Panagnaan 38
38
Si Juda ka si Tamal
1Na jaman looy du siꞌ, kuwan disu siyaka si Yusup, yana si Juda, lay pasakkat man ga danganakan na sampay lay na ya pilay pa Adullam. Ndooy siꞌ, lay ya tamban ni lumaꞌ disu lalla inawnan si Hira. 2Sasang si Juda ndooy, lay ya sitammu ka disu danda man na kasulutan. Danda looy ilay siꞌ anak si Siyuwa, bangsa Kanan. Song hallom lay na sila sitampu 3sampay anakan na sila tallu lalla. Ilooy ma siyaka bay awnan si Juda si Er. 4Kuwan ilooy ma ni kaduwa, lay inawnan si Onan. 5Ni katallu na yana si Sela. Pag taabut si Sela pinamaddihan, ndang lay na sila maglayin pa Kesib.
6Na mehe jaꞌ siꞌ si Er, lay na baw pinahandān meꞌ si Juda ni disu danda inawnan si Tamal. 7Sugaꞌ si Er siꞌ tu, biddaꞌ na jahallis na sampay lay na ga pinapatoy leꞌ Tuhan.
8Pag-anu, yuk si Juda ni anak na ni kaduwa, yana si Onan, “Na Toꞌ, tabiat bangsa tabi itu, subay kau mūt si Tamal supaya pag mintu kam lay na hanak, ilooy na binilang anak imuwa kakaꞌ nu.” 9Dari siꞌ lay na kawinan si Onan bawu siyaka na. Sugaꞌ katoonan si Onan du bong sila bay hanak, saꞌ du para niiya. Dari bbuwatan na, tuktuk na napitan si Tamal, pinasapput meꞌ na manniꞌ na pa poan mari yaꞌ dari anak. 10Na pagka siꞌ ya yaꞌ kuhi moan imuwa siyaka na anak, tud yaꞌ bay kasulutan Tuhan niiya. Dari lay du ya pinapatoy meꞌ Tuhan.
11Pag-anu, yuk si Juda man iwan na si Tamal, “Gam na ko pabeleng na doꞌ pa mman ga induꞌ mmaꞌ nu. Tatasan nu na doꞌ bawu ndooy. Noy mintu mehe na si Sela, anak ku ma kabungsuhan, boꞌ sohoꞌ ku na baw sitampu ka kau.” Dari siꞌ lay na moleꞌ si Tamal. Sugaꞌ ni sabana na, si Juda yaꞌ doman si Sela sitampu ka si Tamal. Gawa ya taggahaꞌ lay du mintu matoy si Sela meꞌ bay kadari ga siyaka na.
12Na luu jaꞌ siꞌ daka dangon taun bay pingkaꞌ, lay na matoy nda si Juda. Kaulian jaꞌ siꞌ bay lindu na, lay ya pilay pa Timna nabangan ga tindog na ngukuhan siga bili-bili na ndooy. Maka luu du bay mmeꞌ niiya bagay na si Hira, jama Adullam.
13Na si Tamal siꞌ tu, lay kaakahan luu konoꞌ ga matoa na song pilay pa Timna ngukuhan siga bili-bili na. 14Maka tasayu na na du mehe na si Sela. Salla na, kuwan si Juda, yaꞌ bay numan janjiꞌ na magsitampu sila ka si Sela. Pagka meꞌ looy, lay si Tamal miha jalan bong pooy meꞌ na koleꞌ anak. Dari lay saynan na badjuꞌ bawu na pa pamakoy puta, boꞌ na lay nambunan luwa na ka turung mari ya yaꞌ takila. Pag-anu, boꞌ na pilay pa Nayim, disu daira tapit ni lān pa Timna. Ndooy siꞌ, lay ya ningkōꞌ ni bihing lān ngagad matoa na pingkaꞌ.
15Takita jaꞌ siꞌ si Tamal meꞌ si Juda, sangka na puta ya. Yaꞌ ya bay takila sabap bay tinambunan meꞌ na luwa na. 16Yaꞌ bay taingat na ga ilooy na iwan na. Dari lay ya pasōng pa mman na mitsalahan iya, yuk na, “Nang, dari kita ubay?”
Yuk si Tamal baw siꞌ tu, “Na oy baw dean nu aku?”
