Matiu 27
27
Yudas ayịd idem awot
1Ke ubahausen, afịd mme ikpọ aku ye mme mbọọñ abio emaedioomo ebaña usʌñ naña ediiwot Yisọs. 2Ammọ emaebọp anye enyʌñ eka adiyaak nnọ Baided, adaiwuod ukara.
3Ke ini Yudas, awo a-akenyamma Yisọs anọ mme Yuu, amaakekịt ke ebiooro ikpe ñkpa enọ Yisọs, anye amaatua ñkpọfiọk abaña ndudue amọ anyʌñ aben akpoho edịb ye duob a-anye akebọọhọ atịmme asọk mme ikpọ aku ye mme mbọọñ. 4Anye amaabo ammọ ate, “Ami mmenam idiọọkñkpọ ke aditap iyiib a-mmiidueeghe.” Ammọ ebọọrọ ete,
“Anye ado awuọọñọ so inọ ñnyịn? Ndubeghe mfo ado ado.”
5Ndin anye atoomo akpoho ado abono ke tembịd anyʌñ adakka akeyịt idem awot.
6Mme ikpọ aku ekoono akʌk ado enyʌñ ebo ete, “Ibed akpan adisịn akʌk ami ke ufọk unịm akʌk; ado akʌk iyiib awo.” 7Ammọ emaeneme ebaña ñkpọ ami enyʌñ eben akʌk ado ekedep isọñ edat enịm itie ubuuk awo enọ mme isenawo. 8Ntak adodo isọñ ado akereke Isọñ Iyiib tutu asịm mfịn ami. 9Ndin ikọ a-brọfed Yerimaya aketañña amaasu: “Ammọ emaeben akpoho sịrifa edịb ye duob ado, ekọmudua a-nditọ Isred ekenyịmmeke adikpe ke iwuod amọ, 10edep inwañ bọta kpa naña nte Abọọñ akentemme.”
Yisọs ke iso Baided
11Ndin emaeben Yisọs edi ke iso adaiwuod ukara, ndin adaiwuod ukara amaabịp anye mbịme ami, “Afo ado adidem mme Yuu?”
Yisọs abọọrọ ate, “Akap ado afo atañ.”
12Ado ke ini mme ikpọ aku ye mme mbọọñ emaekedot anye uyo, anye amaasịn adibọọrọ ammọ ikọ. 13Ndin Baided abo anye ate, “Nte afo ukoppo afịd ikọ se udot fiin ami?” 14Ado ke ata ñkpaidem adaiwuod ukara, anye ikibọọrọke ikọ ndomokeed ke abaña mme ndoduyo ami.
15Ke ini usọrọ, adaiwuod ukara amaasiyaak awo ñkpakọb keed ake adodo a-mbon idʌñ eyemme anọ ammọ. 16Ata abʌd-abʌd awo ñkpakọb keed amaaba a-kekereke Barabas. 17Anam ke ini atu awo emaekeboho, Baided amaabo ammọ ate, “Anie awo ke eyem ñyaak inọ ndufo: Barabas me Yisọs e-ekoodo Mesaya?” 18Baided amaadiọọñọ abo ke ato ke ntak ufịb ke ammọ ekeyaak Yisọs inọ imọ.
19Idaha Baided aketieeghe ke itie ubiire ikpe, anwaan amọ amaanọ etob asọk anye ate, “Kuunie ñkpọ ndomokeed adinam ye eti awo ado; esịd antịmede miin mfịn ami ato ke ndab añkedappake mbaña anye.”
20Ado mme ikpọ aku ye mme mbọọñ emaedọọñ atu awo ete yak ammọ ebo yak Baided ayaak Barabas ado atịmme awot Yisọs.
21Anam ke ini adaiwuod ukara atañña ikọ anyʌñ abịp ammọ ate, “Anie ke atu ammọ awo iba ke ndufo eyem ñyaak inọ?”
Ammọ emaebo, “Barabas.”
22Baided abo ammọ ate, “Ke ntodo, nso-o ke ndufo eyem nnam ye Yisọs e-ekoodo Mesaya?”
