ดอ โฆว 2
2
ลอง ซีแง ดีเหลา
1ปาย ตี ปี โบง เฌาพรา แฮะ ฮอต ฮอต โตต. บอ ฆางหราว บอ กาดาย บอ ดอน โมยว อี กอย แดง กาดาย แฮะ ฮอต ฮอต โตต. 2วาย อัน ตี ดอ ฌัม ซีแง อึณบู, เฌาพรา ดีเหลา, ตู โบง มาเซ. 3ซีแง อึณบู ตี, เฌาพรา ม็องการา ดัว, แตห ซีแง ตี วี แบน ซีแง บอด. โคว, ซีแง อึณบู ตี มูห ซีแง แปะ แฮะ ดีเหลา เฌาพรา วาย แฮะ ฮอต อัน โบง เบลห โตต ดอน โมยว อี มึห แดง กาดาย.
ลอง เฌาพรา โบง เบลห ดูอี
4ดอ ตี นี อึณ ดี วี กาลาง ลอง อี ปาย ดี โบว แบน ฆางหราว บอ กาดาย ตี บอ ลอง อาคราว แปะ แฮะ โบง เบลห เฌาพรา ฌึร ตี ดอน โมยว.
5ดอ อัน ตี หณัม มึห เปต อี ลัต แดง กาดาย. อึณ มืร หณัม มึห เดา โมยว เหมา อี ลัต แดง กาดาย. อึณ หณัม มึห ฌึร ตี โคว, เฌาพรา หณัม แตห อึณ มึห ฆลาย แดง กาดาย. อึณ มืร หณัม มึห ดูอี อี รัณ มาน เฆ นา. 6ดอ อัน ตี อึณ ยี มึห อึม อี กอย ครึม กาดาย. อึม ตี มืร โฮะ นา แดง, แตห กาดาย หณอด อึม. 7แฮะ ฮอต ปัน ตี เฌาพรา มืร โบง ดูอี. อัน ดึห กาดาย, โบง อารึบ ดูอี. แฮะ ฮอต, อัน ฮึห พึอม อัน แตห อึณ ลึบ แคง ฆูงมูห อารึบ ตี. ปาย ตี อัน เฌา แตห อารึบ ตี มึห อาซาก.
8เฌาพรา มืร โบง กาปึม, ซัม แบน โมยว แบน โมยว. กาปึม ตี, อึณ กอย บลาก นา เลห ซีแง มืง เอเดน. เฌาพรา มืร แตห ดูอี แปะ แฮะ โบง อัน กอย แคง กาปึม ตี. 9อัน เฌา มืร แตห เฮ แบน โมยว แบน โมยว ลัต แคง กาปึม ตี. เฮ เฆ ตี อึณ ยอด ชีด ยอด ดาคึย. เบล ดอน โมยว ดี เฮ ตี บอ ซีแงห, หมึอม โฮม. อึณ บอ มึห เฮ อู กาดัง อี ดัว อาซาก ดี อี. บอ เฮ ปอ อู กาดัง อี แตห อี นับ ดี กาย็อห อี หมึอม อี ตู หมึอม. เฮ อา กาดัง ตี กอย ดี กาแต กาปึม ตึอน.
10แคง กาปึม เอเดน ตี, อึณ มืร มึห โตห อึม ตาง อี เลห แคง กาดาย, แตห อึณ บีน เดา อี ลัต ดอน โมยว แคง กาปึม. แฮะ ฮอต, โตห อึม ตี วี กาย็อห แบน พวน แบลง. 11แบลง อู ณ็อง จืร อึม พีซอน. แบลง ตี ฮาว โรบ มืง ฮาวีลัะ. แคง มืง ตี มึห ครีว. 12ครีว แคง มืง ฮาวีลัะ ตึอน แฮะ ง็อห ตาง. แคง มืง ตี อึณ มืร มึห กาณัน เฮ เบดาโลง บอ แซณ ว็อง ลูย. 13แบลง อึม ปอ อู ณ็อง, อัน จืร แบลง ฆีโฮน. อัน แหล ฮาว นา เรต มืง กูซา บอ มืง. 14แบลง อึม ฮาโอย, อัน จืร แบลง ฮีแดก. แบลง ตี แหล ฮาว นา เลห ซีแง มืง อาซูรา. แบลง อึม อึณพวน, อัน จืร อูพาราด.
