Matius 8
8
Yefun Yesus ben ye gato suki borbuk git ne ge
(Mrk. 1:40-45; Luk. 5:12-16)
1Yefun Yesus is kadit bobuk sa, yé mwa boribot An. 2Yetu ge dik yo gato suki borbuk git ne ma mo Yefun Yesus. An tu an umsu mo Yefun Yesus gwem, orete an ki do, ”Yenggras, Nan imo yo, Nan nggiwa Nan ben ji ge kadit suki ré, subere ji yo fowa ku ye yi o nde.”
3Yefun Yesus bes An syim, ete syimtok ye ne sa, Yefun Yesus ki do, ”Ji iwa, nan ge tom!” Yefun Yesus do ki or-i, ye ne ge-i, an kaim ndo satu re. 4Orete Yefun Yesus ki nai ye ne do, ”Nan jammo suk gato Ji ki ré et. Nan mu nan nuk sukdu subot suk gato Ji ben ne nai ye yi daret nde, wo nan mu kadum nan nggwa nai yesu gato ben suk mo Yefun Allah bi nu subere an watbot nan. An watbot nan, ete yesu ne ki do, sangge, nan ge it, sane yo nan gwat suge sato Musa ki ne ma tepsu suksom. Nan syo nai yesu ne gre mo bot subere ye jam do, nan ge it anare.”
Yefun Yesus ben ye Roma bi yesukmise bi pakwerut dik yo ge
(Luk. 7:1-10)
5Yefun Yesus mu kom mo kota Kapernaum sa, ye Roma bi yesukmise bi yesu ge dik yo ma ku Yefun Yesus. Yesu ne ndekwa Yefun Yesus ós an, 6an ki do, ”Yenggras, ji bi pakwerut i, an kem mo nu, an yo mu ndo nde, an ku sukye ndo nde.”
7Yefun Yesus ki nai yesukmise bi yesu ne do, ”Bere Ji mu ben pa ne ge et.”
8Orete yesukmise bi yesu ki do, ”Nan yo mu nde. Ji damen teker wa Nan ma mo ji bi nu. Wo Nan syogat suki ne titi wé kadit ji bi pakwerut, Nan ki kadit pe gato Nan ti more sor re, we ji jam do, Nan ki suk more, bere ji bi pakwerut motu ge re. 9Sane, ji dom, ji jammo suk gato ji bi yekwesu syogat ji ben ne. Ji bi pa yesukmise jammo ji dom. Ji syogat pa yemsok dik yo do, ’Nan mu tom!’ yo, an mu re. Ji syogat pa dik yo o do, ’Nan ma se!’ yo, an ma re. Ji syogat ji bi pakwerut ne do, ’Nan ben suk ré et!’ yo, pa ne ben re.”
10Yefun Yesus jam yesukmise bi yesu bi sukdu ne sa, An yeket, ete An ki nai yé bok yo gato simo An mone do, ”Mban! Ye gare sa. Suk gato Ji ki ré suksangge anare, mo ye Israel bok ne sino, Ji yo ku ye gato onyar kem mo Ji tepsu ye gare mo nde. 11Ji ki sare do, bere su kam sari ne ma yé mwa git sugit mo pesta sye mo pe gato Yefun Allah jowa nje tepsu men bi Yekwesu, sarewo yewis ye Israel gato bi yepasye mo Abraham e, Isak e, si Yakub ne bere yo mwa nde, wo yewis yi mwa kadit bur ré iwedewe si yepasye ka gri ne bere git sugit sino mone. 12Wo yé Israel mwa gato Yefun Allah fro wa sok mo Yefun bi rus-i, bere Yefun Allah bariwa re, bere Yefun bare án mu mo nden mo pe gato ndendu. Mone án wo ndo nde, án nderku án dakai.” 13Orete Yefun Yesus ki nai yesukmise bi yesu ne do, ”Nan mu sor. Suk gato nan onyar kem mó, bere bor mone.”
Sugane it, yesukmise bi pakwerut ne ge re.
Yefun Yesus ben yé mwa ge kadit án bi suki
(Mrk. 1:29-34; Luk. 4:38-41)
14Yefun Yesus mu mo Petrus bi nu. Mone, An ku Petrus bi om. Petrus bi om ne i, mom kaim kam teker. Petrus bi om sem mo bi kwatka sor. 15Yefun Yesus ma syimtok nggongras ne syim, orete nggongras kaim dek satu re. Nggongras ne ge re, sane mom sun, mom gwat sugit si syur wa Yefun Yesus git.
