Panagnaan 30
30
1Na si Rakel siꞌ tu, pagka ya niyaꞌ hanak, tud bay dangkiꞌ ya ni kakaꞌ na. Dari yuk na ni si Yaꞌkub, “Bong ku itu yaꞌ pahanak nu, matoy na situ ku!”
2Dari ilooy ma lasu si Yaꞌkub niiya, yuk na, “Saꞌ bitu ku la Tuhan. Iya du silay dapu gantaan bong ko hanak atawa niyaꞌ.”
3Yuk si Rakel, “Bong bina meꞌ naa, atu ata ku si Bilha. Ubayun na bong pin ku tahanakan jaꞌ meꞌ bi. Dari man sabapan na, luu na jalan man ku dari nneꞌ.”
4Dari siꞌ, lai na pa-ntan na si Bilha ni lla na nohoꞌ binuwat nda, sampay lay na sila sitampu. 5Pag-anu, ilooy ma battong na si Bilha. Pag maddi na, lalla.
6Yuk si Rakel baw siꞌ tu, “Gamgām la, ndapitan du baw hati ku leꞌ Tuhan. Tud lay du kinabbul meꞌ na duwaa ku batan lay na ku buwanan na disu anak lalla.” Dari lay awnan na anak-anak looy si Dan, hatiyan na, “ngandapit.”
7Pag-anu, lay na baw battong si Bilha pabalik. Pag maddi na, lalla du. 8Yuk si Rakel, “Tud bay mehe meꞌ ku magtuyuꞌ mari ku sumibuꞌ ni kakaꞌ ku hanak. Noy batnaa na boꞌ ku bay tumunga.” Dari lay awnan na anak-anak looy si Naptali, hatiyan na, “magtuyuꞌ.”
9Pag tabista meꞌ si Liya yaꞌ na ya hanak, ilooy ma lay du pa-ntan na ata na si Silpa ni si Yaꞌkub nohoꞌ binuwat nda. 10Pag-anu, ilooy ma lay du hanak si Silpa lalla. 11Dari yuk si Liya, “Mahap la sukud ku.” Dari lay awnan si Liya anak-anak looy si Ged, hatiyan na, “sukud mahap.”
12Pag-anu siꞌ, anakan na baw balik si Silpa lalla. 13Dari yuk si Liya, “Tud gāk ku la. Inawnan na situ ku sukuran meꞌ siga karandahan ni lahat tuu.” Dari ni kagāk na, lay awnan na anak-anak looy si Asel, hatiyan na, “gāk.”
14Na sasang timpu ngattom, kuwan si Ruben, yana anak si Liya, lay nammu poon mandrik. Na buwaꞌ mandrik looy ilay konoꞌ uliꞌ pahanak. Dari lay ya ngattuꞌ buwaꞌ na boꞌ binoo pa mman nneꞌ na. Pag takita leꞌ daraꞌ na si Rakel, lay na baw ya maku man si Liya, yuk na, “Buwanan teꞌ ku mandrik naa.” 15Sugaꞌ gam pin yuk si Liya, “Uy, hati, yaꞌ gi ko sarang-suku lay na kaddoꞌ nu lla ku, pag batnaa, dak na baw kaddoꞌ nu mandrik anak ku!”
Dari yuk si Rakel, “Bong siꞌ ku tabuwanan nu jaꞌ buwaꞌ mandrik naa, san kau na doꞌ ubay ka si Yaꞌkub mintu sangom.”
16Na pag sangom, takka jaꞌ siꞌ si Yaꞌkub bay man huma, lay na ya sinampang meꞌ si Liya, yuk na, “Sangom tuu aku na doꞌ soheꞌ nu ubay. Lay du dugangan ku si Rakel ka buwaꞌ mandrik bay tatammu anak ta bong pin taliyuhan nu jaꞌ ku.” Dari siꞌ, lai na si Liya ubay ka si Yaꞌkub sangom looy. 17Dari lai na kinabbul meꞌ Tuhan duwaa si Liya sampay lay na baw ya battong balik. Pag maddi na, lalla, yana anak na ka si Yaꞌkub ni kalima na. 18Dari yuk si Liya, “Ituu tu tungbas ayad bay dean Tuhan ni kaluuy na niyaku sabap atas ku na ga bay ma-ntan ata ku ni lla ku pin pasampun jaꞌ anak ku.” Dari lay awnan na anak-anak looy si Isakal, hatiyan na, “tungbas ayad.”
19Pag-anu siꞌ, battong na baw balik si Liya. Pag maddi na, lalla na baw balik maka ilooy na ni ka-nnom na anak na ka si Yaꞌkub. 20Yuk si Liya, “Nnā la, lay na baw ku buwanan Tuhan ladjikiꞌ balik. Mura ku binantug na meꞌ lla ku pagka nnom na anak na lalla pōꞌ man aku.” Dari ilooy ma lay awnan na anak-anak looy si Zebulun, hatiyan na, “kabantugan.”
21Song hallom, lay na baw battong balik si Liya. Pag maddi na, danda, boꞌ lay awnan na si Dayna.
22Na si Rakel baw siꞌ tu, ndang hallom na wā maku duwaa mari ya hanak. Boꞌ yaꞌ du ya bay takupan meꞌ Tuhan, sampay lay na du ya nduwan. 23Dari lay na ya battong. Pag maddi na, lalla. Pagka meꞌ looy, yuk si Rakel, “Nnā la, bohoꞌ lay tinambunan meꞌ Tuhan kaiyaan ku batan anakan na ku.” 24Dari lay awnan na anak na si Yusup, hatiyan na, “kamura-murahan sampunan na lagi anak lalla.”
