ỊJỌN 2
2
Ọjịra-Jịra nya Ahụ Oyeye Ọla IKena
1Ịnyị, ụka ká ụtụrụ imiiye chịpwụrụ lẹ, ọjịra-jịra nya ahụ onyeewe oyeye ọhẹ a juwa e-epweji nya iKena ụ-ụwa ọ-ọpyị nya ịGalili lẹlẹ. IMeri ịnịna nya iJisọsị kele ka ọjịra-jịra ọọwa. 2Ị wụrụ iJisọsị bala angịjụgbẹyị nyamwụ ẹpwa lẹ, ị kele ka ọjịra-jịra nya ang oriri nya ahụ oyeye ọọwa ịnyịnyị. 3Ụka ká ere ọnwanwa nya alọjịra-jịra ọọwa gwaa myị́, iMeri ịnịna nya iJisọsị kele kaka byoo yẹkẹẹ, “Ere nya angịlẹ myị́ lẹ!”
4Ụka ọọwa, iJisọsị wẹ byi iMeri yẹkẹẹ, “Aahụ a ka ya jem ang ọlẹ kam ka họ ka, Ayaya nyam. Ụka nyam á pwụ lẹka.” 5Ụka ọọwa, ịnịna nya iJisọsị byi anchẹ ịlụwa yẹkẹẹ, “Ang myị́ ang ọlẹ kọ byinu ya, anụ nyị họ lẹ, anụ́-ụ họọ mẹ!”
6Ịta ịrwọnyẹ ịtụka-ịtụka ịhyẹ rịrị ụ-ụwa. Enyi ọlẹpwụ nya ookpokpo lẹpwụ nyaa ka myị abang lala ịrụ lee ịrwọnyẹ myị́. Ịnyị ala iJuu wuu a kaa chị́ enyi rịrị ọdọdẹpwa nyaa gbe ịlaa chajị kị ka kpa enyi ọọwa nyi ịlọ hụ ịlaa jaabwọ ká ehile nyaa ya, nyị họ ene kịị nyị ka la cheri-cheri ị-ịlahị nya Ohe Oluhye lẹ. 7Ịnyị, iJisọsị a byi anchẹ ịlụwa yẹkẹẹ, “Anụ chị́ enyi myị ịta ịwẹ wuu ham wẹẹ.” Ọọwa lẹ, ị chị́ enyi myaa wuu pwẹẹpwẹẹ lẹlẹ. 8Ọọwa lẹ, iJisọsị a byi anchẹ ịwẹ yẹkẹẹ, “Anụ chị́ enyi ọwẹ ju a-ang, kanụ kpa kịla olegbeju ọkpẹhị rịrị ọjịra-jịra nya ang oriri ọlẹ mẹ.” Ọọwa lẹ, ị chị́ enyi ọọwa ju a-ang kpa kịla ọngọọwa lẹlẹ. 9Ma, ụka ọwẹ lẹ, enyi ọọwa tị yẹ la ere ene-ene lẹ. Ụka ká olegbeju nya ọjịra-jịra ọọwa kpa ere ọwẹ ka ọnụ lẹ, ọwa ayịdang á jẹ́ yẹkẹẹ, enyi nyaa yẹ ri ere wẹ ka. Kẹnẹ-kẹnẹ, anchẹ ịịwa ayịdang a jẹ́ lẹlẹ. Ịnyị, olegbeju nya ọjịra-jịra a be ẹkọ wụrụ ọrụ-ahụ onyeewe lẹlẹ. 10Ọọwa lẹ, ọ byi ọrụ-ahụ ọọwa yẹkẹẹ, “Ẹla ọlanyị, a tị́ họhọ ịnyị? Angị ịkịla kaa kpa ere ọnyịịla kpehe la angịnyị kaa nwa wu ẹpwụ kpá wuu ene kị kaa kpa ere ọtịpyọ kpehe. Ahụ tị mwọọgịlẹ tụụbwọ hi ere ọnyịịla gbe ẹkpẹ?”
11Ang o-ju ẹjẹẹ nya ụkụrwọ ẹbyẹbyị nya enyi ọ-yẹ ri ere ọwẹ ká iJisọsị họ e-epweji nya iKena ọ-ọpyị nya ịGalili, a ri ọmwụ ọdada nya ụkụrwọ ẹbyẹbyị nyamwụ wuu lẹlẹ. Ọọwa lẹ, ọ bwula ọọwa chị ẹbyẹbyị nyamwụ ehe lẹ, angịjụgbẹyị nyamwụ a kpa ọkịlẹtụ nyaa wuu myị lọọ lẹlẹ.
12Ịnyị, ụka kị họ kpá lẹ, iJisọsị bala ịnamwụ bala anyịnamwụ anyị bala angịjụgbẹyị nyamwụ a rụ kele ka epweji nya ịKapẹnawụm kaka hụ ụ-ụwa lala ụtụrụ ịmanyị-ịmanyị lẹlẹ.
