ỊJỌN 3
3
IJisọsị Bala INikodimọsị
1Ọlẹng ọhẹ juwa kị wụrụ ẹnyị nyamwụ iNikodimọsị. Ọ ri olegbeju nya ala iJuu, ọlẹ kọ ji ẹpwụ nya ogu nya ala ịFarisii. 2INikodimọsị ọwẹ kele ka ẹga nya iJisọsị la odu ọhẹ kaka byoo yẹkẹẹ, “Ayịbahị ịtịcha ee, ahị jẹ́ kaahụ ayịdang a ri ọngọmẹjẹ ọlẹ ká Ohe Oluhye du warị. Chajị ọngọngọhẹ á ka họ ụma nya ụkụrwọ ẹbyẹbyị ịtụka ịwẹ ká wẹẹ họ myị́ ka, kẹnẹ-kẹnẹ, ó ri ká Ohe Oluhye ayịdang á juwa tọọ ene lẹ, mẹ ịnyị!”
3IJisọsị wẹ byoo yẹkẹẹ, “Nya ịlẹhị-ịlẹhị, m bying yẹkẹẹ, ó ri kị nwụ ọngịnyị ma onyeewe kpá ene ka aalẹ, ọngọọwa á ka jẹ́-ẹ yẹ ịpyị Adịrahụ nya Ohe Oluhye ẹ-ẹhị myị́ kaka.”
4Ụka ọọwa, iNikodimọsị tọ iJisọsị wo yẹkẹẹ, “Anyị, ị tị́ ka myịmyị jẹ́-ẹ nwụ ọngịnyị ma ụka oheeye myị́ ụka kọ ri ọngọgbahị kpá lẹ? Ọ ka jẹ́-ẹ jụ ka ẹpwụ nya ịnamwụ ụka oheeye, ịị nwọọ ma ọkịla?”
5IJisọsị wẹ byoo yẹkẹẹ, “Nya ịlẹhị-ịlẹhị, m bying yẹkẹẹ, ó ri kị nwụ ọngịnyị ma ọkịla bwula enyi bala Olegu Ịgọgọ nya Ohe Oluhye kpá ka aalẹ, ọngọọwa á ka jẹ́-ẹ jụ ka ẹpwụ nya ịpyị Adịrahụ nya Ohe Oluhye myị́ kaka. 6Jaabwọ ká ọmama nya ọngịnyị ehe warị wẹ ẹpwụ nya odehe ọlẹ ri ịnya ugbinyịrọ wẹẹ, ịnyịnyị-ịnyịnyị, ọ-nwụ ma onyeewe a tịtị ri ịnya Olegu nya Ohe Oluhye lẹlẹ! 7Chajị nya ọọwa lẹ, iNikodimọsị, ọlẹ kam bying wẹ yẹkẹẹ, ị ka myịmyị-ị̀ nwụng ma ọkịla pyii lẹ, ọ lang ahịbwuu kaka. 8Wo mẹ! Jaabwọ ká igbachịwụ á juwa da chịpwụrụ kam ká kaa wo anụ nyamwụ kem, ká tị kaa jẹ́ ẹga ọlẹ kọ juwa bwu datị lee ẹga ọlẹ kọ juwa jẹ ka datị kpong-kpong ka wẹẹ, ịnyịnyị-ịnyịnyị, ọhịhị nya ọngọlẹ ká Olegu nya Ohe Oluhye á nwọọ ma kpá lẹ, a kaa la lẹlẹ.”
9INikodimọsị tọọ wo yẹkẹẹ, “Ayịbahị ịtịcha, anyị, ẹla ọlịịwẹ a tị́ ka jẹ́-ẹ chịkpẹẹ myị́ mẹ?”
10IJisọsị wẹ byoo yẹkẹẹ, “Ahyu! Ahụ ịtịcha nya ala Isirẹlụ ayịdang lẹpwụ-lẹpwụ, á tụtụm myịmyị wo ẹlẹwẹ myịmyị ka, ịịwẹ lẹ? 11Nya ịlẹhị-ịlẹhị, m bying yẹkẹẹ, ala ịlẹ kahị jẹ́ myịmyị bala ang ịlẹ kahị kpẹhị nya ịlọhị yẹ, a wẹ kahị wẹẹ ri ibeenu nyaa ya jenu lẹ! Ma, anụ ayịdang á tị nwụlanọ nyọka wo ẹla ọọwa ju ka ụrụ, juwa kpa ọkịlẹtụ ookpokpo họ ẹla ọọwa kaka. 12Yẹ wẹẹ! Ang abwọ nya odehe ọlẹ, m wẹẹ chụ kpịta, kpa da ẹla ọlẹ kam wẹẹ ya wụlẹ jeng wẹ wẹẹ lẹ. Ma, á tị myị lam ka. Ee lẹ, anyanyị, a tị́, tị tị ka jẹ́-ẹ myị lam lụka ọlẹ kam ka mẹ ang okpori-kpori nya epwoohe jẹ lẹẹ mẹ? 13Ọngọngọhẹ ọkịla á tị kele ka epwoohe kpụ, ọ-ka bwu ụwa hireji kaka ya ẹla ọlụwa jenu ka. Kẹnẹ-kẹnẹ, Ọnyị nya ọngịnyị ehe ayịdang ọlẹ kọ bwu epwoohe hireji ụbwọọmwụ mẹ ịnyị!”
