ดอ โฆว 3
3
ลอง ดูอี กาจูห ดี โบง หมาบ
1แคะ มึห เฆ โดว ซัดดาวา แปะ แฮะ โบง เฌาพรา, อึณ มืร มึห มาฮัณ, อัน หล็อก หลึอม โดว เฮา ดอน โมยว. มาฮัณ ตี วี ตัห โดง กอย อีบึณ, กาลาง โฆรห ดี อีบึณ. อัน ดีหมอด ต็อห, “แฮะ หมาน, เฌาพรา ตู แตห บาย โฮม เบล เฮ ดอน โมยว แคง กาปึม นี?”
2อีบึณ วี ต็อห, “เฌาพรา แฮะ แตห ยาย โฮม เบล ดอน โมยว. 3ยี มึห เฮ อู กาดัง ดี กาแต กาปึม ตี. อัน เฌา แฮะ ต็อห, ‘บาย แกวะ โฮม เบล ตี, บาย มืร แกวะ ปา, โยว บาย ยัม.’”
4มาฮัณ ตึอน วี ต็อห, “อาว มูห ปาย ตี. บาย ตู โลว ยัม. 5เฌาพรา แฮะ นับ, เซ บาย โฮม เบล ตี, อึณ ดี ลึห ดี บาย. บาย ดี บอ แบน ปี อัน เฌา. ปาย ตี บาย ดี บอ นับ อี หมึอม, อี ตู หมึอม.”
6ปัน ตี อีบึณ บอ ยอด, อัน มืร ยึร เบล ตี แฮะ ชีด, แฮะ หมึอม โฮม บอ แตห อัน กอ นับ โตต ดอน โมยว. อัน มืร ดึห โฮม เบล ตี. อัน แฮะ ฮอต โฮม, อัน วี ดัว บอ อีมาย อัน โฮม. 7ฆาย อา วี แฮะ ฮอต โฮม เบล ตี, อึณ บอ ลึห ดี ฆาย อู เฌณ. ฆาย บอ นับ, ฆาย แฮะ ฆลัะ. อึณ มืร มึห เฮ ดีปู. ฆาย ดึห หลา เฮ ตี, จีณ แตห อึณ กาดัห โดว ฆาย.
8บอ ฌัม วาย โฮม, เฌาพรา มืร ฮาว วีน ดี แล แคง กาปึม. ฆาย อีมาย อีบึณ ตึอน ยี ยึร ฆรัณ อัน เฌา ตี, ฆาย อา วี วี เครียง โดว ฆาย แคง นัง เฮ แคง กาปึม ตึอน, แกวะ แตห เฌาพรา ยึร ฆาย. 9เฌาพรา ยี แดะ ฆาย. อัน ต็อห, “อึย, เหมา บาย กอย?”
10ดูอี ตึอน วี ย็อห ต็อห, “ดอ ยึร โอว ฆรัณ แม เฌา แคง กาปึม, โอว บอ โยว. โคว, โอว แฮะ ฆลัะ. โอว บอ ฮาว เครียง โอว.”
11เฌาพรา วี ดีหมอด ต็อห, “อาเซ แฮะ ต็อห, แม แฮะ ฆลัะ? แม แฮะ โฮม เบล ปี ต็อห โอว, แกวะ โฮม?”
12ปัน ตี ดูอี ตึอน วี ต็อห, “อีบึณ ปี ดัว แม ดี โอว แตห อัน แบน อี จอย โอว, อัน แฮะ ดัว โอว โฮม. โอว บอ โฮม.”
13เฌาพรา วี ต็อห ดี อีบึณ, “มาเซ ปี โบง แม?” อีบึณ วี ต็อห, “ฮัณ แฮะ กาโลว โอว, แฮะ ฮอต โอว บอ โฮม.”
14วาย อัน ตี เฌาพรา วี กาลาง ดี มาฮัณ. อัน ต็อห,
“โกบ โบง แม ปาย ตี โอว ดืง แม ฮัณ ดอ ตี นี. แคะ กอย เฆ โดว ซัดดาวา แดง กาดาย, แม ฮัณ อู โมยว อาว หมึอม. แตห แม หลัน หลีน, ฮาว แดง วัต แม.