IJisọsị Kele Ka Ube Ịgọgọ Ọtụka nya Ohe Oluhye nya Ala IJuu
(ịMatiyu 21:12-13; ịMakị 11:15-17; iLuku 19:45-46)
13Ụka kọ hi pyịnyẹng ká ụka nya Ang Oriri Ọchịpwụrụ nya ala iJuu juwa ka pwụ lẹ, iJisọsị a kele ka iJerusalẹm lẹlẹ. 14Ụka ká iJisọsị pwụ ube ịgọgọ ọtụka nya Ohe Oluhye nya ala iJuu, ọ yẹ angịhyẹ ịlẹ kị juwa kpa ịna bala ịkpịlọ bala ikiripete ra ụ-ụwa. Ọ yẹ angịlẹ kị juwa kpa okpoko ha angịnyị nyẹ, kị hụhụ chahị ju itebwuru nyaa ụ-ụwa ịnyịnyị. 15Ịnyị, ụka ká iJisọsị mwụ iri ịhyẹ aba bawụlẹ kpa ụ-ụbwọ nya ugboji lẹ, ọ kpa ku ịna bala ịkpịlọ ịịwa wuu rụ kpehe hi ube ịgọgọ ọtụka nya Ohe Oluhye ọọwa lẹlẹ. Ọ gu itebwuru nya angị kpa okpoko ha angịnyị nyẹ cheji, la ikpoko-ikpoko nyaa ụ-ụwa ịnyịnyị. 16Ịnyị, ọ da angịlẹ kị juwa kpa ikiripete ra ụ-ụwa ehile yẹkẹẹ, “Anụ go ịngịịwẹ kpehe hi ẹgẹlẹ pyii! Anụ hu ube ọraabwọ ha Ohe Oluhye Adam lala ube nya ihi ọ-kpa ra gụ ọwẹ kokoo!” 17Ịnyị, angịjụgbẹyị nyamwụ à kpịtịya nya ẹla ọlẹ ká Ụpwụ Ịgọgọ ya ẹ-ẹgẹhẹ lẹlẹ. Ẹla ọọwa ri yẹkẹẹ, “Ọháha ọlala nyam ẹ-ẹga nya ube ịgọgọ nyang ahụ Ohe Oluhye juwa wuru pwuu ẹ-ẹpwụ nyam.”
18Ụka ọọwa, alegbeju nya ala iJuu ịịwa tịrẹkpẹ kele ka ẹga nya iJisọsị kaka tọọ ịtọ ọhẹ yẹkẹẹ, “Ayịbahị iticha ee, ụma nya ang o-ju ẹjẹẹ nya ụkụrwọ ẹbyẹbyị oyina, a tị́ ka họ mẹjẹẹhị kahị ka kpa jẹ́ yẹkẹẹ, ahụ ayịdang la ọngịrị nyọka kuhi kpehe jaabwọ ká họ wẹẹ kpong-kpong?”
19IJisọsị wẹ byaa yẹkẹẹ, “Ọ hiigu. Anụ tụrụ ube ịgọgọ ọlẹ ju eji mẹ. Aalẹ, m ka mọọ nwụ́ ẹ-ẹpwụ nya ẹnụtụrụ ịta myị́.”
20Angịwẹ wẹ byoo yẹkẹẹ, “Ká ka jụ ube ịgọgọ ọlẹ nwụ́ myị́ ẹ-ẹpwụ nya ẹnụtụrụ ịta kem? Kpịtịya wẹẹ! Ẹka ohu-iye kụrụ ịrwọnyẹ gbẹgbịlẹ, ị kpa nwụ́ ẹpwang ọlẹ lẹẹ, ene kịị jwọọ nwụ́ myị́ kpá lẹ!”
21Ma, u-ube ịgọgọ ọlam-ọlam ọlẹ ká angịnyị kpa ụbwọ nwụ́, iJisọsị a tị ya ẹla rụ́ ka. Ugbinyịrọ nyamwụ, ọ rụ́ ụka ọọwa lẹ. 22Ịnyị, ụka ká iJisọsị gbu kpá, kọ wuleji bwula igu juwa hịhị lẹ, angịjụgbẹyị nyamwụ a kpịtịya nya ẹlẹwẹ kọ ya wẹ lẹlẹ. Ọọwa lẹ, ị kpa ọkịlẹtụ nyaa wuu myị ju ẹla ọlẹ ká Ụpwụ Ịgọgọ ya bala ọ-myị la iJisọsị ayịdang o-oluhye nya ẹlẹwẹ kọ ya ịnyịnyị lẹlẹ.
IJisọsị Jẹ́ Ẹla Ọlẹpwụ nya Angịnyị Ehe Wuu
23Ụka ká iJisọsị juwa i-iJerusalẹm, lụka nya Ang Oriri Ọchịpwụrụ, iru nya angịnyị lụmẹ-lụmẹ myị lọọ ụ-ụwa lụka kị kpẹhị nya ịlaa yẹ ụkụrwọ ẹbyẹbyị ịlẹ kọ họ wuu. 24Ma, iJisọsị ayịdang á myị hu ọkịlẹtụ nyamwụ kpụ nịrọ angịnyị ehe ịịwa ka. Chajị ọwa ayịdang jẹ́ angịnyị ehe wuu yẹẹyẹẹ hweng hweng. 25Ọ́ baba ká ọngọngọhẹ ka bwuru ọhịhị nya angịnyị ehe ya je iJisọsị kpong-kpong ka. Chajị ọwa ayịdang jẹ́ irya ọlẹpwụ nya angịnyị ehe wuu hweng hweng la ịlọmwụ ene-ene lẹ.
Atualmente selecionado:
ỊJỌN 2: IBNO
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Igede Bible © The Bible Society of Nigeria, 2019.