Lucuotuv 22
22
1“Uvnu zaw'a nata paa zaw, niema hmie lieta i sue linapa bie i ripa hing naa na thliepa tie ung.” 2Hebru ryi ta a ripa kha ama thyi tiyta ama die karing. Cakhutaacata,
3“Kama ca Silisia ruo Tarsas khy lieta a puvpa Judah ming tana i cuo, cuorasala i lenapa ca hingpa khy hingta a cuo. Gamaliel kuv raw lieta mingchingmingvuo tie zaw phungbie kha pacuvpa ta cuo ang te niema zaw bangkhuo haahingta Khazing cuota a pipa tana i cuo. 4Hing Phungluo a ziypa tie hing thiyna te ta za hrisaa yi ang te, canung capaa ta patuv yi ang te thaw-ing luo i za khungpa yi kha 5tluobyilecepa hne bierituvphuv uvthyi tie bangkhuo hing naa pachangtuv ta ama cuo. Iema'a taahingta Damaskas khy lie a awpa uvnu zaw pi riypa caa kha a la ang te, capa lie a awpa tie ca patuv pata, cakhiy pata, Jerusalem luo chiykhyipa yi ta duo te riypa yita i si hning yi.
Paul Ta A Palung Aa Thlena Kaw A Chang Yi
6“Damaskas luo ca si ang te i pha tyalya caw, ningchung hraw khiy ta avuo taata khena ta sungkha ta ina za ka. 7Alyi lie a lie ang te ueryi suokha i thyipa ca, Saul, Saul, khaapanakawma ina hrisaathierue ciy?’ ina ta. 8Kama ta, “Abyipa, ahung tama na cuo?” i ta. Cakhutaaca ama ta, “Na hrisaathierue nguoluopa Nazareth Zingsuv tana i cuo,” ina ta. 9Kama'a lie a aw rapa tie ta khena dyi kha hmung yite kama'a lie bie zaa ripa ueryi kha thyi vayi. 10Kama ta, “Abyipa, Khaapama i tue aa?” i ta. Abyipa ta, “Thu la Damaskas luo kha si tie; Khazing ta hrie riypata aca pipa bangkhuo ca aca chang'a yi,” ina ta. 11Khena ta ina khetuv nakawta i ming ca hmung the li pata i viesaa zaw khata i kuv ta na ca-yale yite Damaskas luo inaa chiyle yi.
12“Phungbie kha ziy te Khazing'a luo aa pipasesa nakawta capa lie a awpa Judah ming bangkhuo ta ama rithuophaapa Ananias ama tapapaa kha 13a vaw te, i thaa lie kha a daa te, ‘Uvnu Saul, hmung pakhaa tie!’ ina ta. Capatahne cata i ming ca vuo te ama kha i hmung. 14Cakhutaaca ama ta, ‘Ma mingchingmingvuo tie Khazing ta a khingna na pachang riypa hne, aa dangpapaa na hmung riypa hne a ueryi na thyi riypata acaa tlaw tli; 15tahematapakieca hing chuelyi lieta na hmungpa hne na thyipa bangkhuo hing a cuota pachangkhyituv riypatana na cuo aa. 16Cacuonakawta khaapama na haasaa? Thu la tiy a naw tie, ama ming kha u la na suena kha pathe sa tie,’ ina ta.
Jentail Ming'a Luo Paul A Pathlie
17“Jerusalem luo i kaa khu taata biena-ing lie thlaa i chuo nguoluo ning kha muocuo hmung ang te, 18Zingsuv ta, ‘Jerusalem taahingta a catli pata pya tie, tahematapakieca kama kaw tehte na khuopa kha cuhluo vayi,’ a ta. 19Kama ta, ‘Abyipa, apungna-ing ting ta vaa ang te nama caa zangpa tie kha tuv yi ang te thaw i pathlapa yi kha iema ta ama pachang. 20Cakhutaata, nama kaw pachangkhyituv Steven thiyse palang yite ama thie ning zaw kha kama hrahring amaa thaa lie a daa ang te, palung tlingsa pata, ama a thiepa tie buohryicungle kha i kingpa yi,’ i ta. 21Cakhutaa, ama ta, ‘Cakuo tie, tahematapakieca Jentail ming hraw luo na ica pathlie aa,’ ina ta,” a ta.
Paul Hne Rom Riebyipa
22Paul bie ripa kha ama te hing ca naa ama thlie, cuorasala ama khutaa ca, “Hingpaapa cawsaa hing chuelyi lie aw kha se! Thie tie ung! Hring a tla vyi! ta yite ama khi. 23Ama khi nguoluo ning ca ama pang kha cathlu yite buvcing kha avuo luo ama hi. 24Riebyipa cata khaapanakawma hing tluv ta a du yite ama khi tapa kha pachangna riypata Paul kha riekate luo a chiy ungla, tuv ungla, bie hiehriy tie ung, tapata naw a pi yi. 25Cuorasala tuv riypata ama cakhiy khupa khiy ta, a thaa lieta a daapa riebyipa kha Paul ta, “Rom ruo ming pakha kha a bie ripa li pata tuv phung a cuo ma?” tapata a hiehriy. 26Riebyicawpa ta a thyi tiyta riebyipa'a luo kha vaa te, “Khaapama na tue'a nang? Amapaa hing Rom ruo ming tana a cuo tli hing,” a ta. 27Riebyipa ta a vaw te Paul kha, “Na chang tie, Rom ruo ming ta na cuo ma?” a ta. Ama ta, “I cuo,” a ta. 28Riebyipa ta, “Rom ruo ming cuona hmung riypa hingta tuokaa a hluvsa i pachuo,” a ta. Paul ta, “Kama ca i zaa puvkhyipa tana Rom ruo ming i cuo,” a ta. 29Bie a hiehriy'a nangpa mekaa ca sungkha ta a saw se diy yite; Rom ruo ming a cuopa Paul a cakhiy tlamu nakawta riebyipa zaw kha a thlaa a zang.
Bierituv Phuv Hmielie Paul
30Riebyipa ca Judah ming ta Paul sue ama phawpa hing khaapanakawma a cuo tapa kha a pachang khing nakawta a mawluopa ta Paul ca pathlie te tluobyi tie hne bierituv tie bangkhuo kha a hmya riypata naw a pi yi. Paul kha a vya chiy te ama hmiekunglie a padaa.
Atualmente selecionado:
Lucuotuv 22: LNT1
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
New Testament in Chin Lautu © Bible Society of Myanmar, 2015.