Nai Vakatekivu 8
8
Sa lako sobu na wai, 1-5. Sa vakatala na reveni ko Noa mai na waqa, 6, 7, kei na ruve, 8-12. Sa mamaca na qele, 13, 14. Sa biuta na waqa ko Noa kei ira era tiko kaya, 15-19. Sa cabora nai soro ko Noa, a sa vosa vua ko Jiova, 20-22.
1ASA nanumi Noa na Kalou, kei na ka bula kecega, kei na manumanu kecega sa tiko vata kaya e na waqa; a sa vakaliwara na cagi na Kalou me lako e dela i vuravura; a sa cegu na wai; 2a sa sogoti na vurevure ni wai titobu, kei nai sogo kei lomalagi, a sa tarovi na uca mai lomalagi; 3a sa lesu tikoga na wai mai dela i vuravura: ia ni sa oti e dua na drau ka limasagavulu na bogi, sa qai lailai sobu na wai. 4A sa cegu tu na waqa e na dela ni veiulu-ni-vanua mai Ararata, e na kenai kavitu ni vula, e na kenai katinikavitu ni siga ni vula. 5A sa lailai sobu tiko na wai, ka yacova nai katini ni vula: ia e na kenai katini ni vula, e nai matai ni siga ni vula, sa qai votu na dela ni veiulu-ni-vanua.
6Ia ni sa oti na bogi e vasagavulu, sa qai dolava ko Noa na katuba ni waqa ka cakava ko koya: 7a sa vakatala e dua na reveni, a sa lako yani ka dauveilakoyaki, ka me maca mada na wai mai dela i vuravura: 8a sa vakatala tani vua e dua na ruve, ka me raica se lailai sobu na wai mai na dela ni vanua, se segai: 9ia na ruve sa sega ni kunea e dua na vanua me cegu kina na qeteqete ni yavana, a sa lesu vua ko koya ki na waqa, ni sa tiko na wai e na dela i vuravura kecega: a sa dodoka na ligana, ka taura, ka kauta tale vua ki loma ni waqa. 10A sa tiko ka vitu tale na bogi, a sa vakatala tani tale na ruve mai na waqa: 11a sa lako mai vua na ruve e na yakavi; ka, raica, sa tiko e gusuna e dua na drau ni olive, sa cebeti: a sa kila kina ko Noa ni sa lailai na wai mai dela ni vanua. 12A sa tiko ka vitu tale na bogi, a sa vakatala na ruve, a sa sega ni lesu tale mai vei koya.
13Ia e na kenai kaono na drau ka dua na yabaki, e nai matai ni vula, e nai matai ni siga ni vula, sa qai maca na wai mai dela i vuravura: a sa laveta tani nai ubi ni waqa ko Noa, a sa iro, ka raica, sa mamaca na dela ni vanua. 14Ia e na kenai karua ni vula, e na kenai karuasagavulu ka vitu ni siga ni vula, sa qai mamaca sara na vanua.
15A sa vosa vei Noa na Kalou, ka kaya, 16Mo lako tani e na waqa, o iko, kei na watimu, kei iratou na luvemu, kei na watidratou na luvemu, vata kei iko: 17mo kauta mai kei iko na ka bula kecega sa tiko kei iko mai na yavusa manumanu kecega, io na manumanu vuka, kei na manumanu e yavai va, kei na ka kecega sa qasi a ya sa dauqasi e dela i vuravura; me ra tubu vakalevu e vuravura, ka me luvea, ka lewe vuqa mai, e vuravura. 18A sa lako tani ko Noa, kei iratou vata kaya na luvena, kei na watina, kei na watidratou na luvena: 19a manumanu tawa lasa kecega, a ka kecega sa qasi, kei na manumanu vuka kecega, kei na ka kecega sa qasi e dela i vuravura, me vaka na nodra yavusa, era sa lako tani e na waqa.
20A sa cakava ko Noa e dua nai cabocabo-ni-soro vei Jiova; a sa taura e so vei ira kecega na manumanu e yavai va sa savasava, ka so vei ira na manumanu vuka kecega sa savasava, a sa cabora nai soro kama e na dela ni cabocabo-ni-soro. 21A sa boica nai boiboi ni veivinakati ko Jiova: a sa kaya e lomana ko Jiova, Sa dina ni sa ka ca e lawaca na loma ni tamata mai na nona cauravou; ia kaʼu na sega ga ni vakarusai vuravura tale e na vuku ni tamata: kaʼu na sega talega ni yavita tale na ka kecega sa bula, me vaka na ka kaʼu sa cakava oti: 22ni sa tiko ko vuravura, ena tawa mudu na vula i teitei kei na vula i kelikeli, kei na liliwa kei na katakata, kei na vula i katakata kei na vula i liliwa, kei na siga kei na bogi.
Atualmente selecionado:
Nai Vakatekivu 8: FIJ1864
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
First full Bible in the Fijian language © British and Foreign Bible Society, 1864.