Matius 9
9
Yefun Yesus ben ye gato gwes út ne ge
(Mrk. 2:1-12; Luk. 5:17-26)
1Yefun Yesus it mo kwem dik yo ete mu mo em de yo o. Yefun Yesus mu mo An dakai bi kota-i. 2Mone yé bok yo gwat yetu ge dik yo gato gwes út ne ma. Ye ne sem mo bi kwat. Yefun Yesus me suk gato yé bok ne ben anato An jam do, yé bok ne onyar kem mo An. Sane Yefun Yesus ki nai ye gato gwes út ne do, ”Pa nji, nan nyu nde. Sukibit mwa gato nan ben ne or kadit nan it anare. Ji yo nutbot sukibit mwa gato nan ben ne o nde.”
3Orete yeguru agama bok yo mone nut mo án mit do, ”Mban! Ye ré dakai bes An nggwa kok tepsu Yefun Allah, ete An ki suk tepsu Yefun Allah ko ré go!”
4Yefun Yesus jam yeguru bi sukjimnut ne, sane An ki do, ”Suma ben anato nin bi sukjimnut ibit sare ne? 5Sato Ji ki nai yebris ré do, ’Sukibit mwa gato nan ben ne, or kadit nan it anare.’ Nin nut do Ji yo nggiwa Ji ki sukdu sane nde bado? Sato Ji ki do, ’Nan sun, nan mu se!’ Te nin nut do, Ji yo nggiwa ben suk ne dom nde e? Sane nde, bere nin jam do, Ji nggiwa benbot sukdu kwa we ne sino. 6Sangge, bere Ji ben ye ré ge. Ji ben ye ré ge subere nin jam do, Ji anato nggiwa Ji ki do, sukibit gato yé mwa ne ben or kadit yé mwa ne dom. Ji ben ye ré ge anato nin jam do, Yefun Allah anato bes Yetu bi Pa to Ji ré.” Sane Yefun Yesus ki nai ye gato út ne do, ”Nan sun, nan pam nan bi sun. Nan satu mu mo nan bi nu sor.”
7Orete ye ne sun ete satu mu mo bi nu. 8Yé mwa mone me suk gato Yefun Yesus ben ne sa, án sino yeket, ete án un Yefun Allah, we Yefun Allah syo suktinggi nai yetu wa ben suk sane.
Yefun Yesus kendo Matius
(Mrk. 2:13-17; Luk. 5:27-32)
9Yefun Yesus mu kadit nat ne saresa, An me yetu ge dik yo gato gum do Matius. Matius ré an ye gato nai sugum kadit nje wa pemerintah. Sane an kem mo nat gato yé syo bi sugum nai an ne. Yefun Yesus ki nai Matius do, ”Nan ma simo Ji et!”
Sane Matius ti ete simo Yefun Yesus.
10Yefun Yesus git sugit mo Matius bi nu saresa, yé mwa gato nai sugum kadit nje wa pemerintah si yetu ge bok yo gato ye ki án gum ibit ne ma sisu Yefun Yesus si bi pakon sum mone wa git sugit sino. 11Ye Farisi me Yefun Yesus si yé ga sare git sugit sino sa, án ndo mo Yefun Yesus bi pakon ne do, ”Suma ben anato nin bi yeguru iwa si ye gato nai sugum kadit nje wa pemerintah si ye gato gum ibit ré git sugit sino sare ne?”
12Yefun Yesus jam ye Farisi bi sukdu ne sa, {An gwat sukamno dik yo subot ye Farisi bi sukjimnut.} An ki do, ”Ye gato yo i nde, bere an yo meret dokter nde, wo ye gato i sa, bere an meret dokter. 13Nin nutbot Yefun bi sukdu kwa dik ré sisu ndo et, sare do, ’Ji iwa nin dakai jimnotku ye yi neya ete ós án mone, Ji bariwa nin gre suge mo bot wa som Ji su.’ Nin nutbot sukdu ne, we Ji yo ma mo bur ré wa Ji kendo ye gato nut do, an sa, ye gato ben sukndo ne nde, wo Ji ma mo bur ré wa Ji kendo ye gato ben sukibit, yé ne tepsu ye gato i, subere án brek kadit os ibit ne ete onyar kem mo Ji.”
