Yowano 8
8
Pwevo vawanyine ali nakulinga ujila
1Jino Yesu ayile kupili yaMilive.
2Chimenemene ahilukile kuTembele. Vatu vosena vejile kuli Ikiye, kaha atwamine nakuvanangula.
3Vaka-kusoneka navaFwaliseu vanehele pwevo vawanyine ali nakulinga ujila, kaha hinavamwimika mukachi,
4nakwamba ngwavo, Ove Muka-kunangula, ou pwevo vanamuwane ali nakulinga ujila.
5Jino kuJishimbi, Mose atulweza kwasa vangana malolwa. Nyi Ove ngwove ika?
6Vahanjikile ngocho nakumweseka mangana vamuwanyine mulonga. Oloze Yesu anongamine nakusoneka namunwe wenyi hamavu.
7Omu vatwalilileho nakumuhulisa, olokele nakuvamba ngwenyi, Ou katwama nashiliko muli enu, alivange kumwasa lilolwa.
8Kaha anongamine cheka nakusoneka hamavu.
9Vakiko hakuchivwa vafumineko umwe naumwe, kuputukila kuli vakulwane, nomu Yesu asalile uka wenyi, nauze pwevo hanga nemanyina.
10Yesu olokele nakumuhulisa ngwenyi, Ove pwevo, vavalihi? Naumwe wauchi nakuhisa tahi?
11Uze pwevo akumbulwile ngwenyi, Wauchi Mwata. Yesu amwambile ngwenyi, NayAmi nawa kangwakuhishíleko. Yakonga, kaha kufuma kulelonyi, kanda ukavulumuna chekako.]
Yesu Ikiye Musana wavaka-kaye
12Cheka nawa, Yesu avalwezele ngwenyi, Ami yami Musana wavaka-kaye. Ou mwangukavangizanga keshi kukatambuka mumilimako, oloze mwapwanga naMusana wamwono.
13Shikaho vaFwaliseu vamwambile ngwavo, Ove uli nakuhana unjiho wakulivuluka Ove Ivene. Unjiho wove kaweshi wamuchanoko.
14Yesu avakumbulwile ngwenyi, Chipwe Ami nguli nakuhana unjiho wakulivuluka Ami Ivene, unjiho wami wamuchano. Mwomwo ngunatachikiza oku ngwafuma, noku nguli nakuya. Oloze enu kamwatachikiza oku ngwafuma, noku nguli nakuyako.
15Enu mweji kusopanga mwaya chisemwa chamujimba. Ami kangwasopesa mutuko.
16Oloze Ami nge nangusopesa, kusopa chami chamuchano, mwomwo kangweshi uka wamiko, oloze twapwa nayAmi naTata ángutuma.
17Vasoneka kuJishimbi jenu ngwavo, Unjiho wavatu vavali wapwa wamuchano.
18Ami yami ngweji kuhananga unjiho wakulivuluka Ami Ivene, naTata nawa, Ou angutuma, eji kuhananga unjiho hali Ami.
19Kaha vamuhulishile ngwavo, Iso ali kulihi? Yesu avakumbulwile ngwenyi, Kamwatutachikizako, nayAmi naTata. Nge mwangutachikizanga, kachi naTata nawa munamutachikiza.
20Awa mazu awahanjikilile kuze kwakulamina luheto omu apwile nakunangula muTembele. Kaha naumwe amukwachile wauchi, mwomwo lwola lwenyi lwapwile kanda luchihete.
Kufwila mushili hakuzeneka kufwelela
21Shikaho Yesu avalwezele cheka ngwenyi, Ami nguli nakuya, namukangutonda, kaha enu namukafwila mushili yenu. Okwo nguli nakuya Ami, enu kamweshi kuhasa kuyakoko.
22 Kaha vaYuleya vambile ngwavo, Mwalijiha tahi? Mwomwo nambe ngwenyi, Okwo nguli nakuya Ami, enu kamweshi kuhasa kuyakoko.
23Avambile ngwenyi, Enu muvamwishi, Ami nguwahelu. Enu muvahakaye, Ami kangweshi nguwahakayeko.
24Hakiko ngwamilwezelanga ngwami, Namukafwila mumilonga yenu yashili. Mwomwo nge kamweshi kufwelela ngwenu Ami Ngwapwa, namukafwila mumilonga yenu yashili.
25Jino vamuhulishile ngwavo, Kumana yove Iya? Yesu avakumbulwile ngwenyi, Nge muze ngunamilwezenga kufuma kukuputuka.
26Nguli navyavivulu vyakuhanjika nakusopa hali enu. Oloze Uze angutuma apwa wamuchano, kaha Ami ovyo ngwevwa kuli Ikiye, vikiko ngwahanjika kuli vaka-kaye.
27Kachavalumbunukilileko nge apwile nakuvuluka Ise.
28Shikaho Yesu avambile ngwenyi, Nge munazezula lyehi Mwanamutu#8:28 Mwanamutu hilijina lyauKalunga waYesu Kulishitu chipwe shimbu kanda asemuke hakaye, ngana omu vanasoneka kuNdanyele 7:13-14. helu numbanyi mukatachikize ngwenu, Ami Ngwapwa, kaha Ami kangwalilingilako, oloze muze angunangula Tata, mukiko ngwahanjika.
29Kaha Uze angutuma atwama nayAmi hamwe. Kanguseza uka wamiko, mwomwo Ami ngwalinga lika vyakumusuulwisa.
