M. Mattayo 11
11
1NIPO yenzepo akati sile Yesu kwapanga asambili ŵake kumi na aŵiri efumako kwamene uko kuyosambizya noŵirizya mminzi yaŵo.
2Lomba Yohana akamvwe mkambolimboli milimo ya Kristo uyo, etumizya malizu na asambili ŵake emnenera, 3Kansi nimwe uyo akuza, kano tilolere muyake? 4Nipo Yesu eyasuka echiti kwaŵo, Nkoyani mkamuuzye Yohana vyamene vimkumvwa noviŵona: 5mpofu zupoka kulola kwa zine, na ŵopintya oyendayenda, na a manzonzo osukiwa, na ŵotulika matu akumvwa, na akufwa ozyushiwa, na kwa akavu uŵirizyiwa utumi uweme. 6Ana shuko ali wonse ati akanopilingishiwa pali neo. 7Nipo aŵa penzekuya Yesu eyambonena na maumba zya Yohana, Pamchiya ku malambo mchiyoŵonanji? tete lenzosung'unzika na mpepo kansi? 8Nga pamchiya mchiyoŵonanji? muntu ovwala zya limpinti kansi? Ŵonani, aŵo ovwala zya limpinti ali mmang'anda a ufumu. 9Nga mweo mwifumiranji? kuyoŵona muŵirizi? Inde, numuuzyani ni woperemera ngako muŵirizi. 10Uyu ni yeve wizilembewera zyake zyakuti,
Ŵona, nuitanguzya nkalamba yangu pa menso pako,
Iyo iti ize isalazye njira yako pantanzi pako.
11Lezee numnenelani, Mwa aŵo ovyalikwa na anakazi muliyoima mkuru kupula Yohana Mbatizi: sembe wamene ali mtonto pofumu wa kumulu ni mkuru kumpula yeve. 12Chitatikile nsita zya Yohana Mbatizi kuza na lero ufumu wa kumulu uuliwa na mantunya, na ŵantu a mantunya oukatila na mpamvu. 13Pakuti aŵirizi ŵonse na dango elosya kuza na kwa Yohana. 14Kati muzomera kupokera, uyu ni Eriya, wamene akuza. 15Wamene ana matu akumvwa naamvwe. 16Kansi neo nipalanye na chinji luko ulu? Lupalana na tuŵana tunkala pa luŵanza lositirapo, uto tuŵaita ayaŵo 17tukuti, Tamlizizyani vinonje, namwe muliyovina; tambuma, namwe muliyokunta pa vifuŵa. 18Pakuti echiza Yohana wosalya na wosamwa, naŵo akuti, Ana chiŵanda. 19Echiza Mwana wa muntu wakulya na kumwa, naŵo akuti, Ŵonani, muntu wa dyera na chikungu cha vinyu, chiuza cha amsonko na ŵoponta! Nzeru yuŵoneka yolungama na vyochita vya ine.
20Pamene apo etatika kwifyangila minzi iyo ichitiwamo vyampamvu vyake vinyinji, chikomo iliyoyaruke. 21Shamo kwako, Korazini! shamo kwako, Betsaida! pakuti vyampamvu ivyo vichitiwa muli mweo vingati vichitiwa mTuro na mSidoni, sembe eyaruka kalekale mgudulu na mlito la paziko. 22Sembe neo numnenelani kuti mlandu ula wa Turo na wa Sidoni pa siku lopingula nteuti uzokule nga ni wanu mweo. 23Nawe, Kapernaumi, uzoimyiwe kansi mpaka kumulu? uzosike mpaka mu Hade: pakuti vyampamvu ivyo vichitiwa muli weo vingati vichitiwa mSodoma, sembe ni msimbanyoto kuza na lero. 24Neo numnenelani kuti mlandu ula wa charo cha Sodoma pa siku lopingula nteuti uzokule nga ni wako weo.
25Pa nsita ila Yesu elaŵira echiti, Numlumbani, Ŵata, Mwine wa kumulu na pansi, pemwivifisa ivi kwa anzeru na ku ng'anga, namwe mwivivundululira ku malucheche: 26inde, Ŵata, pakuti choteti chenze chotemwesya pa menso panu. 27Vyonse vipelekewa kuli neo na Ŵata ŵangu: paliye muntu omziŵa Mwana, Ŵata niye; soti paliye omziŵa Ŵata sembe Mwana yeka, na uyo wakutemwa Mwana kumvundululira. 28Izani kwangu, monse mwaŵovupa nolemelwa, nane nakumpumuzyani. 29Lutwaleni mweo lupanda lwangu, mulisambizye kwangu; pakuti neo nne wosisikanya na wolisisya mtima: namwe muze mfwange chipumulo cha mizimu yanu. 30Chikomo lupanda lwangu ni losatina, na mtolo wangu ni wopepuka.
Atualmente selecionado:
M. Mattayo 11: MA23
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Mapangano Alomba © Bible Society of Zambia, 1923.