14IJisọsị myịmyị yẹkẹẹ, “Jaabwọ ká iMosisi hu okoji gu ilo nya oje-oje kpa u-uhye u-ugbileji ha anjwo nya ala Isirẹlụ ugbeene lẹ, ịnyịnyị-ịnyịnyị, ị ka hu Ọnyị nya ọngịnyị ehe ọlẹ ayịdang chọpịla u-uhye nya okoji lẹlẹ. 15Chajị ká ọng myị́ ọng ọlẹ kọ myị lọọ lẹ, ka la ọhịhị ọmyịmyị-ka. 16Chajị, alodehe ọlẹ há Ohe Oluhye lụmẹ gbee kọ du Ọnyẹwẹ olookpokpo nyamwụ warị kaka gbu wọnụ nyaa ju, chajị ká ọng myị́ ọng ọlẹ kọ myị lọọ lẹ, á ka ta ayịreji kaka. Ma, kọ ka la ọhịhị ọmyịmyị-ka. 17Chajị, Ohe Oluhye á du Ọnyẹwẹ nyamwụ ọọwa warị wẹ odehe ọlẹ nyọka ya eje wu alodehe ka. Ma, kọ ka ri Ọngọchịda nyaa ịnyị!”
18“Ọng myị́ ọng ọlẹ kọ myị la Ọnyẹwẹ ọọwa lẹ aalẹ, eje nya Ohe Oluhye á ka woo kaka. Ma, ọng myị́ ọng ọlẹ kọ tị myị lọọ kaka ene lẹ aalẹ, eje nya Ohe Oluhye woo kpá ene-ene lẹ. Chajị, ọngọọwa á myị la Ọnyẹwẹ olookpokpo nya Ohe Oluhye ọlẹ kọ ya du warị wẹ odehe ọlẹ kaka. 19Ang odudu ká eje nya Ohe Oluhye ka wu alodehe ịlịnyị ri yẹkẹẹ, Ohe Oluhye ya Ọnyẹwẹ nyamwụ du warị kọ ka ri ahịgboo nya abwẹla ọnyịịla nya Ohe Oluhye ọhọhọ há angịnyị ehe. Ma, ukpowu nya ang onyobyi ọhọhọ tị mwọọgịlẹ ha angịnyị ehe gụ ahịgboo ọọwa, chajị abwẹla ọhọhọ nyaa ri ibyi. 20Chajị ọng myị́ ọng ọlẹ kọ kaa họ abwẹla onyobyi lẹ, ahịgboo á kaa há ọngọọwa kaka. Ọngọ ọlịnyị ayịdang á tị kaa myị-ị kpa ịlọmwụ ka ẹpwụ nya ahịgboo kaka ịnyịnyị. Chajị ká ahịgboo ọọwa ka jẹ́-ẹ chị ang onyobyi ọhọhọ nyamwụ ehe kaka. 21Ma, ọng myị́ ọng ọlẹ kọ tị juwa họ abwẹla ọnyịịla nya ịlẹhị, kaa kpa ịlọmwụ ka ẹpwụ nya ahịgboo, chajị, ụka ká ahịgboo ọọwa á chị abwẹla ọnyịịla nyamwụ ehe lẹ, kị ka jẹ́ yẹkẹẹ, Ohe Oluhye nyaa wẹẹ kpa ọngọọwa họ ụkụrwọ ọọwa lẹlẹ.”
IJisọsị Bala ỊJọn Ọngọ Hụ Enyi Ohe
22Ụka ká ọlẹ chịpwụrụ kpá, iJisọsị bala angịjụgbẹyị nyamwụ rụ kele ka ịpyị nya iJudiya. IJisọsị ayịdang a juwa taa lụka ọlẹ kị juwa hụ angịnyị enyi Ohe ụ-ụwa. 23Ụka ọọwa, ịJọn ọngọ hụ enyi Ohe juwa hụ angịnyị enyi Ohe ẹ-ẹga ọlẹ kị wụrụ Ẹnọn ọlẹ kọ ju ịSẹlịm chwẹẹ, chajị enyi ọlụwa la kpori-kpori lụmẹ. Iru nya angịnyị lụmẹ-lụmẹ juwa ba ịJọn kele kaka hụ enyi Ohe nyamwụ. 24Chajị, ụka ọwẹ lẹ, ị́ wu ịJọn kpa kaka ju agba lẹka.