Ye ndo mo Yefun Yesus subot yé gato mewa an nggwa kadit sugit yei
(Mrk. 2:18-22; Luk. 5:33-39)
14Yohanes gato ras nje mo syur ne bi pakon ma ku Yefun Yesus ete ndo mo do, ”Men si ye Farisi, men mewa men nggwa kadit men git sugit yei, we men iwa ki suk su Yefun, wo Nan si Nan bi pakon-i ré yo mewa án nggwa kadit sugit nde wa suma ne?”
15Yefun Yesus ki do, ”Ye konwa yebris si bi nggon kra yu ne te, bere yebris ne bi yesyim bok ne án nderku án nggwa, án git sugit mone nde bado? Sane nde! Sarewo bere yé kar yebris gato kra ne wé kadit án orete yo, bere su kam gane án mewa án nggwa kadit sugit.” {Sane Yefun Yesus si An bi pakon kem sino tó anato Yefun Yesus si An bi pakon git sugit sino sor, án yo mewa án nggwa kadit sugit nde tó. Wo Yefun Yesus do mu kadit pakon ne yo, bere pakon ne mewa nggwa kadit sugit.}
16{Sane Yefun Yesus ki sukdu yo o subot os be gato An gwat ma wa ós men sok mo Yefun Allah bi rus-i, tara kadit os rok mo Musa bi sukduno-i ne.} Yefun ki do, ”Men yo nai san det be, ete men bitwa san rok gato syik nde, we men do mus san ne yo, bere san det be nit, yo tepsu san rok nde, sane san be tik san rok ne syik sye o re. Sane bere san det rok ibit wai o re. 17Sane dom, men yo sye nau anggur be mo sukbo gato rok nde, we i-su tut mo mit, ete bere sukbo ne pet anato ben sukbo ibit, orete nau ne sye kadit re. Sane bere suk we ne, gato nau si sukbo ne ibit sino re. Men ben sane nde, wo men sye nau anggur be mo sukbo be, subere nau si bi sukbo ne sino kem ndo.” {Sane Yefun Yesus bi sukduno be ne, men fros su sukduno rok nde.}
Yesu mo ye Yahudi bi nu ari bi mam
Nggon gato rot Yefun Yesus bi san nap
(Mrk. 5:21-43; Luk. 8:40-56)
18Yefun Yesus ki suk saresa, yesu mo ye Yahudi nu ari ma ku An. Yesu ne bare nggwa mo Yefun Yesus gwem, ete yesu ne ki do, ”Ré ete ji bi mam kwop sim, sarewo Nan ma Nan si ji mu me pa ne, ete Nan ak Nan syim mo pa ne yo, bere pa ne mbau satu re.”
19Sane Yefun Yesus ti ete simo yesu ne mu. Yefun Yesus si An bi pakon mu sino.
20Án sino mubot os saresa, nggon gato fo sor kom mo tahun musyu dik sop we mu karowa Yefun Yesus kadit Yefun Yesus de dari, ete nggon ne rot Yefun Yesus bi san nap. 21Nggon ne nut mo mom syidem do, ”Ji rot Yefun Yesus bi san nap sor re, bere ji ge re.”
22Yefun Yesus brek ma ete sokme nggon ne, An ki do, ”Pa donggon, nan nyu nde. Nan onyar kem mo Ji anato nan ge re.” Sugane it, nggon ne ge re.
23Yefun Yesus mu kom mo yesu mo ye Yahudi bi nu ari ne bi nu. An sok mo nu mit, ete An ku yé bok yo tik suling, An ku yé mwa wo nderku yepasye ne bi mam sa, 24An ki do, ”Nin syesyar se! Pa donggon ré yo kwop nde, wo pa sem sor re.”