15ปัน ตี เฌาพรา แตห ดูอี กอย แคง กาปึม เอเดน ตึอน. อัน จัร ดูอี, แตห อัน รัณ ฆาน แคง กาปึม บอ บัร กาปึม ตี. 16เฌาพรา มืร ดัม ดูอี ต็อห, “แคะ กอย เฮ แคง กาปึม นี, แม ปึอน โฮม เบล อัน. 17อึณ ยี มูห เฮ อี แตห อี นับ ดี กาย็อห อี หมึอม ฆาย อี ตู หมึอม. เบล เฮ ตี, แม ตู ปึอน โฮม. เซ แม ฮี โฮม ซีแง เหมา, แม ดี บอ ยัม.”
18วาย อัน ตี เฌาพรา ต็อห, “เซ ดูอี กอย อัน อู วี, อาว หมึอม ดี อัน. โอว ดี โบง แตห อึณ มึห อี จอย อัน.”
19เฌาพรา มืร แฮะ ดึห กาดาย, โบง แตห อึณ มึห โดว ซัดดาวา ดอน โมยว อี กอย แคง แปร บอ เฆ มาซีม อี กอย แคง เบลณ. อัน เฌา มืร ตึย โดว เฆ ตี, แตห เฆ ตัห โดง กอย ดูอี, เฌาพรา มืร ยอด, เหมา ดูอี ตึอน ดี ปาย ดี ดาง จืร ดี โดว ซัดดาวา เฆ ตี. ดูอี ตึอน บอ แตห จืร โมยว เหมา, อา ตี วี แบน จืร เฆ เซเซ. 20ปาย ตี ดูอี ตึอน วี ดาง จืร ดี โดว ซัดดาวา ดอน โมยว, บอ ดี มาซีม อี กอย แคง เบลณ บอ ดี โดว ซัดดาวา ดอน โมยว อี กอย ดอน นา ดอน โปละ, อัน ดาง จืร ดี โมยว เหมา โมยว อัน. มาแล, แคง โดว ซัดดาวา เฆ ตี ยี ตู มึห อาเซ อี ปึอน จอย ดูอี อี จืร อาดาม.
21วาย อัน ตี เฌาพรา แตห อาดาม มึห น็อห ซี อีด, แตห อัน อีด ปีว. ปัน ตี อัน เฌา มืร ดึห เลห กาอาง เบรต อัน อู ณ็อง. แฮะ ฮอต, อัน วี ดึห ยัง อัน, กาบีด เบรต อัน ตึอน. 22เฌาพรา มืร ดึห กาอาง เบรต แปะ แฮะ ดึห อัน แคง โดว อาดาม ตึอน. อัน มืร โบง แตห อึณ แบน อีบึณ. แฮะ ฮอต อัน วี ดึห อีบึณ ตี, ดัว ดี อีมาย.
23อีมาย ยี ต็อห, “อาตี แฮะ มูห กาอาง อี แฮะ กอย แคง กาอาง โอว. อึณ มืร มูห ยัง อี แฮะ ดึอม กอย แคง ยัง โอว. โคว, อัน เฌา แฮะ ดึห เลห อัน แคง โดว อีมาย. โอว ดี แตห อัน จืร อีบึณ.”#2:23 โฆรห ‘อีบึณ’ ฆาย โฆรห ‘อีมาย’ แคง โฆรห แฮแบร, ฆาย ลาย กาซู 24โคว อัน ตี, อีมาย ดี เลห ตัะ ฆูณ มา อัน, แตห อัน โดบ อีบึณ อัน. ฆาย มืร ดี แบน ปี ดูอี อู วี, ปี ยัง อู โมยว.
25ดอ อัน ตี ฆาย อา วี แฮะ กอย โดว ฆลัะ, บอ อีบึณ บอ อีมาย. ฆาย ยี ตู ซาย.
Atualmente selecionado:
ดอ โฆว 2: pce
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2021, Wycliffe Bible Translator, Inc. All rights reserved.