M. Mattayo 10
10
1LOMBA eliitira asambili ŵake kumi na aŵiri, eŵapa vizo pa mizimu ya lunsa vyoifumya nopozya ntenda zyonse na kulwala konse.
2Lomba mazina a apostolo ŵala kumi na aŵiri ni aŵa: Wotatika ni Simoni woitiwa Petro, na Andreya mkwaŵo; Yakobo mwana wa Zebedayo, na Yohana mkwaŵo; 3Filipo na Bartolomayo; Tomaso na Mattayo wamsonko; Yakobo mwana wa Alifayo, na Taddayo; 4Simoni Mkanane, na Yuda Iskariote wamene uyo soti emvumbula. 5Aŵa kumi na aŵiri Yesu eŵasuzula, eŵachimula echiti,
Msaya ku njira ya Mitundu, na pa munzi uli wonse wa Asamariya msaloŵapo: 6sembe ngakongako nkoyani ku mbelele zyotaika zya mchiŵanza cha Israeli. 7Pamene mkausyakuya ŵirizyani kuti, Ufumu wa kumulu wafwindikizya. 8Pozyani ŵolwala, usyani akufwa, sukani a manzonzo, fumyani viŵanda: mwipoka chatyala, ipani chatyala. 9Msaliulila ndalama isweta kano ituŵa, kano mkuŵa, mvibeti vyanu; 10chukanga nkomwa ya pa njira yai, kano minjira iŵiri, kano nkwaŵilo, kano muŵango: pakuti wamulimo owamila nkana zyake. 11Mu mzinda uli wonse kano mmunzi mkaloŵamo mkonsinshe ni ŵani alimo wowamila; nipo iswani mulamwa mpaka pamti mfumemo. 12Poloŵa umo mnanda mwilonjere. 13Kati nanda ni yowamila mtendere wanu nauizile: sembe kati nte yowamila mtendere wanu uwerere kwanu. 14Soti wamene uyo ati akanompokelelani kano kusamvwila malizu ŵanu, pamene apo mkaperofuma mnanda iyo kano mu mzinda uyo kunkumulani lukungu la pa makasa ŵanu. 15Lezee numuuzyani, Ula mlandu wa charo cha Sodoma na Gomorra nteuti uzokule pa siku lopingula nga ni mlandu wa munzi ulawa.
16Ŵonani, numsuzulani nga ni mbele pakati pa mimbulu: chikomo choteti iŵani akucha nga ni njoka na ŵotekanya mitima nga ni nkunda. 17Lomba chenjerani na ŵantu: pakuti azamguguzileni kwa akuru a milandu, na mmasunagoge ŵaŵo azamkwapuleni; 18inde, kwa akatembwe na ku mafumu muze muuliwe mlandu wa neo, kuŵa untoni kwa ŵeve na ku Mitundu. 19Sembe pamene akazomguguzani msachita tupwe lakuti mkalaŵire chinji kano syani: pakuti mukapewe nsita ila icho chimti mnene. 20Chifukwa mulaŵira nti mweo, sembe Mzimu wa Ausu wanu ni olaŵira mwanu. 21Nipo mkwaŵo azamvumbule mkwaŵo ku imfwa, na awisi mwana wake: naŵo ŵana azaŵasusye oŵavyala noŵapaisya. 22Namwe mze mtinkiwe na ŵantu ŵonse chifukwa cha zina langu: sembe wamene okoselela mpaka kumpezyo uyo azapuzumushiwe. 23Apo akampitikisyani mmunzi uyu utukirani mu uyake: pakuti lezee numnenelani, Ntemti msilozeŵenta mminzi yonse ya Israeli, mpaka pati awere Mwana wa muntu.
24Msambili sopula msambizi wake, kano kapolo kupulu asikuru wake. 25Ni chokumana ku msambili kuti aŵe nga ni msambizi wake, na ku kapolo nga ni asikuru wake. Kati emteya mwine wa ng'anda Beelzebule, nga kwenekwene enemsumba ŵake! 26Teti msaŵayopa: pakuti palive kantu kevwinikiliwa kamene kati kakane kuzovundululiwa; kano kefisika kamene kati kakane kuzoziŵikwa. 27Icho chinumuuzyani pa mfinzi mchinene apo poŵala: icho soti chimkumvwa mmatu mchiŵirizye pa mitenje ya mang'anda. 28Msaŵayopa amene ŵala oupaya muŵili, sembe mzimu ntangaupaye: sembe ngakongako muyopeni wamene oziŵocheneka mgehenna mzimu na muŵili kumo. 29Mwati nti mpeta ziŵiri zusitiwa kakobiri kamo? imo ya izyo siiti iwe pansi paliye Ausu wanu: 30sembe sisi lonse la mmutu wanu lupendewa. 31Teti msayopa; mweo mupula mpeta zinyinji. 32Chifukwa choteti ali wonse ati anizomere neo pa menso pa ŵantu, nane soti nikamzomere pa menso pa Ŵata ŵangu wa kumulu. 33Sembe ali wonse ati anikane neo pa menso pa ŵantu, nane soti nikamkane pa menso pa Ŵata ŵangu wa kumulu.
34Msalinga kuti nichizopoza mtendere pa charo: nichizopoza mtendere lini, sembe chinkalammanja! 35Pakuti nichizolumanya muntu na awisi, na mwana mwanakazi na anyina, na mmikazi na nyavyalawake; 36nipo ŵopatana naye muntu azaŵe a mchiŵanza chake mwine. 37Wamene otemwa awisi kano anyina kupula neo ntoniwamila neo; naye wamene otemwa mwana mwanalume kano mwana mwanakazi kupula neo ntoniwamila neo. 38Wamene asaula msalaba wake nokonkana nane ntoniwamila neo. 39Wamene ofwanga moyo wake azautaye; na wamene otaya moyo wake pa mutu pangu azaufwange wamene ula.
40Wamene ompokelelani mweo onipokelela neo, na wamene onipokelela neo ompokelela uyo enituma neo. 41Wamene opokelela muŵirizi mzina la muŵirizi azalondere chilambu cha muŵirizi: na wamene opokelela muntu wolungama mzina la muntu wolungama azalondere chilambu cha muntu wolungama. 42Soti ali wonse ati amwenshe umo wa atonto aŵa ntumo ya manzi amyelele yeka, mzina la msambili, lezee numnenelani kuti wamene uyo nteati ataye peka patonto chilambu chake.
Atualmente selecionado:
M. Mattayo 10: MA23
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Mapangano Alomba © Bible Society of Zambia, 1923.