25Ụka ọọwa, angịjụgbẹyị nya ịJọn ịhyẹ bala ala iJuu ịkịla juwa ya ẹla da ọnụ wẹ awụlẹ u-uhye nya enyi ọ-kpa nyi ịlọ hụ ang, chajị kị ka jẹ́-ẹ la cheri-cheri ị-ịlahị nya Ohe Oluhye jaabwọ ká ehile nyaa ya. 26Ọọwa lẹ, angịhyẹ a kele ka ẹga nya ịJọn ọngọ hụ enyi Ohe kaka byoo yẹkẹẹ, “Ayịbahị ịtịcha, yẹ mẹ! Ọngọlẹ kọ juwa tang o-oye ọlaanyị nya Ihu ịJọdan, ọlẹ ká ri ibeenu nyamwụ ụka ọọwa lẹ, ọ lalẹẹ hụ angịnyị enyi Ohe, la iru nya angịnyị lụmẹ-lụmẹ lalẹẹ bọọ jẹ lẹ!”
27ỊJọn wẹ byaa yẹkẹẹ, “Anụ wo mẹ! Ọngọngọhẹ á jam, ọlẹ kọ ka jẹ́-ẹ ye iwe-ahụrụ ha ịlọmwụ myị́ kaka. Kẹnẹ-kẹnẹ, ó ri ká Ohe Oluhye á ya ọngịrị nya iwe-ahụrụ ọọwa họọ kpá ene lẹ, mẹ ịnyị! 28Anụ ayịdang tị ka rim ibeenu lụka ọlẹ kam byinu yẹkẹẹ, ám ayịdang a ri ịKịrayịsị ọọwa ka. Ma, ị dum ẹrụ du ji ịlahị nyamwụ warị kaka nwụla iwe-ahụrụ nọ gboo kem ịnyị! 29Ọngọ ri ọrụ-ahụ, a tị kaa la ahụ nyamwụ lẹ! Ụka ká oligu nya ọrụ-ahụ, á wo omyi nya ọrụ-ahụ ọọwa, ọ kaa chị ọkẹkẹnị jwoo lụmẹ. Ụma nya ọkẹkẹnị ọlịnyị, am a lẹẹ chị lẹẹlẹẹ u-uhye nya ịKịrayịsị lẹlẹ. 30Ụmụmẹ ọlala nya ịKịrayịsị ka juwa nwa kele kịlahị-ịlahị. Ma, am lẹ, m tị ka juwa ri keji-eji ẹ-ẹpwụ nya ochiche oriri nyam.”
Ọngọlẹ Kọ Bwu Epwoohe Hireji
31Ọngọlẹ kọ bwu uhye-ọgba hireji lẹ, ọngọọwa a ji iwe-ahụrụ oluhye gụụhị ahị aleji lẹ. Ọngọlẹ kọ tị bwu odehe ọlẹ ri ịnya odehe! Ẹla chajị nya odehe ọlẹ kem, ọngọọwa a tị kaa jẹ́ ya lẹ! Ọngọlẹ kọ bwu epwoohe hireji a ji iwe-ahụrụ la uhye gụụhị ahị alodehe ọlẹ lẹ. 32Ọngọọwa ọlẹ kọ bwu epwoohe hireji, warị kaka ya ang ịlẹ kọ yẹ ụ-ụwa bala ala ịlẹ kọ wo ụ-ụwa dodehe jehi lẹ! Ma, ọngọngọhẹ á tị myị la ibeenu oriri nyamwụ ọọwa kpong-kpong kaka. 33Ọng myị́ ọng ọlẹ kọ tị myị la ibeenu oriri nya ịKịrayịsị ọọwa lẹ aalẹ, ọ juwa kpa ọmyịmyị ọlala nyamwụ ọọwa yụbwọ ju ụpwụ ẹ-ẹpwụ yẹkẹẹ, Ohe Oluhye ayịdang nyị ri ọngịnyị nya ẹla nya ịlẹhị ịnyịlẹhị lẹ. 34Chajị ọngọọwa ayịdang ọlẹ ká Ohe Oluhye du ẹrụ warị lẹ, ọ warị kaka ya ẹla nya Ohe Oluhye dodehe jehi ahị angịnyị ehe lẹ. Chajị, jaabwọ ká Ohe Oluhye ayịdang ya Olegu Ịgọgọ nyamwụ ha ọngọọwa kaka ba lẹ, ọ́ ju ọ-chụ me kpong-kpong ka. 35Chajị, Ohe Oluhye Adịda la ọháha ẹ-ẹga nya Ọnyẹwẹ nyamwụ ọọwa lụmẹ kaka kpoye. Ịnyị a du kọ hu ang myị́ ang wuu ju Ọnyẹwẹ ọọwa ụ-ụbwọ lẹlẹ. 36Ọng myị́ ọng ọlẹ kọ myị la Ọnyẹwẹ nya Ohe Oluhye ọọwa lẹ aalẹ, ọ la ọhịhị ọmyịmyị-ka lẹ. Ma, ọng myị́ ọng kọ tị myị myị la Ọnyẹwẹ nya Ohe Oluhye ọọwa kaka lẹ aalẹ, ọ́ ka yẹ ọhịhị ọmyịmyị-ka ọọwa ẹ-ẹhị kaka. Ma, agbama nya Ohe Oluhye ụbwọọmwụ kẹnẹ-kẹnẹ a ka juwa tọọ pyịyọọ lẹlẹ.
Atualmente selecionado:
ỊJỌN 3: IBNO
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Igede Bible © The Bible Society of Nigeria, 2019.