Panagnaan 39
39
Si Yusup ka nda si Potipal
1Na balik ta pa jaman si Yusup bay binoo pa Ejip meꞌ siga padadagang bangsa Ismail, lay pinaballihan pa mman si Potipal. Si Potipal ilay kapitan siga sundalu ma tukang nganjagahan astanaꞌ sultan. 2Dari lay na siꞌ si Yusup binuwat ata ni lumaꞌ si Potipal, bangsa Ejip looy. San meꞌ looy, luu na pin baw Tuhan ngunungan iya, nampulnaꞌ mimon pabuwatan na.
3Na si Potipal siꞌ tu, tabista na na du luu na pin Tuhan magmundaan si Yusup sabap oy-oy jaꞌ sinukuꞌ meꞌ si Potipal niiya, yaꞌ luu saꞌ yaꞌ sampulnaꞌ. 4Dari tud bay kasulutan si Potipal ni si Yusup sampay lay na ga ya pinabuwat panghuluꞌ ata ni lumaꞌ na. Maka lay na pina-ntan niiya mimon altaꞌ na pa jawom pa poan. 5Labba mandooy na siꞌ, sabapan si Yusup, lay na sinupaatan meꞌ Tuhan mimon jama lumaꞌ si Potipal, sampay mimon altaꞌ na paeka na pin pa diyoꞌ pa jataꞌ. 6Dari song hallom, sannang jaꞌ pamiki si Potipal sabap lay na halap na mimon-mimon ni si Yusup. Ilooy sa pamikihan na, ni hāl lawuk bong mamooy peneꞌ na kakan na.
Na si Yusup ilay siꞌ, magbēꞌ hāp lalla na ka hāp baran na. 7Dari lay na ga ya kinaromanan meꞌ nda si Potipal sampay yuk na ni si Yusup, “Tu ko, ubay doꞌ kita.”
8Sugaꞌ yaꞌ bay kuhi si Yusup, sampay yuk na ni nda papuꞌ na, “Uy, pakale doꞌ ko ba. Lla nu bilay yaꞌ na gampang ni oy maka oy na njawom lumaꞌ tuu batan mimon pabuwatan na lay na hinalap meꞌ na niyaku. 9Aku na bay buwat lla nu limbang na. Inaa ko ngawon sibuꞌ na kapatut kami ni lumaꞌ tuu. Oy-oy karomanan ku, yaꞌ luu saꞌ yaꞌ pinadari meꞌ na, sugaꞌ daa jaꞌ bong kau sabap nda na ko. Yaꞌ ku la kasogsog buwat kalaatan meꞌ naa. Yaꞌ ku doman ndusa pa Tuhan.”
10Sugaꞌ danda looy baw siꞌ tu yaꞌ du bay paruli, gam pin llaw pa dangallaw ngulihal na pin ya bong pin takoleꞌ na jaꞌ si Yusup. Sugaꞌ tud yaꞌ du ya bay kuhi. Bila pin danda looy paasok, buwatan si Yusup, magti pōꞌ.
11Na disu llaw, pag taabut si Yusup paasok pa jawom lumaꞌ looy buwat, yaꞌ bay luu ata soy maka soy na njawom sarī man iya. 12Dari lay ya sinungkuban man badjuꞌ na meꞌ danda looy hinelaꞌ sambayan na halling, “Ubay doꞌ kita ba.” Sugaꞌ gam pin lay si Yusup pakowepas, boꞌ na sonse pa poan. Sampay lay na ga tamban badjuꞌ na ni tangan danda looy.
13Pag ndaꞌ danda looy lay ya pinasonsehan boꞌ lay gi tamban badjuꞌ na, 14lay linganan na ga jama lumaꞌ na. Luu jaꞌ siꞌ sila, yuk na, “Ndaun bi doꞌ ba! Bangsa Hibrani looy ma bay boo lla ku pitu, bay jaꞌ muwan tipu-akka njataꞌ tabi. Bbuwatan na, lay siꞌ pitu adak bay nganjamaan aku. Lipara, lay ku killahap pahaddo. 15Pag ndaꞌ na killahap na ku, ilooy ma lay du ya sonse pa poan sampay atu gi badjuꞌ na bay tamban ni bihing ku.”
16Na badjuꞌ looy siꞌ tu luu na pin bay nnaꞌ danda looy ni bihing na ngabut sampay takka na lla na pa lumaꞌ. 17Luu jaꞌ siꞌ takka si Potipal, nuntut na nda na, yuk na, “Ata nu bilay, yana Hibrani looy ma bay boo nu pitu, adak bay nganjamaan aku. 18Lipara, pag killahap ku, lay ya sonse sampay atu gi badjuꞌ na bay tamban ni bihing ku.”
19Dari pag takale si Potipal bitsala nda na, tud bay sinalaputan tabbuk na. 20Sampay lay na ga jīl na si Yusup ni jawom jīl halliꞌ ni jama ma bay kapagdusa ni sultan bangsa Ejip. Sugaꞌ san meꞌ looy meꞌ da bay buwat si Yusup, 21luu na pin Tuhan ngunungan iya. Dari man tabang Tuhan, kasulutan na baw pa-mmean siga tukang jaga ni jīl looy ni si Yusup. 22Song hallom, lay na si Yusup sinohoꞌ meꞌ na magtakōk ni mimon pagkahi na pilisu. Dari oy-oy pinabuwat njawom jīl looy, si Yusup na bay asahan na magpandoy.
23Dari pa-mmean looy siꞌ, yaꞌ na san gampang ni oy maka oy na ni jawom jīl looy sabap luu na si Yusup mangatas magpandoy ni mimon-mimon. Mimon pabuwatan njawom jīl looy, yaꞌ luu saꞌ yaꞌ sampulnaꞌ meꞌ si Yusup batan luu na pin Tuhan ngunungan iya.
Atualmente selecionado:
Panagnaan 39: sjm
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2021, Wycliffe Bible Translators, Inc. All rights reserved.