Sarewo yé mwa ne jam sukdu ne, ete án sa Yefun Yesus mone. 25Yé mwa ne syesyar mo nden, orete Yefun Yesus sok mo pa donggon ne bi gumwak, or An jom pa donggon ne syim, ete pa donggon ne sun. 26Sukdu subot suk gato Yefun Yesus ben gare, yé ki frekbot nat ne sino.
Yefun Yesus ben ye we gato gro ndu ne gro ndo satu
27Yefun Yesus mu kadit nat ne. An mubot os saresa, ye we gato gro ndu boribot An. Ye we ne saiye do, ”Yeraja Daud bi Dat o, Nan dakai jimnotku men et!”
28Yefun Yesus sok mo nu mit sa, ye we ma ku An. Yefun Yesus ndo mo ye we ne do, ”Nin ka we onyar kem mo Ji do, Ji sa, bi suktinggi wa Ji ben nin ka we gro ne ndo wa nin me suk ndo satu bado?”
Ye we ne ki do, ”Yenggras, men onyar kem mo Nan re.”
29Sane Yefun Yesus syimtok ye we ne gro, ete An ki do, ”Nin ka we onyar kem mo Ji ne, anato nin ka we gro ndo it anare.” 30Sugane ye we ne gro ndo satu it. Yefun Yesus duyawa ye we ne sare do, ”Nin ka we ki subot suk gato Ji ben ré nai ye yi jam nde!”
31Yefun Yesus ki sane, sarewo ye we ne mu ki sukdu subot suk gato Yefun Yesus ben ne frekbot bur ne sino.
Yefun Yesus ben ye gato du ndo nde du satu
32Ye we mu kadit Yefun Yesus saresa, yé bok yo gwat yetu ge dik yo o gato semda ben sane sor ye ne yo du ndo nde ma mo Yefun Yesus. 33Ete Yefun Yesus syun semda ne wé kadit sa, ye ne ki suk sisu ndo satu. Yé bok ne sino yeket, yé ki do, ”Men yo me suk sato ré mo bur Israel yo mo nde.”
34Sarewo ye Farisi ki do, ”Biris bi yekwesu anato syo suktinggi nai Yesus anato An nggiwa syun semda wé kadit nje.”
Yefun Yesus jimnotku yé mwa ne ndo nde
35Sane Yefun Yesus mubot kota si kampung bok ne sino. An duno nje mo ye Yahudi bi nu ari. An ki sukdu subot os ndo gato Yefun Allah fro wa nai men yetu gum sok mo An bi rus-i, ete An tepsu men bi Yekwesu mone. Yefun Yesus ben ye gato i ne ge kadit suki wis bok ne sino. 36An me yé mwa gato sum mone sa, An dakai jimnotku yé mwa ne. An jimnotbot sukye gato yé mwa ne ku ndo nde, we An jam do, yé mwa ne kwabom dek ndo nde, yé mwa ne yo nggi o nde, yé mwa ne sino tepsu suksi sato domba, sarewo ye yo mewa án nde, ye yo kadum os gato ndo wa yé mwa ne nde. 37Sane Yefun Yesus ki nai An bi pakon do, ”Yé mwa ne tepsu sugit mwa gato kri mo nggwe, sarewo ye gato fro wa nai sugit ne yo tep nde. 38Sane nin ki suk su ye gato bi nggwe ne subere An syogat yé bok yo o waii mu nai sugit ne.” {Yetu mwa fro ndek wa jammo Ji, sarewo ye gato mu ki Ji bi sukdu-i nai yé mwa ne yo tep nde. Sane nin ki suk su Yefun Allah subere Yefun syogat yé bok yo o waii mu ki subot Ji bi sukdu-i subere kar yé mwa ne sok mo Yefun bi rus-i et.}
Atualmente selecionado:
Matius 9: KGR
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
@LAI 2004, 2014