Matié 13
13
Kual go kera go gesé gasa
(Mark 4:1–9; Luk 8:4–8)
1A duro wolé lé na, Jésu andong dong a gulong, ddi ’yé jomé dugo kebu tagu do tungu. 2Kalang ga yaué combu ’yé yaué gusi, ddi nai jom duro kuburo, kalang ga yaué combu ’eré kebu gung. 3Ddi yégé kual go kera ca henga combu, ddi yégé wa:
Sela, go gesé andong ca oré gesé. 4Kiddin ga ddi wa gesé gasa duro yagé goi na, gasa ga pena ba duro giyong, ceddung ’yé goldigé. 5Gasa ga pena ba ca gara, kiddin ga gesong cumba ’eno, kobegépadda ké gar cawa gesong nainya toigé ’eno. 6Kiddin ga teba ba andong ’erga dang na, ké lué cawa gaserégé wo ’eno 7Gasa ga pena ba duro tasi, tasi lé malgu nain suyomegé. 8Ama gasa ga pena ba ca gesong ga gur, ké bé caigé, ké si cindegé, ga pena aru bua, ga pena to jis bua, ga pena to subu bu’. 9Kardené Jésu yégé wa: Keng nia dang gesemegeng na, ga jageng ddara.
Jésu yé kualang kera cawa ga?
(Mark 4:10–12; Luk 8:9–10)
10Ga anjama ’yé gusu Jésu, ké ’engeri wa: Ji yégé kual dang kera cawa ga? 11Jésu jogu yégé wa: Keng na, ké begeng solé kual toi do mendem do Leu do dang ni kua, ama ké na, ké bigé solé to ’eno. 12Cawa kema goni goni goang henga na, ka bi cainé com, ddia lainyong dang henga combu, ama kema goni goni goang henga ’eno na, henga ga ddiang nagé henyé lé na, ka yégé kobi cong. 13’Enung yégé kual dang kera cawa ké wa solé, ama ké sela ’eno, ké wa jo, ama ké ja ’eno bua, ké sela to ’eno bu’. 14Henga lé la ca ser to kual go Esai go cogelé kebu go Kumu koi ba yé.
Keng jé ddar, ama keng ja toi ’eno,
Keng sol ddar, ama keng sela to ’eno.
15Cawa kalang lé ’eremé gogé bela todero,
Ké si bulo gesemégé,
Ké lebedé cindegé ca ka solang cindegé ’eno bua,
Ca ka joang gesemégé ’eno bua,
Ca ’eremé goga solé to ’eno bu’.
Kumu yé wa: Ka belang gusung ’eno ca ’enunga bigé labia.
16Ama keng na, keng danga gusu mowa cawa cindegeng wa solé bua, gesemegeng wa jo bu’. 17’Enung wa yogenga waldong wang: Ga cogelé kebu go Kumu koi dang kalang ga Kumu kai combu lé tabelang ca solé henga ga keng wa solegé, ama ké selagé ’eno bua, ca ka jo henga ga keng wa jogé, ama ké jagé ’eno bu’.
Jésu por kual go kera ca go gesé gasa
(Mark 4:13–20; Luk 8:11–15)
18Ga jageng kual go kera toi ca go gesé gasa. 19Kema goni goni goa jé kual go Leu do Kumu toi kua ma, ama ddi nia sela to ’eno na, ddi gené mainya gasa ga ba ba duro giyong kain, ama go Isini ’yé jeddugu henga ga ké na gesegé duro ddaindigé cong. 20Kalang ga pena gené mainya gasa ga ba ba ca gara kain, kobegépadda ké ’yé kual lé dang gusu mowa. 21Ama gaserei wo ’eno duro ddaindigé, ké ’yom gusugé wolé bbani, kiddin ga solé go kegero, kau gelé go cin sai ca kual go Kumu koi na, kobegépadda ké terinyang mengaigé. 22Kalang ga pena gené mainya gasa ga ba duro tasi kain, ké jé kual lé, ama tabelang do delinya tua dang kédi do laré toi suyom kual lé, ddi wa ’eno. 23Kalang ga pena gené mainya gasa ga ké ba gesegé ca gur kain, ké jé kual lé bua, ké jé toi bu’, ké bé caigé, ké si cindegé, ga pena aru bua, ga pena to jis bua, ga pena to subu bu’.
Kual go kera ca hademé ga isini
24Jésu ai kual go kera go ddang, ddi yégé wa: Leu do dang ni gené mainya kema go ba besen gasa ga ddari duro yagé goi kain. 25A duro soindo kiddin ga kalang woi kung na, kema lé koi go tebena ’yé besen baram duro kiji, ddi ddé gusi ’yé, 26Kiddin ga gasa ba malgu nain, ké bé caigé, kardené baram lé bé cai bu’. 27Bagulong lé marné gai ’yé yoi wa: Bagulong ni besena gasa ga ddari duro yagé goin lé bu’ ma, ama baram wo duroigé, ddi saga andi ga? 28Ddi jogu yégé wa: Kua, na kema go tebena lo henga lé wa. Marnei ’engeri wa: Ji dar ca ni ’era tura baram lé cong ga? 29Ama ddi jogu yégé wa: Na kain ’eno, kiddin ga keng ca toré baram na, keng da tor kiji daiang nai laiga. 30Ddagé ké ca’ malga bera wolé go walé gasa ba’, a kiddin lé na, ’enunga yégé kalang ga gié ga wa walé wa: Ga walagenga baram jua, ga saddiei ca ’ulai cong, kardené keng begang kiji duro tugulu doang.