30Omu apwile nakuhanjika mazu awa, vavavulu vamufwelelele.
Muchano naukamisokola
31Shikaho Yesu ambile vaYuleya vaze vasolwele kumufwelela#8:31 Chasoloka nge vamwe kaha vafwelelele chikupu. ngwenyi, Nge enu namutwamanga mumazu ami, kaha mwamuchano vene mutumbaji twami,
32kaha namutachikiza muchano, kaha muchano naumisokola muundungo.
33Vamukumbulwile ngwavo, Etu tuvana vaApalahama, kaha kanda tuhetuweho lyehi numba kuli umwe. Nyi unahanjikila ika ngwove, Namukasokoka muundungo?
34Yesu avakumbulwile ngwenyi, Mwamuchano vene nangumilweza ngwami, Wose eji kuvulumunanga milonga apwa ndungo yashili.
35Kutwama chandungo muzuvo yakaka yenyi kachatwalililahoko, oloze kutwama chamwananyi cházeneka kukuma.
36Shikaho nge MwanaKalunga mwamisokola, kaha namusokoka vene.
37Ngunatachikiza ngwami, muvana vaApalahama, oloze munasake kungujiha mwomwo mazu ami kaawanyine chihela muli enuko.
38Ami ngwahanjika evi ngwamona kuli Tata, kaha enu nawa mwalinga ovyo munevu kuli senu.
Senu liyavolo
39Vamukumbulwile ngwavo, Setu Apalahama. Yesu himwavamba ngwenyi, Mwapwanga muvana vaApalahama, kachi mweji kulinganga vilinga vyaApalahama.
40Oloze jino munasake kungujiha, Ami Mutu ngunamilweze muchano ou ngwevwa kuli Kalunga. Apalahama kalingile ngochoko.
41Enu mweji kulinganga vilinga vyasenu. Vamwambile ngwavo, Etu katwasémuwile kuujilako. Tukwechi Setu umwe kaha, Ikiye Kalunga.
42Yesu avambile ngwenyi, Nge Kalunga apwanga Senu, kachi mwanguzanga, mwomwo Ami ngwafuma kuli Kalunga, kaha yami uno. Kangwalijilile Ami Iveneko, oloze Ikiye angutuma.
43Mwomwo ika evi ngunahanjika vinazeneka kumilumbunukila? Mwomwo kamwasaka kwivwilila nakwitavila mazu amiko.
44Enu muvakuli senu liyavolo, kaha mwafwila kulinga vize vyavipi afwila senu. Apwa muka-kujiha vatu kufuma kukuputuka. Kemana hamuchanoko, mwomwo muli ikiye kamwatwama muchanoko. Heshoho mwahanjikila vyamakuli, ahanjika mwaya kupwa chenyi, mwomwo apwa muka-makuli, ikiye Samakuli.
45Oloze mwomwo Ami ngwahanjika muchano, enu kamwangufwelelako.
46Iya muli enu mwanguhisa namulonga? Nge ngwahanjika muchano, kaha mwomwo ika mwazeneka kungufwelela?
47 Ou wakuli Kalunga, evwa mazu aKalunga. Enu kamwawevwako, mwomwo kamweshi muvakuli Kalungako.
Shimbu kanda Apalahama apweko, Ami Ngwapwa
48VaYuleya vamukumbulwile ngwavo, Kumana etu katwahanjikile mwamuchanoko ngwetu, Ove ukaSamaliya, kaha uli nandemone?
49Yesu avakumbulwile ngwenyi, Ami kangweshi nandemoneko, oloze ngwavumbika Tata, kaha enu mweji kungusaulanga.
50Ami kangwalitondela upahu Ami Iveneko. Kwali Ou angutondelawo, Ikiye eji kuyulanga nawa.
51Mwamuchano vene nangumilweza ngwami, Nge mutu mwalinganga mwaya mazu ami, keshi kukamona kufwako.
52VaYuleya vamukumbulwile ngwavo, Jino tunatachikiza ngwetu uli nandemone vene. Apalahama afwa, navapolofweto nawa vafwa, kaha ove ngwove, Nge mutu mwalinganga mwaya mazu Ami keshi kukamakila kufwako!
53 Ove unahambakana setu Apalahama ou afwa tahi? Navapolofweto nawa vaze vafwa! Kaha Ove uli nakulilingisa kupwa yoveya?
54Yesu avakumbulwile ngwenyi, Nge nangulihana upahu Ami Ivene, kaha upahu wami wamokomoko. Tata Ikiye anguhana upahu, Ou mweji kwambanga ngwenu apwa Kalunga kenu.
55Enu kamwamwijivako, oloze Ami ngwamutachikiza. Nge nangwamba ngwami, Kangwamutachikizako, kaha nangupwa ngumuka-makuli ngana omu mwapwa enu. Oloze ngwamutachikiza, kaha ngwalinga mwaya mazu enyi.
56Senu Apalahama akinyinyinyine ngwenyi mwakamona likumbi lyami. Alimwene, kaha awahililile.
57Jino vaYuleya vamwambile ngwavo, Ove kanda uhete mumyaka makumi atanu (50), kaha Apalahama wamumwene numba?
58Yesu avambile ngwenyi, Mwamuchano vene nangumilweza ngwami, Shimbu kanda Apalahama apweko, Ami Ngwapwa.
59Kaha vanonele malolwa ngwavo vamwase, oloze Yesu aliswekele, kaha alovokele muTembele.
Atualmente selecionado:
Yowano 8: LUE
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Bible Society of Zambia