Panagnaan 29
29
Katakka si Yaꞌkub pa lumaꞌ si Laban
1Na lakka mandooy siꞌ, lay na pawus si Yaꞌkub pa lahat man na bay sinohoꞌ pilay song pa mataallaw man Kanan. 2Ndooy siꞌ, lay na baw ya ngita disu tagaꞌ ni kahayangan liput leꞌ tallu baanan bili-bili ngagad-ngagad pinainum. Ni behe tagaꞌ looy siꞌ, luu batu pepan mehe man bay nangkop. 3Na tabiat ga tukang ngipat ga bili-bili ndooy, subay luu na kumpo sikamimon baanan bili-bili da, boꞌ da sama-sama nganggiling batu looy. Pus da mainum, boꞌ patangkop da batu looy pabalik.
4Pag takka jaꞌ si Yaꞌkub pa tagaꞌ looy, yuk na ni siga tukang ngipat bili-bili ndooy, “Ū siga danganakan, jama maninggai kam ina?”
Pag tampung da siꞌ, “Kami itu jama man Haran.”
5Tilaw si Yaꞌkub na baw, “Takila bi Paꞌ Laban, mpu Boꞌ Nahol?” Yuk da, “Ohoꞌ, takila kami.”
6Yuk si Yaꞌkub, “Mag-inoy na ya?”
Yuk da, “Masi du baw bilay mahap. Alu na anak na si Rakel ka baanan bili-bili mmaꞌ na.”
7Yuk si Yaꞌkub ninsila, “Siga Langaꞌ, masi gi bina la langkaw llaw. Subay siꞌ noy kohap na boꞌ bi ngumpo bili-bili bi lliyun pitu pinainum. Gam na painumun bi na deꞌ-dēꞌ, boꞌ pakanun bi na balik pa jawom tawun.”
8Iya tampung da baw siꞌ tu, “Yaꞌ gi baw ba la kami dari mainum batnaa. Noy luu na bay kumpo mimon baanan bili-bili boꞌ kami nganggiling batu naa. Pag-anu, boꞌ kami sama-sama na mainum.”
9Na sasang si Yaꞌkub masi magbitsala ka sila, takka na si Rakel ka baanan bili-bili mmaꞌ na. 10Pag takita meꞌ si Yaꞌkub kaki na si Rakel ka ga bili-bili Paꞌ na Laban, lay na giling na batu ni behe tagaꞌ looy, boꞌ na nganggayungan ga bili-bili looy. 11Lupus jaꞌ siꞌ, lay na ya jara ni si Rakel sambayan na nangis ni kagāk na. 12Yuk si Yaꞌkub, “Aku itu kaki nu. Nneꞌ ku si Ribeka, yana danganakan mmaꞌ nu.” Dari ilooy ma sonse du si Rakel moleꞌ maan mmaꞌ na.
13Pag katoonan jaꞌ meꞌ si Laban luu takka kamanakan na si Yaꞌkub, magti du ya sonse nampang. Sitammu jaꞌ siꞌ sila, magti kinakkopan meꞌ na si Yaꞌkub sampay inūk, maka lay na boo na pa lumaꞌ. Takka lumaꞌ, lay na si Laban tuntutan si Yaꞌkub mimon ma bay magkadarihan niiya. 14Pag lupus, yuk si Laban, “Bana-bana du la Toꞌ rahasiyaꞌ ta ko.”
Na luu jaꞌ siꞌ ga dambuwan halloman si Yaꞌkub ndooy man Paꞌ na Laban, 15yuk si Laban niiya, “San ina meꞌ kau kamanakan, yaꞌ baw sina sikatuwaꞌ buwat na jaꞌ ko yaꞌ luu ka hasil na. Bong anu, baan nu na ku bong dangoy paku nu.”
16Na si Laban ilay siꞌ, anakan duwa danda budjang lagi. Ma siyaka yana si Liya, kuwan ma siyali yana si Rakel. 17Si Liya siꞌ tu, dorogan baw mata na, boꞌ si Rakel, tud lingkatan batan magbēꞌ hāp danda na ka ayad baran na.
18Na si Yaꞌkub ilay siꞌ, tud doman banahan ni si Rakel. Dari yuk na ni si Laban, “Bong anu ba, buwat na ku ningkau njawom pitun taun san yaꞌ na luu gadji ku, bong pin kawinun jaꞌ kami ka si Rakel.”