Kual go kera ca laidong cindo
(Mark 4:30–32; Luk 13:18–19)
31Jésu ai kual go kera go ddang, ddi yégé wa: Leu do dang ni gené mainya laidong cindi do kema ba aio geso duro yagé goi. 32Cindoa karang nyém ddi gasa mam, ama kiddin ga to gar na, to malgu nain, to ddi gasem mam, to malgu belé main sia kain bbal ca ceddung ga dang ’yé nyané gulondigé kelia.
Kual go kera go ca subugu do céré toi
(Luk 13:20–21)
33Jésu yégé kual go kera go ddang, ddi yégé wa: Leu do dang ni gené mainya subugu do céré toi do tama ba aio debo cin keberang go duro ’engo do asé dura pena kain bera to sodu keberang lé mam.
Jésu yé kual mam danga kera
(Mark 4:33–34)
34Jésu yégé kalang ga yaué combu kual ca henga mam danga kera. 35Ddi yégé main kainya ca ser to kual go ga cogelé kebu go Kumu koi kogé go ba yé wa:
’Enunga yégé kual danga kera,
’Enunga dorgé kual go ké ba wosiang delinya tua do dibé din.
Jésu por kual go kera go baram koi toi
36Kardené Jésu ddé kalang ga yaué combu, ddi andong gulong. Kardené anjama gai ’yé gusi, ké ’engeri wa: Puroni kual go kera go baram go duro yagé lé koi toi. 37Jésu jogu yégé wa: Go besené gasa ga ddari na, na Kema Kurondi. 38Yagé na delinya, gasa ga ddari na kalang ga Leu do Kumu toi ka, ama baram na kalang ga go Isini kai. 39Go tebena go besené baram lé na, na Sidan, cagal na, na saman toa do karé, ga gié ga walé na, na kangiyong ga Kumu kai. 40Main ké ba walang baram bei cin tua kain na, da la main kain duro saman toa do karé bu’. 41Kema Kurondi da gi kangiyong gai, ka tor kalang mam ga aseré kalang duro isinwa bua, dang kalang ga isindong bu’ a duro Leu doi. 42Ka bégé cin tua do kurjo do hurddem, a kiddin lé na ka ’elé bua, ka yidié kegeigé bu’. 43Ama kardené ké ga kobé Kumu na, ka piong main teba kain a duro Leu do Baigé toi. Keng nia dang gesemageng na, ga jageng ddara.
Kual go kera ca lainyong go ba wosu
44Leu do dang ni gené mainya lainyong go ké ba wosi a duro yagé kain. Kema go pena wai lainyong lé, ddi wosi ddang, ddi ’yang gusu mowa ca kelé henga gai cong mam ca jogé kelé yagé lé.
Kual go kera go ca moin do beré
45Leu do dang ni gené mainya kema go oré ca cenegé ca daré moin do béré do ddari do ké ba tei perl. 46Kiddin ga ddi ba wai moin pena do kela combu na, ddi ’yé kelé henga gai cong mam, ddi kelo.
Kual go kera go ca lau
47Leu do dang ni gené mainya lau do ké ba cin tagu, to nyim gusa cindi kaindi kaindi. 48Kiddin ga toa won na, kalang ga ’uré sera kebu gung dang, ké jom dugo, ké par gusa go ddaderong, ké bégé duro gujurong, ké bé ga isindong cin kang. 49A duro saman do to do karé do delinya toa, na main kain rés bu’. Kangiyong da ’erga, ka gosindé kalang ga isindong dang kalang ga ddaderong, 50ca begégé cin tua do kurjo do hurddem. A kiddin lé na, ka ’elé bua, ka yidié kégeigé bu’.
Lainyong go herua dang go ddegeli
51Jésu ’engergé wa: Keng jé kual lé toi mam ga? Ké jogu yei wa ’I. 52Kardené ddi yégé wa: Kalang ga gelé so go Kumu koi ga belé anjama ga Leu do dang ni na, ké gené mainya gulong bagulondi go ddoderé henga ga herua dang henga ga ddegeli, a duro kiddin gai ga ddogé lainyong goi kain.
Ga Nasarat bu cindi ca Jésu ’eno
(Mark 6:1–6; Luk 4:16–30)
53Kiddin ga Jésu ba ka kual go kera lé na, ddi sai a kiddin lé. 54Ddi ’yé gulong go gumu go ddi ba malgu kené, ddi osum gel kalang a duro kulu go yaué go Juib kogé, ké mam ga a kené sol kagelokemo, ké yé wa: Kema lé kua wai narua do kain la andi ga? Na mena ma ddi lé gié go dono go kagelokemo go main kain ga? 55Ddi nia go habelé lé kurondi ’eno ga? Maram nia ’yoi ’eno ga? Jak kang Josép, kang Simon, dang Judé, ka nia karmei ’eno ga? 56Karmei ga kandu mam kau, ké nia woié duroina kua ’eno ga? Kema lé wai dono lé kua mam na andi ga? 57Na ca ma ké kain bo cindi cai cong. Kardené Jésu yégé wa: Kalang mam bu go cogelé kebu go Kumu koia hormo, ama a tai duro kalndi na, ddi go wo hormo ’eno. 58Jésu la gié go dono go kagelokemo duroiga nain ’eno ca ké bu cindi cai ’eno.
Atualmente selecionado:
Matié 13: TNG1978
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© Alliance biblique universelle (United Bible Societies) 1978.