Si Yaꞌkub muhun moleꞌ pa lahat induꞌ-mmaꞌ na
25Na luu jaꞌ siꞌ si Yusup bay pinamaddihan, yuk si Yaꞌkub ni matoa na si Laban, “Bong siꞌ la Paꞌ kadarihan ningkau, moleꞌ na ku la pa lahat kami. 26Bong siꞌ tugutan nu, boo ku na ga anak-nda ku, yana tungbas ni bay hulas-sangsāꞌ ku nabangan kau. Yaꞌ na du situ ku kahakan. Ndang katoonan nu na du bong pooy meꞌ ku bay magtuyuꞌ buwat ningkau.”
27Yuk si Laban baw siꞌ tu, “Bong siꞌ ba Toꞌ luu gi aseꞌ nu niyaku, daa na doꞌ ko os-os lakka. Baꞌ-bāꞌ jama tukang ngandaꞌ, danan ku sinupaatan meꞌ Tuhan man sabapan nu. 28Bong anu, baan nu na ku bong dangoy gadji paku nu bong pin luu jaꞌ ko ntuu buwat niyaku. Dangoy-dangoy jaꞌ paku nu, basta bayaran ta jaꞌ sina ko.”
29Tampung si Yaꞌkub, “Aku tu, ndang katoonan nu du bong pooy tuyuꞌ ku maghulas-sangsāꞌ ningkau. Danan baanan hayop nu bay magkamadjuwan man sabapan aku bay ngipat. 30Jaman ku yaꞌ luu ntuu, dangkitiꞌ du altaꞌ nu. Pag batnaa, lipat man lipat na. Danan nu sinupaatan meꞌ Papuꞌ man sabapan ku. Sugaꞌ batnaa, bong siꞌ kadarihan ningkau, pabiyahun na ku ngusahān di-dī ku ka ga anak-nda ku.”
31Yuk si Laban baw siꞌ tu, “Ē, ntuu na jaꞌ ko ba ngusaha. Māꞌ jaꞌ ko bong dangoy paku nu.”
Pag halling si Yaꞌkub, “Sigi ba, sugaꞌ yaꞌ ku kuhi ginadjihan ka pilak. Bong siꞌ ko kuhi, luu disu paku ku. Pag-anu, boꞌ ipat ku na pin siga baanan hayop nu. 32Bong siꞌ kadarihan ningkau, paliksaꞌ ku doꞌ mimon baanan hayop nu. Kuwan sagannap anak bili-bili nu ma itom maka sagannap bili-bili ka kambing nu ma kabang atawa tuktukan, inaa na jaꞌ kaddoꞌ ku bilang gadji ku. 33Bong mintu luu takita nu hayop ku yaꞌ kabang atawa tuktukan atawa anak bili-bili ma saꞌ itom, tumatandaꞌ na lay na silay tangkaw ku. Meꞌ looy ilay mintu, mura meꞌ nu toon bong ku bonto atawa niyaꞌ.”
34Tampung si Laban, “Bilang mahap sina. Magsulut kita bong meꞌ naa.” 35Sugaꞌ bbuwatan si Laban, lay duhuꞌ pilay pa ga baanan hayop na, boꞌ pinenean meꞌ na sagannap siga kambing na ma kabang ka ma tuktukan danda-lalla, sampay sagannap anak bili-bili na ma itom. Pag-anu, boꞌ lay paipatan na ni siga anak na ma lalla 36nohoꞌ binoo pa katāhan gantaꞌ pupus tallu ngallaw halloman da lumān. Kuwan ilooy kasohean, yana ma yaꞌ luu itom da samasakali, lay na pinaipatan man si Yaꞌkub.
37Na pag ndaꞌ si Yaꞌkub meꞌ looy akka si Laban, lay ya nammu jalan bong pooy meꞌ ga kahayop-hayopan looy anakan kabang atawa tuktukan. Duhuꞌ, lay ya ngaddoꞌ siga engas kayu itom kuwit da ma poteꞌ isi da. Ga kayu looy ilay siꞌ yana poon poplar, poon almon maka poon plen. Luu jaꞌ siꞌ ga engas kayu looy, lay lanitan na kasohean kuwit da mari kabang poteꞌ ka itom dagbos da. 38Pag-anu, boꞌ inannaꞌ meꞌ na njawom panginuman ga hayop supaya takita da sasang da sikameek bila sila pilay nginum. 39Dari pag taabut da maddi, bong saꞌ kabang anak da, tuktukan. 40Pag-anu, bbuwatan si Yaꞌkub, luu-luu anak kambing atawa anak bili-bili itom, kabang atawa tuktukan, lay na pasarī na para bahagiꞌ na. Kuwan siga baanan hayop ma poteꞌ, tuktuk da sikameek, pinaawop meꞌ na pa baanan hayop na ma itom, tuktukan atawa kabang. Dari meꞌ looy na silay siꞌ meꞌ si Yaꞌkub bay maeka bahagiꞌ na.
41Sarī gi, tuktuk sikameek siga hayop ma mahap banahan sambuhan da, inannaꞌ meꞌ si Yaꞌkub ga engas kayu looy siꞌ njawom panginuman da. 42Sugaꞌ bong ilooy ma kulang ayad sambuhan da sikameek, kinaddoan meꞌ si Yaꞌkub ga engas kayu looy. Dari song hallom, ilooy sa takapin ni si Laban, sagannap ma kulang ayad sambuhan da. Boꞌ ni si Yaꞌkub, mahap jaꞌ sambuhan da labbasakayi. 43Dari pag toklas na, lay na si Yaꞌkub magkadayahan. Boꞌ meka na baanan bili-bili na, ga kambing na, ga untaꞌ na, ga kuraꞌ na sampay meka na du ata na, danda-lalla.
Atualmente selecionado:
Panagnaan 30: sjm
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2021, Wycliffe Bible Translators, Inc. All rights reserved.