17Tampung si Juda, “Penean ta sa ko kambing ni baanan hayop ku, boꞌ sa sohoꞌ ku tinuhiyan pitu.”
Yuk si Tamal baw siꞌ tu, “Mahap sina, sugaꞌ mbanan doꞌ baw ku katakkoan halloman yaꞌ gi luu kambing looy.”
18-19Yuk si Juda, “Katakkoan oy baw la mbanan ku kau?”
Tampung si Tamal, “Mbanan nu na doꞌ simsim ma bay inindanan ka awon nu ddas ka lantay na sampay tungkud nu.” Dari lay na mbanan na sampay lay na sila ubay.
Pag-anu siꞌ, lay na moleꞌ si Tamal. Takka lumaꞌ, lay na urusan na tambun luwa na, boꞌ na sayin pabalik ka badjuꞌ bawu na. Dari siꞌ, poonan mandooy na, lay na ya battong.
20Na kuwan si Juda baw siꞌ tu, lay na nohoꞌ bagay na si Hira moo kambing looy man ngalakkat ga katakkoan looy siꞌ ma bay mbanan na. Sugaꞌ yaꞌ na baw bay tatammu si Hira si Tamal. 21Lay na ya nilaw ni jama lahat looy bong lay paninggai puta ma magpaningkōꞌ ni bihing lān lahat da.
Pag tampung da, “Yaꞌ baw bitu luu puta ntuu.”
22Na luu jaꞌ siꞌ si Hira bay pabeleng pa mman si Juda, yuk na, “Yaꞌ la bay tatammu ku puta looy. Baꞌ-bāꞌ jama lahat looy, yaꞌ luu ndooy puta labba man sibuwa.”
23Pag halling si Juda, “Biyahun na ba luu. Maha kita patattohan jama. Saꞌ na du lay man aku, batan lay na du sohoꞌ ku tinuhiyan kambing tuu. Sat na jaꞌ, yaꞌ na ya bay tatammu nu.”
24Na luu jaꞌ siꞌ kulang-labi ga tallum buwan, luu na bay mahati si Juda iwan na lay buwat dī na puta, sampay lay na ga battong.
Yuk si Juda baw siꞌ tu, “Boonun bi na ba pōꞌ pa jawom mayran boꞌ tunuhun bi!”
25Adak jaꞌ si Tamal binoo pa poan, lay doꞌ ya duhuꞌ magpanohoꞌ pa mman matoa na moo ga katakkoan na. Tugun na, “Baan bi matoa ku, lalla ma bay kabattong aku yana ilooy ma dapu siga pabuwatan tuu. Sōn bi doꞌ kinila bong soy dapu tungkud tuu ka simsim tuu ddas ka lantay na.”
26Takila jaꞌ siꞌ meꞌ si Juda, yuk na, “Mas mehe gi bilay dusa ku man niiya batan yaꞌ san bay tuman ku bay janjiꞌ ku magsitampu sila ka si Sela.” Na si Juda siꞌ tu, san iya mmaꞌ anak si Tamal, yaꞌ du sila bay sitampu, maka yaꞌ na ya bay napitan si Tamal pabalik.
27Na taabut jaꞌ siꞌ waktu si Tamal maddi, kamba anak na, boꞌ lalla sikaduwa. 28Sasang na siꞌ tu maddi, kuwan disu lay mōꞌ tangan na, boꞌ lay deꞌ-dēꞌ iningkotan meꞌ baliyan ka salban akket sambayan na halling, “Ituu siyaka.” 29Sugaꞌ lay na baw helaan anak-anak looy tangan na, boꞌ danganakan na ya bay duhuꞌ pōꞌ. Yuk baliyan looy, “Uy Toꞌ, magtuyuꞌ bitu ko pōꞌ!” Dari lay ya inawnan si Peres, hatiyan na, “magtuyuꞌ pōꞌ.” 30Pag-anu, pasunuꞌ na pōꞌ danganakan na, ilooy siꞌ ma luu salban akket ni tangan na. Dari lay inawnan si Zera, hatiyan na, “akketan kallat llaw.”
Atualmente selecionado:
Panagnaan 38: sjm
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2021, Wycliffe Bible Translators, Inc. All rights reserved.