15โอว ดี แตห แม ฮัณ แบน รันซู อีบึณ, แตห บาย ลาย ฌ็อง เซเซ. ฆอน อาโมยว แม บอ ฆอน อาโมยว อีบึณ ตึอน, ฆาย ดี ลาย กาโฆห.
ฆอน อีบึณ ตึอน ดี กาตีห ฆีณ แม. แม ยี ดี โฌะ คาหนูต อัน.”
16แฮะ ฮอต, อัน เฌา วี กาลาง ดี อีบึณ ตึอน ต็อห, “โอว ดี แตห แม คัม ดูก ดอ แด แม บาดีก ซันเท. ปัน ดี ฆอน แม, แม ดี คัม เซา กาเซา. ปี บอ แฮะ ปาย ตี แม แนะ อี ซี ปึอน อีมาย. อัน ดี อึบ แม.”
17แฮะ ฮอต, เฌาพรา วี กาลาง โฆรห ดี อีมาย ตึอน อี จืร อาดาม. อัน ต็อห, “แม แฮะ ฮอต โทม โฆรห อีบึณ แม. แม มืร แฮะ ฮอต โฮม เบล เฮ ปี ตู แตห โอว บาย โฮม. โคว อัน ตี, โอว วี ดืง กาดาย ปี โลว รัณ แม. โกบ แฮะ โบง แม หมาบ ตี, แม ดี โลว คัม ดูก บอ กาดูห ดี โบง มาน กืน ฌัม โตต อาซาก แม. แม โลว รัณ ฆาน กาเซา, แม กอ ดี มึห ปี ดี โฮม.
18แตห มาอาต มึห กืน แคง นา แคง มาน แม. ดีหมูห แม กอ ดีลาต, แม กอ ดี ปึอน ดี โฮม.
19แม โลว รัณ ฆาน, แตห อึณ กอ โตต อาซาก แม. แฮะ ฮอต, แม ดี วี แบน กาดาย ปี ดึอม ตา โอว ดอ โบง เบลห โอว ดี แม. ดอ โฆว อัน, โดว แม แฮะ มูห กาดาย. โคว, แม ดี วี แบน กาดาย ปี บรีม.”
20อาดาม ตึอน ดาง อีบึณ อัน จืร นาง เอวา. นาง เอวา ตึอน แบน มา ดัง ดูอี อี กอย แดง กาดาย. จืร อัน เลห ซีเพา ปาย ตี. 21วาย อัน ตี เฌาพรา มืร ดึห ฮูน โดว ซัดดาวา, โบง ครึง ปี ดี ตา, ดัว ดี อีมาย ฆาย อีบึณ. 22เฌาพรา มืร ต็อห, “ยอด, ดูอี แฮะ แบน ปี โอว. ฆาย แฮะ ฮอต นับ อี หมึอม, อี ตู หมึอม. ดอ ตี นี, โยว ฆาย ดี บอ ดึห โฮม เบล เฮ อี ดัว อาซาก ดี อี. เซ ฮี ปาย ตี ดูอี ดี บอ อีม เซเซ.” 23โคว, เฌาพรา มืร โฮว ฆาย เลห แคง กาปึม เอเดน ตึอน, แตห ฆาย รัณ นา เฆ มาน ดี กาดาย ปี ดึอม ดึห เฌาพรา ดอ โบง อัน ดูอี. 24เฌาพรา แฮะ ฮอต โฮว เลห ฆาย แคง กาปึม ตึอน, อัน จัร เฆ อามู อามาด เฌาพรา อี จืร เครูบ, แตห เฆ กอย นา เลห ซีแง. เฌาพรา บอ เบลห บอ มาปัวะ ลาง อัน ดี ตี. มาปัวะ ลาง ตี อึณ ปี เงา. อึณ ปี บอ ปลัะ อึณเปลต. ปาย ตี เฌาพรา แตห เฆ บัร เฮ อี ดัว อาซาก, แกวะ แตห อี ปึอน ดี ฮาว โดง กอย เฮ ตี.
Atualmente selecionado:
ดอ โฆว 3: pce
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2021, Wycliffe Bible Translator, Inc. All rights reserved.