Nai Vakatekivu 7
7
Sa curuma na waqa ko Noa, kei na nona mata-qali, kei na manumanu e so, ka bula, ni sa waluvu ko vuravura.
1A sa kaya vei Noa ko Jiova, Mo curu ki na waqa, ko iko kei na nomu lewe-ni-vale kecega; niʼu sa kunei iko ni ko sa yalododonu e mataqu e nai tabatamata o qo. 2Mo kauta vei iko na manumanu e yavai va sa savasava me yavitu, mai na yavusa kecega, na tagane kei na nona afewa; kei na manumanu e yavai va sa tawa savasava me yarua, mai na yavusa kecega, na tagane kei na nona alewa; 3a manumanu talega ni lomalagi me yavitu, mai na yavusa kecega, na tagane kei na alewa; me vakabula na nodra kawa e na dela i vuravura: 4ni sa vo walega na bogi e vitu, kaʼu na qai vakatauca tiko na uca ki vuravura me vasagavulu na siga ka vasagavulu na bogi; ia kaʼu na vakawabokotaka mai dela i vuravura na ka bula kecega kaʼu a cakava.
5A sa kitaka ko Noa me vaka na ka kecega sa vunautaka vua ko Jiova.
6A sa ono na drau na yabaki i Noa, ni sa ubia na vuravura na waluvu ni wai. 7A sa curuma na waqa ko Noa, kei iratou vata kaya na luvena tagane, kei na watina, kei na watidratou na luvena, e na vuku ni wai ni waluvu. 8A manumanu e yavai va sa savasava, kei na manumanu e yavai va sa tawa savasava, kei na manumanu vuka, kei na ka kecega sa qasi e dela i vuravura, e na nodra yavusa kecega, 9era sa curu ka yarua ki na waqa kivei Noa, na tagane kei na alewa, me vaka ka vunautaka vei Noa na Kalou. 10Ia ni sa oti na bogi e vitu, sa qai yaco na wai ni waluvu e dela i vuravura.
11E na kenai kaono na drau ni yabaki ni bula i Noa, e na kenai karua ni vula, e na kenai katinikavitu ni siga ni vula, io, e na siga dina ko ya, sa basuki mai kina na vurevure kecega ni wai titobu, a sa tadola nai sogo kei lomalagi. 12A sa tiko na uca e dela i vuravura ka vasagavulu na siga kei na bogi e vasagavulu. 13E na siga dina ko ya sa curuma na waqa ko Noa, kei Semi, kei Hami, kei Jefeca, na luve i Noa, kei na wati i Noa, kei iratou vata kei iratou na lewe tolu na watidratou na luvena. 14Ko iratou, kei na manumanu tawa lasa kecega e na nodra yavusa, kei na manumanu e yavai va kecega e na nodra yavusa, kei na ka kecega sa qasi e na nodra yavusa, a ya sa dauqasi e dela i vuravura, kei na manumanu vuka kecega e na nodra yavusa, io, na manumanu vuka e na yavusa kecega. 15A ra sa curu vei Noa ki na waqa ka yarua e na yavusa manumanu kecega, sa tiko kina na cegu me bula kina. 16Ia ko ira era curu kina era sa dua na tagane ka dua na alewa, e na yavusa manumanu kecega, ni ra curu kina, me vaka ka vunautaka vua eliu na Kalou: a sa sogota vua na waqa ko Jiova.
17A sa vasagavulu na siga ni sa tiko e dela i vuravura na waluvu; a sa vakalevutaki tiko na wai, a sa nawaca na waqa, a sa laveti cake mai dela i vuravura: 18a sa gumatua na wai, a sa vakalevutaki vakalevu e dela i vuravura; a sa lako voli e dela ni wai na waqa. 19A sa gumatua vakalevu sara na wai e dela i vuravura; a sa ubi na veiulu-ni-vanua cecere kecega sa tiko e ruku i lomalagi kecega. 20Sa gumatua na wai; a sa lako cake ka tolusagavulu na caga, ni sa ubi oti na veiulu-ni-vanua.
21A sa ciba na manumanu kecega sa yavala rawa e dela i vuravura, io na manumanu vuka, kei na manumanu e yavai va, kei na manumanu tawa lasa, kei na ka kecega sa qasi a ya sa dauqasi e vuravura, kei na tamata kecega: 22a ka kecega sa tiko e ucuna na cegu sa bula kina, kei na ka kecega sa tiko e na vanua mamaca, sa mate. 23Io sa rusa na ka bula kecega sa tiko e dela ni vanua, na tamata, kei na manumanu e yavai va, kei na ka sa qasi, kei na manumanu kei lomalagi, io sa rusa laivi mai na vuravura: a sa vo ko Noa duaduaga, kei ira era tiko vata kaya e na waqa. 24A sa gumatua tiko na wai e na dela i vuravura, ka dua na drau ka limasagavulu na bogi.
Atualmente selecionado:
Nai Vakatekivu 7: FIJ1864
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
First full Bible in the Fijian language © British and Foreign Bible Society, 1864.