioŋ itagolo ataji hoi, litaŋida neruk hoi iye. Attati aŋotte ania ŋidari ta asaa ania. 23Al afany Yesu ihaji leittok igonyu inyi hul ohutai ekaŋata, tut, tut, tut, iko eluluŋ wati hul oyyoi, 24ette jaran, Ifwatta addi. Obeŋ eito ania oye, ojoto joto. Ette isi suhotyo bebe. 25Tania ifuhak inyi eluluŋ wati alet ette jiŋana lihaji jyo neito ette inef aani honyi ette inyi dyoto. 26Ette eram ania isarrahina ifau daŋ.
Etaŋidaryo Yesu Laŋodok Arrihai
27Ninya alatari Yesu tolya ijifarai laŋodok arrihai inyi ette isi lwaha tehalu honyi ojori, Lonyi Davide, omehinie jihohoi. 28Al ojiŋak inyi obo aji, ofwonni laŋodok jihonyi ette Yesu jaran jihosi, ?Iruhoto tai jo aremik ni itaŋida itai? Ojori isi jihonyi, Afe Hobu. 29Attati inyi ’tir oŋite hosi bwo ojo, Ehanio ni jihatai ihwa iruhoto tai. 30Attati oŋite hosi mijo. Iramak Yesu isi ta agolon ojo, Heramana obo atulo jojo, ’tuŋ. 31Ati ofwoi isi addi iramaniere eram honyi imasik daŋ.
Etaŋidaryo Yesu Atulo ol Obeŋ’to Ikyana
32Hofwoi Yesu iko leyiyanak honyi iyaŋunie laati atulo ol obeŋ ikyana nyo owon inyi iko ajok. 33Ifuha Yesu ajok addi attati atulo alya ikyana. Illillihai laati ette jaran, Obeŋ tulo igonyu omuk erre ihwo hunia ifau Israele. 34Ati ojori Farisei, Ifuha inyi ajohin addi ta afure hobu johin.
Amehino Taji Yesu jyo Aati
35Adahatyo nya Yesu imisihi daŋ ittiyeniere ihasik imojiti hosi iramyere laati asayyo lobye Hollum. Attati inyi itaŋida aŋwak daŋ t’eŋwati hosi. 36Omehitta ataji honyi al igonyu inyi eluluŋ wati nyo ilafuhoi isi bwo fe ofyahaji. Arai isi ihwa akyoro hun obeŋi’to iko leyyahani. 37Tania ojo inyi jyo leyiyanak honyi ojo, Obolo adyoŋo ati omutari legyamak. 38Hamojoti jyo Hobu olo adyoŋo jo oŋida inyi ifahu legyamak imana honyi.
Atualmente selecionado:
Matteyo 9: LOT1969
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
This text was originally published by the British and Foreign Bible Society in 1969.