ỤKỤRWỌ nya ALẸRỤ Ọdawụlẹ
Ọdawụlẹ
Ụkụrwọ nya Alẹrụ ri ụpwụ oheeye ọle ka iLuku da ụka kọ da ẹrụ ọnyịịla nya iLuku kpá. Ang odudu ka iLuku da Ụkụrwọ nya Alẹrụ ọle ri ọ-ka ya jaabwọ ka angịjụgbẹyị nya iJisọsị kpa Ẹrụ Ọnyịịla pyẹ bwula ọngịrị nya Ohe Oluhye. Ị kpa ẹrụ ọnyịịla ọọwa pyẹ i-i Jerusalẹm bala iJudiya wuu bala iSameriya lalaala ka pwụ ọbaba nya odehe (1:8). Ẹ-ẹpwụ nya ụpwụ ọlẹ iLuku ya jaabwọ ka angịjụgbẹyị nya Jisọsị chịpwụrụ bwu ẹpwụ nya ọtụpyịpyị ụka kị juwa maga nya ọ-ju ihi nya ehile nya iJisọsi ọọwa.
Ụkụrwọ nya Alẹrụ myịmyị ja oja nya ọmwụ ọdada nya ọmyịmyị ọlala nya angịnyị nya ịKịrayịsị jaabwọ kọ bwu dọmwụ bwu ẹpwụ nya ala iJuu gbee ka alodehe wuu wu ọmyịmyị ọlala ọọwa bajẹ. ILuku ya angịnyị nya iKịrayịsị nyị́ ri ebwo nya angị ka tụ ọpyị adịrahụ nya ala iRom pyịpyị ka. Ma nyị ri ọ-họ jịra nya ọngịnyị nya Ohe Oluhye oriri nya ala iJuu. Ọtụpyịpyị nya ọgbanyẹ-ọgbanyẹ ẹ-ẹga nya angịnyị nya ịKịrayịsị bala ala iJuu dọmwụ ụka ka alegbeju nya ala iJuu ịhyẹ pwa ang ọmẹjẹ chajị nya iJisọsị (4:1-31; 7:1-59).
Akama ọtụka ọlẹ kọ wẹ chị alịchọọchị inyogo ọgụ dọmwụ ọọ-lajị nyọlẹ ka angịjụgbẹyị nya ịKịrayịsị me irya ya ọngọ ka ri ọngịnyị nya iJisọsị nyị ka ri ala iJuu pyii ene. Ma, ụka ka iFilipu kpa ẹrụ ọnyịịla ka ẹga nya ala iSameriya (8:7-28), ka iPita ka ẹpwa nya ịKọnịlọsị ọgẹwụ nya ala iRom (10:1-48), irya ọọwa yẹ da.
Ẹla ọkpọnchị ọhẹ ẹ-ẹpwụ nya Ụkụrwọ nya Alẹrụ ọlẹ ri ụkụrwọ nya ọngịrị nya Ohe oluhye ọlẹ kọ wẹ uhye nya angị myị la Ohe Oluhye i-iJermsalẹm ẹnụ nya iPentikọsị. Ọngịrị ọọwa juwa ta alịchọọchi bala alegbeju nyaa ẹ-ẹpwụ nya ang myi ang ịlẹ kị họ ka ụpwụ ọlẹ ya dodehe.
Ọlẹng ohẹ ọlẹ kọ kpa ẹrụ ọnyịịla pyẹ lumẹ ri ịPọlụ. Ọ ya ẹla nya Ohe Oluhye tụ ọpyị nya angị ri ala iJuu ka da wuu ene kọọ ka iRom kaka ya ẹrụ ọnyịịla ụ-ụwa. IRom a ri ẹpwụma ọlẹ kọ la ọngịrị gụ wuu ụka ọọwa lẹ. Ang odudu ọhẹ ọlẹ ka iLuku kpa da ụpwụ ọlẹ ri ọ-ka mẹjẹ nyori ịngịngịhyẹ-ẹ́ ka ku angịnyị nya ịKịrayịsị iwe nyọka kpa ẹrụ ọnyịịla pyẹ ka ẹga myị ẹga ka.
Ẹla Ịlụpwụ Ọlẹ
Ọnwụlanọ nyọka kpa ẹrụ ọnyịịla pyẹ 1:1-26
Ọna ọdada ohyẹẹkpẹ bala ọnu ọmyịmyị nya iJisọsị 1:1-4
Ọngọ ku ọmwakpa nya iJudasị 1:15-26
Ẹrụ ọnyịịla ọ-kpa pyẹ i-iJerusalẹm 2:1—8:3 Ẹrụ ọnyịịla ọ-kpa pyẹ i-iJudiya bala iSameriya 8:4—12:25
Ụkụrwọ ọhọhọ nya ịPọlụ 13:1-28
a. Ẹdịyẹ nya ẹrụ ọnyịịla o-ya pyẹ nya ọgbanyẹ nya ịPọlụ 13:1—14:28
b. Ọjịra-jịra ọla iJerusalẹm 15:1-35
c. Ẹdịyẹ nya ẹrụ ọnyịịla o-ya pyẹ oheeye nya ịPọlụ 15:36—18:22
d. Ẹdịyẹ nya ẹrụ ọnyịịla o-ya pyẹ ọhata nya ịPọlụ 18:23—21:16
e. Ị wu ịPọlụ ju agba i-iJerusalẹm bala iSisarịya bala iRom 21:17—28:31
Atualmente selecionado:
ỤKỤRWỌ nya ALẸRỤ Ọdawụlẹ: IBNO
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Igede Bible © The Bible Society of Nigeria, 2019.