Matteyo 8
8
Etaŋidaryo Yesu Atulo ’Tallulu
Mk 1:40-45; Lk 5:12-16
1To ninya to nya isuru Yesu to doŋe attati eluluŋ wati ijifuno inyi. 2Attati atulo ’tallulu ’tuna jihonyi ette rigoŋi lihomon honyi ette jaran, Hobu al iwak iye iremik iye itaŋida ani. 3Attati Yesu ihalamana ani honyi ette ’tir inyi ette jaran, Ihwa awak ni, toŋidara. Ette attallulu ono atulo alya ’turoro kwak. 4Ojo Yesu jihonyi, Imijye, heramak obo atulo, ati ilo itahutak ahwan hoi jyo ehumani bwo fe isyarak ehumi ihwa ifak nya Mose jo oŋida laati ihanie ihwa etamijani.
Etaŋidaryo Yesu Apit Jafit
Lk 7:1-10
5Lajiŋak Yesu imiji Kapernaum, ottu jafit jihonyi ette lwaha jihonyi, 6ojo, Hobu oŋwai apit hoŋ ihaji iko agolyo hwan on odyaha’to bebe. 7Ette Yesu jaran jihonyi, Attu adi ni itaŋida inyi. 8Attati jafit itarraŋ ojo, Hobu obeŋ osiru jihoŋ ittu iye ihaji hoŋ. Ati ikyanai te etuk bwo oŋida adi apit hoŋ. 9Nyo aniŋyo ni eleittok hoŋ bwo oseŋer hoŋ oniŋye ani. Lekyana ni jo obo, Ilo, bwo inyi ette leten; bwo fe lajo ni jo obo, Waŋ, bwo inyi ette ’tuna; bwo lajo ni jo apit hoŋ jo, Ihanie ania, bwo inyi ette ihanio. 10Itaniŋu Yesu ana, illilliha inyi ette jaran jyo hya hul ijifatye’to inyi, Ahode eramak ni itai jo, ara dwo bu jyo Israele daŋ abeŋ ni anyurak obo neruk on obolo’to ihwa ana. 11Eramak ni itai jo, ofwonni adi laati arryai t’ettedwoŋi holoŋ iko t’ettedorro holoŋ itoŋori itteremeja iko Abramo bwo Isako ojo Yakobo jyo olobye ette dou. 12Ati ifuhani adi lonyirok lobye limaji ono edumele. Owon adi nayyo iko aŋutta hala dia. 13Ojo Yesu jyo jafit, Ilo ati, ihanie adi jihoi ihwa iruk iye. Ta asaa ania ette lapit honyi ŋidari.
Etaŋidaryo Yesu Hamoni Simone
Mk 1:29-31; Lk 4:38-39
14Ojiŋak Yesu ihaji Petro ette igonyuna hamoni Petro oferyo on oŋwai iko anahan hwan. 15Ottir Yesu aani honyi attati anahan hwan honyi ’turoro. Ette inyi dyoto igyamari.
Etaŋidaryo Yesu Aŋwak Arryai
Mk 1:32-34; Lk 4:40-41
16Liddorro oloŋ iyaŋunie isi laati arryai hul owoni’to iko ajohin. Ifuha Yesu ajohin ta nekyana honyi bwo fe itaŋida inyi aŋwak daŋ. 17Ihanio inyi ihwania itasiruniere nekyana heyani sayyo Isaya on ojo, “Iya inyi eŋwati hohoi addi bwo fe olwak inyi elihita hohoi.”
Elyeti huno Aati Omuk
Lk 9:57-62
18Ligonyu Yesu eluluŋ wati arryai ikoloni inyi, ojo inyi jyo leyiyanak honyi, Hafata aŋati hari tole. 19Attati lobo legyoroni ’tuna jihonyi ette jaran, Hettiyanani, ejifatyo adi ni iye imasik daŋ hun idahari iye. 20Itarraŋ Yesu jihonyi ojo, Owoni obeyohi iko ewuryo hosi. Owoni aheny iko asik hosi, ati obeŋ obo amaji jyo Lonyi tulo iferyere. 21Ojo obo leyiyanani jihonyi, Hobu ijara do ani alo nuhana monyoŋ. 22Ati ojo Yesu jihonyi, Ijifatye ani. Ijara ayak onuhani ayak hosi.
Etadwayo Yesu Asiŋit
Mk 4:35-41; Lk 8:22-25
23To obo oloŋ adak inyi itogol ette leyiyanak honyi jifaru inyi. 24Bwo fe odyoto asiŋit on obolo bebe ihari, ette aari ifolyahita folyak folyak itufutaniere atogol, ati ojoto Yesu. 25Ette isi itaheny inyi ojo, Hobu olwaha hohoi ŋadi hohoi eye. 26Ette inyi jaran jihosi, ?Anyo ibaŋata tai, omuta neruk hatai? Attati inyi dyoto ette itadwayo oyyami iko aari ette aari iŋettyo dee. 27Illillihai laati hulya ojori, ?Anyo tulo olo ol oniŋye oyyami iko aari inyi?
Etaŋidaryo Yesu Atulo ol Isita’to
Mk 5:1-20; Lk 8:26-39
28Ninya allaŋ Yesu tole lifau Gerasa, orwaŋanie inyi iko laati arrihai hul ofwonni t’ehiji lumyo hul owoni’to iko ajohin hun itisitaji’to isi. Iŋereji isi bebe, tania obeŋ tulo oremik adaha jyo amaji ania. 29Ohosohitai isi ette jaran, Yesu Lonyi Hollum, ?anyo hiram iwak iye jihohoi? ?Ittu iye ittigemyere hohoi hobeŋ asaa hohoi ottuba? 30Owon neluluŋ bataha arryai alamarai kai hun oŋiye. 31Olwahai ajohin jihonyi ojori, Al ijo ati iye ifuha hohoi addi, ijara ati hohoi ejiŋak litwajin bataha. 32Ette inyi jaran jihosi, Ifwatta. Attati isi fwan addi ette jiŋana itwajin bataha, ette neluluŋ bataha daŋ ŋyoron ilotifor, hutu, hutu, hutu, ette kwahino itwa hari ette ye iko dia. 33Ofuhoi leyyak bataha ette jiŋana itwa miji ette iramana erre daŋ hun idwoŋi’to jyo hya hul isitaji’to. 34Ofwonni laati daŋ hutto miji jyo Yesu ette ifuhara inyi addi to fau hosi.
Atualmente selecionado:
Matteyo 8: LOT1969
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
This text was originally published by the British and Foreign Bible Society in 1969.