19Yuk si Laban baw siꞌ tu, “Bilang mahap sina. Gam na kau lla na man na kapajama sarī. Ntuu na ko tamban buwat niyaku.” 20Dari lay na si Yaꞌkub buwat njawom pitun taun bong pin takoleꞌ na jaꞌ si Rakel. Ni kaehe dawom na baw siꞌ tu ni si Rakel, meꞌ looy na siꞌ halloman na bay buwat, pangissahan na daka dangoy ngallaw du.
21Na paddus jaꞌ siꞌ pitun taun, yuk si Yaꞌkub ni si Laban, “Taabut na la bay pagjanjian ta. Bong anu, kawinun na kami ka anak nu.”
22Dari ilooy ma lay du si Laban manggi jama mimon ni paglahat looy boꞌ na ballang mehe. 23Sugaꞌ pag sangom, iya bay pinaubay meꞌ si Laban pa mman si Yaꞌkub yana si Liya, saꞌ ga si Rakel. Maka sabap lindom lahat, yaꞌ na san bay tasayu si Yaꞌkub, kanna na tud si Rakel na bay soheꞌ na ubay. 24(Na si Liya siꞌ tu, lay binuwanan meꞌ si Laban disu ata danda. Awon na si Silpa.)
25Pag kallat llaw, oy doꞌ ba, pag ndaꞌ si Yaꞌkub, si Liya ya bay soheꞌ na ubay. Dari lay du ya magti pilay pa mman matoa na, yuk na, “Ongoy ku bay bbuwat nu meꞌ looy? Saꞌ ba, kon ku bay buwat ningkau supaya takoleꞌ ku si Rakel? Ongoy baw taggahaꞌ lay jaꞌ ku akkahan nu?”
26Iya tampung si Laban, “Saꞌ sina meꞌ naa arat jama lahat tuu duhuꞌ gi ma siyali pinahallān man ma siyaka. 27Sugaꞌ bong ko tud doman, paddusan tabi na doꞌ paballangan tuu njawom sakayi pituꞌ, boꞌ sa dean ku kau si Rakel, basta ko buwat lagi pabalik man ku njawom pitun taun.”
28Dari siꞌ, lay na du kuhi si Yaꞌkub. Pag paddus sakayi pituꞌ looy siꞌ, lay na du pa-ntan si Laban si Rakel pa mman si Yaꞌkub nohoꞌ binuwat nda. 29Maka lay na du si Rakel binuwanan meꞌ si Laban disu ata danda. Awon na si Bilha. 30Dari siꞌ, lay na du si Yaꞌkub sitampu ka si Rakel. Na si Rakel siꞌ tu, tud kinaasean meꞌ si Yaꞌkub labi man si Liya. Sampay lay na atas si Yaꞌkub buwat ni si Laban pitun taun lagi.
Siga anak si Yaꞌkub
31Na pag ndaꞌ Tuhan kulang kinaasean si Liya, ilooy ma lay buwanan na si Liya timbang sampay lay na battong. Boꞌ si Rakel yaꞌ hanak.
32Na pag maddi si Liya, lalla anak na. Meꞌ si Liya bay ngawnan iya, si Ruben, hatiyan na “takita na kasusahan ku,” batan yuk si Liya, “Lay du la takita Papuꞌ kasusahan ku. Batnaa tu mastiꞌ kinaasean na ku meꞌ lla ku.”
33Pag-anu, battong na baw si Liya balik. Pag maddi na, lalla du. Yuk si Liya, “Ituu pun anak bay du dean Tuhan aku, batan lay du pakale na bay halling ku yaꞌ ku kinaasean meꞌ lla ku.” Dari lay inawnan meꞌ na si Simiyun, hatiyan na, “luu pakale.”
34Pag-anu, battong na baw ya balik. Pag maddi na, lalla du. Dari yuk na, “Na batnaa, mura na situ ngagot banahan na aseꞌ lla ku niyaku batan kamintallu tuu na kami anakan lalla.” Dari, lay awnan na anak na si Libay, hatiyan na, “ngagot.”
35Pag-anu, battong na baw si Liya balik. Pag maddi na, lalla du balik. Dari yuk na, “Batnaa tu, mudji na jaꞌ ku Papuꞌ.” Pag-anu, lay awnan na anak na si Juda, hatiyan na, “pudji.” Pus meꞌ looy, lay na ya banti hanak.
Atualmente selecionado:
Panagnaan 29: sjm
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2021, Wycliffe Bible Translators, Inc. All rights reserved.