Afịd ammọ, ete, “Kọñ anye ke krọs!”
23Anye abịp ate, “Ntaha? Nso-o ke anye anam?”
Ado ammọ enenekke ebọọñ ete, “Kọñ anye ke eto!”
24Ndin Baided akekịt ke inieeghe se imọ ikeme adinam, ñko ke atu awo eyaetọọñọ ntịme, anye aben mmọọñ ayie ubọk ke iso atu awo anyʌñ abo ate, “Ami nsañake ñkpọ do ye iyiib awo ami. Ado ndubeeghe ndufo!”
25Ndin afịd atu awo ebọọrọ ete, “Yak iyiib amọ idoro ñnyịn ye nditọ ñnyịn ke iwuod!”
26Do ke anye ayaak Barabas anọ ammọ. Ke ini anye amaakenam nọ emia Yisọs ema, anye amaayaak anye anọ ammọ nọ ekọñ anye ke eto.
Mbon ekọñ edọọñ Yisọs ndọk
27Ndin mbon ekọñ adaiwuod ukara emaeben Yisọs edʌk akwa ekwere adaiwuod ukara enyʌñ eben afịd udịm mbon ekọñ ekanna anye ekʌk. 28Ndin ammọ emaesio anye afọñidem amọ enyʌñ eben iduod-iduod afọñ ewañ anye. 29Ke emaekedok ñkukịm nte anyanya emaeben edot anye ke iwuod enyʌñ eben esañ esịn anye ke ubọk udom, etọọñọ edọñ enọ anye, edọọñ anye ndọk enyʌñ ebọ ete, “Imukọọm fiin, adidem mme Yuu!” 30Ndin ammọ emaefiad anye etap enyʌñ ebọ anye esañ ado emia anye ke iwuod. 31Ke ini ammọ emaekesuenne anye ema, ammọ emaesio anye iduod-iduod afọñ ado enyʌñ eben afọñidem amọ esịn anye, ndin eben anye eka adikọñ ke krọs.
Adikọñ Yisọs ke krọs
32Ke ammọ emaekewuọ, ammọ emaekịt awo keed a-aketooho Sirin, a-akekereke Saimọn. Ndin ammọ emʌm anye enam anye abiom krọs ado. 33Ke ini ammọ emaekesịm itie keed e-ekoodo Kọọdkọta (awuọọñọke “itie ñkpọkpọrọ”). 34Ammọ emaenọ anye idod-idod mmịn, a-anye aketʌmmọ ado asịn adinwọñ. 35Ke ini ammọ emaekekọñ anye ke krọs ema, ammọ emaesịn ukañ ebaaña afọñidem amọ. 36Ndin esuuk etie do ekpeme anye. 37Ke anyọñ eto ado emaewet ikọ e-ekedotto anye; ete:
Ami ado Yisọs, Adidem mme Yuu.
38Ndin emaekọñ mme inọ iba edian anye, keed ke ubọk udom, keed ke ubọk ufiin. 39Mme mbon se ikiboiyo ke usʌñ esue anye, efʌñ iwuod, 40enyʌñ ebo ete, “Afo a-abooho iwuud tembịd amaana adat usen ita abọp, nyaaña idem mfo! Akpedo ado Ayịn Abasi sọiyọ ke krọs di!” 41Mme ikpọ aku ye mme skraib ye mme mbọọñ emaesak anye ke ukem-ukem usʌñ ami. 42Ammọ emaebo ete, “Anye akenyaaña mbon mfen ado ikanna inyaaña idem amọ. Anye ado adidem Isred; yak anye asọiyọ ke krọs adi idahami, ndin ñnyịn iyainịm anye ke akpanikọ. 43Anye anịm Abasi ke akpanikọ; idahami yak Abasi anyaaña anye adieke ayemme anye, sia anye akebo, ‘Ami ndo Ayịn Abasi.’ ” 44Idem mme inọ e-ekekọññọ ke krọs edian anye ekeene esuenne anye.
