Yowano 9
9
Yesu mwatonesa lunga asemukile kapuputa
1Omu apwile nakuhita, amwene mutu asemukile kapuputa.
2Kaha tumbaji twenyi vamuhulishile ngwavo, Ove Lapi, iyaze avulumwine numba ou lunga asemuke kapuputa? Ivene tahi, nyi visemi jenyi?
3Yesu akumbulwile ngwenyi, kacheshi nge ikiye chipwe visemi jenyi vavulumwineko, oloze mangana milimo yaKalunga yisolokele hali ikiye.
4Kuvanga tuzatenga milimo yaUze angutuma shimbu kuchili musana — ufuku nawiza, haukiko naumwe mwahasa kuzata wauchi.
5Shimbu nguchili hakaye, nguMusana wavaka-kaye.
6Hakukumisa kuhanjika ngocho, afwijilile hamavu, kaha aungile kandambo namaleji, amushilile kaze kandambo hameso.
7Kaha amwambile ngwenyi, Yako ukasane kuchijiva chaShilowame, (echi chalumbunuka ngwavo, Wakutuma). Shikaho ayile, asanyine, kaha akindulukile ali nakumona.
8Vaze vakwavo alihachile navo, navaze vamumwenenga omu apwile nakulomba-lomba, vambile ngwavo, Ou keshi ikiye uze natwamenga nakulomba-lombako?
9Vamwe vambile ngwavo, Ikiye vene. Vakwavo nawa ngwavo, Nalifwane nenyi kaha. Ikiye atwalilileho nakwamba ngwenyi, Yami vene.
10Shikaho vamuhulishile ngwavo, Nyi meso ove vanawatonesa ngachilihi?
11Ikiye avakumbulwile ngwenyi, Mutu vavuluka ngwavo Yesu aunganga kandambo nakungushilako hameso, himwangwamba ngwenyi, Yako kuShilowame ukasane. Shikaho ngwayanga, ngwasananga, kaha ngunatono.
12Vamuhulishile ngwavo, Ikiye ali kulihi? Avakumbulwile ngwenyi, Kangwatachikijileko.
VaFwaliseu navamushinjisa omu natonena
13Uze lunga ápwile kapuputa, vamutwalile kuli vaFwaliseu.
14Jino likumbi lize áungile Yesu kaze kandambo nakutonesa meso enyi, lyapwile lyaSambata.
15Kaha vaFwaliseu vamuhulishile cheka omwo atonenene. Avambile ngwenyi, Angushilanga kandambo hameso, ngwasananga, kaha ngwatonanga.
16Shikaho vamwe vamuli vaFwaliseu vambile ngwavo, Mutu Ou keshi wakuli Kalungako, mwomwo kalama Sambatako. Oloze vakwavo ngwavo, Muka-shili mwahasa ngachilihi kulinga vinjikizo vipwaha ngana? Kaha muli vakiko mwapwile kulihandununa.
17Kaha vamuhulishile cheka uze apwile kapuputa ngwavo, Ove nawambaho ngwove ika hali Ikiye, omu natonesa meso ove? Avakumbulwile ngwenyi, Apwa kapolofweto.
18Jino vaYuleya kavachitavilileko ngwavo uze vátonesele apwile kapuputa, palanga nomu vasanyikile visemi jauze vátonesele.
19Vavahulishile ngwavo, Ou ikiye mwanenu munambe ngwenu asemukile kapuputa tahi? Kaha jino natono ngachilihi?
20Visemi jenyi vakumbulwile ngwavo, Tunatachikiza ngwetu ou mwanetu vene, kaha asemukile kapuputa.
21Oloze jino omu natonena, katwatachikijilemoko, chipwe Ou námutonesa, etu katwamutachikijileko. Muhulisenu ivene, nakolo lyehi, mwalihanjikila.
22(Visemi jenyi vahanjikile ngocho hawoma wavaYuleya, mwomwo vaYuleya valivwasanyine ngwavo, Weshowo mwalitavila hatoma ngwenyi Yesu Ikiye Kulishitu, vamuhange musunangonga#9:22 Tala ha6:59..
23Hakiko váhanjikilile visemi jenyi ngwavo, Nakolo lyehi, muhulisenu ivene.)
24Kaha vamusanyikile kamuchivali uze apwile kapuputa nakumwamba ngwavo, Mulemese Kalunga. Tunatachikiza ngwetu, Mutu Ou muka-shili!
25Ikiye avakumbulwile ngwenyi, Nge apwa muka-shili, kangwatachikijileko. Chuma chimwe kaha ngunatachikiza, ngunapunga ngukapuputa, jino nguli nakumona.
26Kaha vamuhulishile ngwavo, Akulinganga muka? Atonesanga meso ove ngachilihi?
27Avakumbulwile ngwenyi, Ngunamilweze lyehi, kaha enu kamwevwililileko. Nyi namusakila ika kuchivwa cheka? Nayenu nawa munasake kupwa mutumbaji twenyi tahi?
28Kaha vamutukanyine ngwavo, Kambaji kenyi yove, etu tutumbaji twaMose.
29Etu twatachikiza ngwetu, Kalunga ahanjikile kuli Mose, oloze Ou katwatachikiza okwo afumako.
30Uze mutu avakumbulwile ngwenyi, Echi chinapu chakulikomokela chikuma, hakuhona enu kutachikiza okwo afuma, oloze Ikiye natonesa meso ami!
31Twatachikiza ngwetu, Kalunga keshi kwivwilila vaka-shiliko, oloze weshowo amwivwa Kalunga woma nakulinga mwaya muchima wenyi, Kalunga eji kumwivwililanga.
32Kufuma kukuputuka chamyaka, kanda vachivweho lyehi ngwavo umwe natonesa meso amutu ásemuka kapuputa.
33Nge Mutu Ou kapwile wakuli Kalungako, kachi nechi ahasa kulinga chauchi.
34Vamukumbulwile ngwavo, Ove wasemukilile mushili chikupu, kaha ove utunangule etu?! Kaha vamuhangile mukachi kavo nakumufumisa kuvyauYuleya.
Upuputa wakumuchima
35Yesu evwile ngwavo vanamuhange mukachi kavo, kaha hakumuwana amuhulishile ngwenyi, Ove unamufwelela Mwanamutu#9:35 Mwanamutu hilijina lyauKalunga waYesu Kulishitu chipwe shimbu kanda asemuke hakaye, ngana omu vanasoneka kuNdanyele 7:13-14. tahi?
36Amukumbulwile ngwenyi, Ove Mwata, Ikiye iya mangana ngumufwelele?
37Yesu amwambile ngwenyi, Unamumono, kaha nawa Ikiye vene Ou ali nakuhanjika nayove.
38Ambile ngwenyi, Ove Mwata, ngunafwelela. Kaha alifukwile kuli Ikiye.
39Yesu ambile ngwenyi, Ngweza hakaye nakuyula mangana ava vazeneka kumona vamonenga, kaha vaze vamona vapwenga tupuputa.
40Vamwe vamuli vaFwaliseu vápwile nenyi vevwileko, kaha vambile ngwavo, Kumana, nayetu nawa tutupuputa tahi?!
41Yesu avambile ngwenyi, Nge mwapwanga mutupuputa kachi kamweshi namulongako. Jino omu mwamba ngwenu, Tweji kumonanga, mulonga wenu hanga wapwila.
Atualmente selecionado:
Yowano 9: LUE
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Bible Society of Zambia