Logótipo YouVersion
Ícone de pesquisa

Lucuotuv 23

23
1Paul ta bierituvphuv kha a hmiepachaw pata mang yite, “Uv zaw nu zaw,#23:1 Gk Cawsaa zaw ata ning tepa hingta ca i hringna lie hing Khazing hmiekunglie i chiephathleduona palung a pathe,” a ta. 2Capa bie a ri khu pahne cata tluobyilecepa Ananias ta Paul a thaalie a daapa tie kha a hmyataw cabe riypata naw a pi yi. 3Paul ta ama kha, “Nama, thungruopa a thuvpa lungruetlepie, Khazing na nama kha caa cabe aa, Phungbie haata kama bie ripa riypata naa tu thluopa hingtama, nama ta phungbie para cate cabe ungla ina ta ciy?” a ta. 4A thaalie a tupa tie ta, “Khazing tluobyilecepa na na ese,” ama ta. 5Cakhutaa, Paul ta, “Uv zaw nu zaw, tluobyilecepa a cuopa kha i pachang li nakawtana a cuo; Caapathepa lieta, “Na mingphang luochiytuv kha a thuo pachi'a va ungciy a ta,” a ta yi.
6Paul ta chekha tie kha Sadusi ta cuo yite chekha Farasi ta ama cuopa kha a pachang tiyta, bierituvphuv tie kha, “Uv zaw nu zaw, Kama ca Farasi tie, Farasi tie saata tana i cuo. Hingpa lieta bie ripa riypata i cuopa hing a thiypa tie ama thupakhaa aa tapa a ruechuona i hnyi nakawta a cuo,” a ta. 7Capa bie ca a ri tiyta, Farasi tie hne Sadusi tie a lala lie kha ruena a che te a hmyapa tie ca phuvhning ta amaa che. 8(Sadusi tie ta, thupakhaanapa, a cuo li kie avuoming, a cuo li kie thlaapa aw vyi ama ta, cuorasala Farasi tie taca a suothung ta ama zang diy.) 9Khuopuv ta a i yite, Farasi phungbie saya tie kha a daa yite, “Hingpapaa hing a suenapa suokha hmuo hmung va puv. Thlaapa a cuo li kie avuoming ta ama chang sasaw pata a cuo khu,” ama ta. 10Khuopuv ta amaa i nakawta Paul kha a chuv'a yite thlaachi diy'a kie yi tapata riebyipa kha a thlaa a zang. Cacuonakawta Paul kha hruohra ta za la pata riekate luo chi riypata rieka tie kha naw a pi yi. 11Capa zuopa cata Abyipa kha a thaalie a daa te, “Khaapahmuo ciy kha! Tahematapakieca Jerusalem lie kama cuota tehte na khuopa haahingta Rom lie zaw kama cuota tehte na khuo kalie aa,” a ta.
Paul Kha Thie Riypata Ama Raw
12A mawluomawpa ta Judah ming ca a paruvta tah a taw yite khue pha lipa ama khuo. Paul ma thie hluo li sa ning li tiy dang li patana ma aw aa ta yite bie amaa kuo. 13Capa a paruv ta khue pha lipa ama khuona lieca cawsaa sawliy hlyi ama ta. 14Iema ca tluobyilepa tie hne uvthyi tie'a luo kha cakuo yite, “Paul ma thie hluo li sa ning'a va puv tapatana a cusa pata bie maa kuo. 15Cacuonakawta niema hne bierituv phuv tie ta, a kaw hingna a sie vie ta ma hiehriy khing e dya ta ungla Paul kha niema'a luo a za pathlie riypata riebyipa kha hie tie ung. Hingpa luo hing a za chiy hluo ta ma thie aa,” ama ta.
16Cahaa cata thie riypata ama byapa kha Paul a tuvpaapa ta a pachang nakawta riekate luo kha vaa te Paul kha a chang. 17Paul ta riebyipa pakha kha ku te, “Hingpapaa hing riebyilepa'a luo kha vaakhyi tie, bie chang riypa na a hnyi,” a ta 18Cacuonakawta vaakhyi te, “Thaw a tlapapaa Paul khata na ku tena hing satliepapaa hing bie chang riypa a hnyi nakawta nama'a luo vaakhyi la ina ta,” a ta. 19Riebyipa ta a kuv ta ca-yale te ama selaw ta a cakuokhyi khu taata, “Khaapa bie ma ina chang khing ciy? tapata a hiehriy. 20Ama ta, “Judah ming ta Paul kha a kaw na a sie vie ta ma pachang khing dya tapata bierituv phuv hmiekung luo chiykhyi riypata nama'a luo hie riypa kha palung tlingna ama hnyi mangtli. 21Cuorasala ama bie kha zang lie ciy, cawsaa sawliy hlyi na ama thie riypata luopuv lieta a bya yi. Paul ma thie hluo li ta sa ning li tiy dang li patana ma aw aa ta yite bie amaa kuo mangtli. Iema ca a ting pacie diy pata aw yite nama biechina hingna ama huo thluo,” a ta. 22Cacuonakawta riebyipa ta “Hingpa kaw ina changpa cahing ahunghmuo chang khue,” ta te satliepa kha a pathlie.
Paul Kha Muokiybyipa Feliks'a Luo A Pathlie
23Riebyipa cata riebyi pahning kha ku yite, “Ata zuo siymaluo pacaky ta Sisaria luo si riypata rieka zahning, aruo rieka sawsariy, hne asyi rieka zahning kha a pachie pacie pata chi tie yi. 24Paul aa khang riypa aruo zaw kha pachiepa la muokiybyi Feliks'a luo kha abang-asusa pata chiykhyi tie ung,” a ta. 25Riebyipa ta a raw luo haahingta caa a cape:
26“Kalaudias Lisias na Muokiybyipa Feliks'a luo bie a changna caa caa paphya ang. 27Hingpa cawsaapa hing Judah ming ta patuv yite thie amaa nang, cuorasala Rom ruo ming a cuopa kha i pachang tiyta i rieka tie hneta ama kha ma khuo. 28Khaapanakawma ama hing sue ama phaw tapa kha i pachang khing nakawta bierituv phuv luo kha i chiykhyi. 29Iema phungbie hne a patuv pata sue ama phawpa ta cuote thaw pathla riypa hne thiy riypata aa phuvpa suena suokha hmuo hnyi vyi. 30Ama kha raw yite thie amaa nangpa thuo i thyi tiyta, nama'a luo ca za paphya ang te, sue a phawtuvpa tie zaw kha nama hmiekung luo tazaa va cyi ungla i ta yi,” a ta.
31Cacuonakawta, rieka tie ca nawpipa ama cuopa haata, Paul kha va la yite zuo ta Antipatris te ama sikhyi. 32A mawluopa ca aruo rieka tie kha pathlie sa yite, iema ca riekate luo ama vya kaa. 33Sisaria luo chiy yite caa kha muokiy byipa ca ama pi; Paul zaw kha a kuv luo ama pi ra. 34Caa kha ri te, Paul kha khaapa pe ming tama a cuo tapa kha hiehriy te, Silisia pe ming a cuopa kha a pachang ca, 35“Tazaa caa cyipa tie ama vya chiy taatana na bie ica ripa aa,” a ta. Cakhutaata ama kha Herod siepahruo ing lie kha rieka ta huo riypata naw a pi yi.

Atualmente selecionado:

Lucuotuv 23: LNT1

Destaque

Partilhar

Copiar

None

Quer salvar os seus destaques em todos os seus dispositivos? Faça o seu registo ou inicie sessão