Ñkpa Yisọs
45Tọọñọ ke ayọhọ awa itiokeed akịm amaafʌk isọñ tutu ayọhọ awa usʌkkeed. 46Ndin ke ñkpọ nte ayọhọ awa usʌkkeed, Yisọs amaabọọñ ke akpọsọñ uyo ate, “Eli, Eli, lema sabaktani?” (Ikọ ami awuọ, “Abasi mmi, Abasi mmi, nso-o inam afo añkpọñọ miin?”).
47Ke ini ubaak mbon e-ekedaaha do ekekoppo ñkpọ ami, ammọ emaebo ete, “Awo ami akood Edaiya.”
48Ndin keed ke atu ammọ asọsọp afeghe akedat kusa anyiin ke fineka, aben atot ke eto anyʌñ anọ anye anwọñ. 49Ado mbon ako ete, “Bet se me Edaiya ayaadinyaaña anye.”
50Ado Yisọs atua ke ekamba uyo ini keed mfen, anyʌñ ayaak sịbidịd amọ.
51Ndin kpa idahado, afọñ ikpeghe tembịd amaasakka iba tọọñọ ke anyọñ asịm isọñ, isọñ anyek, mme itiad esaiya, 52mme udi ekuumọ, ndin uwak mme ndisana awo eset ke ñkpa, 53ndin ammọ ado, ke ini Yisọs amaakeset ke ñkpa, emaewuọọñọ ke udi edi, edidʌk edisaaña ke adisana abio, enyʌñ ewọt uwak awo idem ammọ.
54Sentudiọn ye mbon mfen e-ekekpemeke Yisọs emaekịt unyekisọñ ye afịd se ikitịppe, ndin ammọ emaekop ndịk enyʌñ ebo ete, “Ke akpanikọ, awo ami akedo Ayịn Abasi!”
55Ñko, uwak ibaan emaeba do, eda nsan-nsan ese, kpa mme ibaan ado e-ekekeeneke Yisọs tọọñọ ke Kadidi enyʌñ ese ñkpọ ebaña anye. 56Ubaak ke atu ammọ ekedo Mmeri Makdadin, Mmeri eka Yemsi ye Yosef, ye eka nditọ Sebidi.
Ubuuk Yisọs
57Ke ndubi, anie ñkpọ awo keed a-aketooho Arimatia, a-akekereke Yosef, anye ke idem amọ amaakekappa mbed Yisọs, amaadi. 58Anye amaabịne Baided akebịp anye akpo Yisọs. Ndin Baided anọ uyo ate eyaak enọ anye. 59Ndin Yosef amaaben akpo Yisọs awañ ke nsasana afọñ, 60anyʌñ asịn ke ufa udi amọ a-anye akedọkkọ ke aba itiad. Anye ndin awere ekamba itiad asiid inua udi ado anyʌñ adakka anyọñ. 61Mmeri Makdadin ye Mmeri anye ako emaeba do; etie esak iso ese udi.
Adikpeme ke itie udi
62Edem usen, ado ado ke usen Mbeeñe Idem amaakekweeñe, mme ikpọ aku ye mme Farisi emaesaña keed ebịne Baided. 63Ammọ ebo anye, “Abọọñ awo, ñnyịn imitoiyo ibo ke awo abiaaña ami, ke ini anye akebaaha ke uwem, amaabo ate, ‘Nyaaset ke ayọhọ usen ita.’ 64Anam ke ntodo, nọ uyo bo etʌm ekpeme udi ado tutu ayọhọ usen ita, mbaak mme mbed amọ edidiyịp anye etịmme ekedọkkọ mme awo ebo ke anye aset ke ñkpa. Abiaaña anye ami ayaadiọọk akan ake akpa.”
65Baided abo ammọ ate, “Idat akpeme udi keed, ika ikinekke ikpeme itie ado naña ndufo ekpekakan.” 66Ammọ emaedakka ekenekke ekọp udi, edian mme idiọọñọ ke itiad udi enyʌñ enịm mme mbon ekọñ do.
Atualmente selecionado:
Matiu 27: NAAM
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.