यूहना 21
21
तिबिरियास झील गै किनारै चेला पर परगट होणो
1आं बाता गै बाद यीसू अपणै आपनै तिबिरियास झील गै किनारै चेला पर ईं रीति ऊं परगट करयो। 2समौन पतरस अर थोमा झिको दिदुमुस कुहावंतो हो अर गलील गै काना नगर गो नतनएल अर जबदी गा बेटा अर चेला मू दो ओर जणा भेळा हा। 3जद समौन पतरस बानै केयो, “मैं मछली पकड़णै जाण लागरयो हूं।” बां बिनै केयो, “म्हे बी तेरै सागै चालांगा।” अर बे बिंगै सागै चाल पड़या अर किस्ती में चढग्या। पण बिं रात कीं कोनी पकड़यो।
4अर दिन उगग्यो जद यीसू किनारै पर आ'गे खड़यो होयो। पण चेला कोनी पिछाण सक्या कै बो यीसू है। 5फेर यीसू बानै पूछयो, “भाईयो थारै कनै कोई मछली है।” बां उतर दियो, “कोनी।” 6फेर बण केयो, “दाहिणै पासै जाळ फेंको तो थानै कीं मिलैगो। जद बां जाळ फेंक्यो तो भोत सारी मछलियां गै कारण जाळ पाछो खींच कोनी सक्या।” 7फेर यीसू गै प्यारै चेलै पतरस नै केयो, “ओ तो प्रभु है।” जद समौन ओ सुण्यो कै ओ प्रभु है तो बण आपगा उपर गा गाबा पेर लिया क्यूंकै उपर गा गाबा खोलेड़ा हा। अर पाणी में छाळ मार दी। 8पण दूसरा चेला मछलियां ऊं भरेड़ो जाल खींचता होया किस्ती नै किनारै पर ले आया क्यूंकै बे किनारै ऊं लगभग सौ मीटर दूर हा। 9जद बे किनारै पर उतरया तो बां कोयलै गी आग पर रोटी अर मछली रखेड़ी देखी।
10यीसू बानै केयो, “झिकी मछलियां थे अब पकड़ी है बामू कीं इनै ले आओ।” 11फेर समौन पतरस किस्ती पर गेयो अर एकसो तरेपन मोटी मछलियां ऊं भरेड़ो जाळ किनारै पर खिंचयो, जाळ में इती जादा मछलियां ही फेर बी जाळ पाटयो कोनी। 12यीसू चेला नै केयो, “आओ, रोटी खावो।” चेला मू बिनै कोई कोनी पूछ सक्यो कै तूं कुण है? क्यूंकै बे जाणै हा कै ओ प्रभु ई है। 13फेर यीसू आ'गे बानै रोटी अर मछलियां दे दी। 14इंया तीसरी बारी होयो कै यीसू मरया मू जी उठण गै बाद चेला नै दिख्यो।
यीसू अर पतरस
15जद बां रोटी खा ली तो यीसू समौन पतरस नै केयो, “यूहना गा बेटा समौन, जितो प्रेम ऐ मेरूं करै है, तूं मेरूं बिंऊं ई जादा प्रेम करै है।” पतरस यीसू नै केयो, “हा, प्रभु थे जाणो है कै मैं तेरूं प्रेम करूं हूं।” यीसू पतरस नै केयो, “झिका मेरै मेमणिया गी तरियां है बांगी रुख्वाळी कर।”
16यीसू बिनै फेर केयो, “यूहना गा बेटा समौन, के तूं मनै प्रेम करै है?” पतरस यीसू नै केयो, “हा प्रभु थे जाणो हो मैं थारूं प्रेम करूं हूं।” यीसू पतरस नै केयो, “झिका मेरै भेड़ा गी तरियां है बांगी रुख्वाळी कर।”
17यीसू फेर तीसर पतरस नै केयो, “यूहना गा बेटा समौन, के तूं मनै प्रेम करै है?” पतरस भोत दुखी होयो कै यीसू तीसर बिनै पूछयो है कै तू मनै प्रेम करै है? अर पतरस यीसू नै केयो, “हे प्रभु, थे सारो कीं जाणो हो मैं थारूं प्रेम करूं हूं।” यीसू पतरस नै केयो, “झिका मेरै भेड़ा गी तरियां है बांगी रुख्वाळी कर।” 18मैं तनै साची साची केऊं जद तूं जवान हो तो आपगी कड़तू बांदगे जठै तेरो जी करतो तूं उड़ जावंतो हो पण जद तूं बुढो हो जावैगो तो आपगा हात लम्बा कर'गे अर कोई दूसरो तेरी कड़तू बांदगे जठै तूं कोनी जाणो चावै तनै बठै ले जावैगो। 19बण आ बात समझाण खातर कैई कै पतरस किसी मोत ऊं परमेसर गी बडाई करैगो। इतो केगे यीसू बिनै केयो, “मेरै लारै चालतो रे।”
यीसू अर प्यारो चेलो
20पतरस लारै मुड़यो अर देख्यो कै बो चेलो झिकै नै यीसू प्रेम करतो हो बिंगै लारै आण लागरयो है। ओ बो ई हो झिकै रोटी खावंता टेम बिंगी छाती पर झुकगे पूछयो हो, “हे प्रभु बो कुण है, झिको तनै धोखै ऊं पकड़वावैगो।” 21जद बिनै देखगे पतरस यीसू नै केयो, “हे प्रभु, इंगो के हाल होवैगो?”
22यीसू बिनै केयो, “जे मैं चावूं कै जद तांई मैं आऊं ओ अठै रेवै तो इमै तेरो कीं लेणो देणो कोनी है। पण तूं मेरै लारै चालतो रे।” 23यीसू आ बात कैई, ईंखातर बिस्वासी लोगां में आ बात फेलगी कै बो चेलो कदी कोनी मरैगो। पण यीसू बिनै इंया कोनी केयो हो ओ कोनी मरैगो। पण बिनै केयो हो कै, “मेरै पाछो आण तांई ओ अठै रेवै आ मेरी इच्छा है तो तनै इमै के?”
24ओ बो ई चेलो हो झिको आं बाता गी गवाई देवै है अर झिकै ऐ बात लिखी है अर म्हे जाणा हां कै बिंगी बाता सच्ची है।
25यीसू ओर बी भोत सारा काम करया झिका ईं किताब में लिख्या कोनी। जे बां सारा नै एक एक कर'गे लिख्या जावंता तो भोत किताबा बण जावंती। अर मैं समझूं हूं इती किताबा बण जावंती कै बानै रखण खातर ईं संसार में जिग्यां ना होवंती।
Atualmente selecionado:
यूहना 21: BGQ
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2023 (Active), Wycliffe Bible Translators, Inc. All rights reserved. © WIn Publishing Trust