16Kam bok, ndendu, yé gwat yé mwa gato semda ben ne ma. Yefun Yesus ki sukdu kwa dik yo, kwa we yo sor re, ete An syun semda mwa ne titi wé, ete An ben yé mwa gato i ne ge sino. 17Yefun Yesus ben ye gato i ne ge subere suk gato Yefun Allah tarubot yenabi Yesaya ne bor re. Yesaya ki do, ”An ma wa sombok men wé kadit sukye gato men ku ne, An syun men bi suki wé kadit men.”
Ye gato iwa simo Yefun Yesus
(Luk. 9:57-62)
18Yefun Yesus me yé mwa sum wairi wa An sa, Yefun Yesus syaugat An bi pakon mu mo em deta. 19Orete yeguru agama dik yo ma, ete ki do, ”Yeguru, ji kwop o, ji mbau o, ji simo Nan mu mo pe gato Nan mu mone petok sor.”
20Yefun Yesus ki do, ”Ndar krok sa, bi jokwak wa kem mó, ndam sa, bi bat wa kem mó, wo Yetu bi Pa to Ji ré yo ku nat wa Ji kem not yo mo nde.”
21Yetu ge dik yo o gato simo Yefun Yesus ki do, ”Yenggras, ji mu ji bi ji bi ai mo makwe orete yo, ji simo Nan.”
22Sarewo Yefun Yesus ki do, ”Nan misyar ye gato jam nde Yefun gato bi sukjimnut kwop ne dakai mu bi yekwop mo makwe sor. Nan simo Ji kadit.”
Yefun Yesus syogat nofuf gato kas nggi ne kro
(Mrk. 4:35-41; Luk. 8:22-25)
23Yefun Yesus it mo kwem dik yo, orete An bi pakon waii it mo kwem ne dom. 24Án sino bi win mo em ne sa, án gensu nofuf sye is ma ben em sok mo kwem mit, bergan kwem kru rok. Sugane Yefun Yesus sem. 25Sane Yefun Yesus bi pakon sun An, ete pakon ne ki do, ”Yenggras, bergan kwem kru su men it anare. Nan ós men tom!”
26Yefun Yesus ki do, ”Nin nyu wa suma ne? Mban! Nin yo onyar kem ri mo Ji nde tó go!” Yefun Yesus ki sane, orete An sun, An syogat nofuf ne not, An syogat em gato nap ne kro. Sugane it, em si nofuf ne kro re.
27Pakon bok ne sino yeket suk gato Yefun Yesus ben ne. Án ndobot yu do, ”Mban! Je u ana ré ne? An syogat nofuf si em nap, ete nofuf si em nap ne jammo An re.”
Yefun Yesus syun semda wé kadit yetu ge we gato semda ben ne
(Mrk. 5:1-20; Luk. 8:26-39)
28Yefun Yesus ma kom mo bur Gadara mo em deta sa, yetu ge we gato semda ben ma ku An mone. Ye we ne kem mo jokwak gato ye bi yekwop mone. Semda ben ye we ne, anato ye we ne ben bi suk-i ne ot, sane yé yo muket os ne nde. 29Semda ben ye we ne saiye ket Yefun Yesus do, ”Yefun Allah bi Gan, Nan ma ku men wa suma ne? Men yo kom mo kam gato Yefun Allah ma ndobot men yetu nde tó, ete Nan ma wa ben sukye nai men su mit ré bado?”
30Sugane jot mwa git sugit karo mone, 31sane semda ne ndek Yefun Yesus do, ”Nan syun men it yo, Nan syogat men sok mo jot mwa ne et.”
32Sane Yefun Yesus ki do, ”Nin mu se!” Sane semda ne sombok kadit ye we ne ete mu bok nggwa mo jot, or semda ne ben jot mwa ne sino kasbot kwoye mu ges ngga mo em mit, ete mbon re.
33Yé bok yo gato mewa jot ne titi mu mo kota. Án kom mo kota ne sa, án nukbot suk mwa ne nai nje mone jam. Án nukbot suk gato Yefun Yesus ben su ye we gato semda ben ne. 34Sane yé mwa mo kota ne sino mu ku Yefun Yesus. Yé ku Yefun Yesus sa, yé ndek mo An do, ”Nan mu kadit men bi nat-i ré et.”
Atualmente selecionado:
Matius 8: KGR
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
@LAI 2004, 2014