Matiu 28
28
Yisọs aset ke ñkpa
1Ke usen Sabad amaakeboiyo, ndin ke ayo amaakeka isieere ke akpa usen ke udua, Mmeri Makdadin ye Mmeri anye ako emaeka adikise udi.
2Ndin ini keed ini keed, ata akpọsọñ unyekisọñ amaaba, sia enyere Abọọñ, a-aketooho ikpaanyọñ adi, amaadiwere itiad asio anyʌñ adọọk atie ke anyọñ ado. 3Iso amọ akeba nte akepkep, afọñ amọ anyʌñ afia nte sino. 4Ndịk amaanam mme akpeme udi tutu ammọ editie nte mbon ñkpa.
5Ado enyere amaabo ibaan ado ate, “Ufọn ndufo adikop ndịk ibaaha, mmediọọñọ ke eyem Yisọs e-ekekọññọ ke krọs.” 6Anye ibaaha mi, sia anye aset ke ñkpa naña anye akebo. Idi idise itie a-anye akenaaha. 7“Ndin isọsọp ikaa ikidọkkọ mme mbed amọ ete, ‘Anye aset ke ñkpa, ndin idahami anye ibem ndufo iso aka ke Kadidi; do ke ediikịt anye.’ ”
8Ke uteñe ye akwa idaara mme ibaan ado emaesọsọp ekpọñ itie udi enyʌñ efeghe eka adidọkkọ mme mbed amọ. 9Ke ndo-ndo ado, Yisọs asaña adibịne ammọ. Anye abo ammọ, “Mmi kọọm-o!” Ndin mme ibaan ado edibịne anye, eduọññọ anye ke ukod enyʌñ ekpono anye. 10Ndin Yisọs abo ammọ ate, “Ikiifeghe ndịk, ikaa ikidọkkọ nditọeka mmi ibo yak ammọ eka ke Kadidi; ndin ammọ eyaeñkịt miin do.”
Mme akpeme udi etañ se ikitịppe
11Ke ammọ emaekedaaña, ubaak mme ekpeme udi edaaña edʌk abio edidọkkọ mme ikpọ aku afịd se ikitịppe. 12Mme ikpọ aku emaesoobo ye mme mbọọñ, ndin ke emaekenam edioomo ema, ekpọñ uwak akʌk enọ mme mbon ekọñ, 13enyʌñ enọ ammọ ewuuk ami, “Ikop se ediitañ mi, ‘Mme mbed amọ ekedi ke akonayo, idaha ñnyịn idaiyake, ediyịp anye.’ 14Ñko adaiwuod ukara akpekop ñkpọ ami, ñnyịn imiñwọñọ adinam afịd ñkpọ adikịt mbo ke ndufo idʌkkọ mfịna.” 15Ammọ emaebọ akʌk ami enyʌñ enam naña mme ikpọ aku eketemme ammọ, ndin mbʌk ami asʌk ababa ke atu mme Yuu tutu asịm usen mfịn.
16Ke ukem ini ado, mme mbed duob ye keed emaetọọñọ isañ eka Kadidi, ke anyọñ abod a-Yisọs akebiireke adisoobo ye ammọ. 17Ke ini ammọ emaekekịt anye, ammọ emaeduọññọ anye ke ukod, akpesʌk ado ubaak ammọ ekenieeghe eyịghe. 18Yisọs adi aditañ ikọ ye ammọ. Anye ate, “Eyaak afịd adudu ke anyọñ ye ke isọñ ennọ miin. 19Ika ndin ke afịd mme idịd, ikọ mme mbed, iduọk ammọ mmọọñ ke anyịñ Ete, ye Ayịn ye Adisana Sịbidịd, 20inyʌñ ikpeeb ammọ adinịm afịd mme ibed a-ami ñkinọọhọ. Ndin sese, ami mbaba ye ndufo afịd ini, tutu utịd ederimbod.”
Atualmente selecionado:
Matiu 28: NAAM
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.