ỊJỌN 21
21
IJisọsị Chị Ịlọmwụ Ehe Mẹjẹ Angịjụgbẹyị nyamwụ Angị Irwiye Ịhyẹ
1Ụka ká ọwẹ chịpwụrụ kpá lẹ, iJisọsị a myịmyị chị ịlọmwụ ehe mẹjẹ angịjụgbẹyị nyamwụ ụ-ụwa Ihu ọkịlọlọ nya ịTayịberiyasị lẹlẹ. Ịịlẹ, ọ bwu chị ịlọmwụ ehe lẹ. 2Ụka ọọwa, angịjụgbẹyị nya iJisọsị ịlẹ juwa ẹ-ẹga ookpokpo la awụlẹ. Ẹnyị nyaa a lẹẹ lẹ: ỊSayịmọn iPita, ịTọmasị ọlẹ kị wụrụ iDidimọsị ká etu nyamwụ ri anyewa bala ịNatanẹlụ ọla iKena nya ịGalili. Anyị alẹng nya iSebidi bala angịjụgbẹyị nya iJisọsị imiiye ịkịla ịhyẹ juwa taa ịnyịnyị. 3Ọọwa lẹ, ịSayịmọn iPita a byi angịkịla nyamwụ ịwẹ yẹkẹẹ, “M jam rụ kaka durwe enyi wẹẹ.” Angịjụgbẹyị ihihi wẹ byoo yẹkẹẹ, “Ahị ka bang warị kaka durwe enyi ịnyịnyị!” Ọọwa lẹ, ị yegiri kele kaka ju ụmwụ nya enyi ka olurwe enyi lẹlẹ. Ma, ị́ tị wu iyenyi ọhẹ-lọhẹ la odu ọọwa ka, gbee ká ahị pyẹ. 4Ịnyị, ụka ká ahị pyẹ, ká ẹnụ juwa kpehe lẹ, iJisọsị a kele kaka godayị rịrị ọ-ọnụụka nya ihu ọọwa lẹlẹ. Ma, angịjụgbẹyị nyamwụ á tị jẹ́ yẹkẹẹ, iJisọsị ayịdang nyaa wẹ lẹ, datị ka. 5IJisọsị byaa yẹkẹẹ, “Anụ anyị nyam, anụ wu iyenyi ọhẹ-lọhẹ kpong-kpong wẹẹ lẹ?” Ị wẹ byoo yẹkẹẹ, “Ehe! Ahị wu iyenyi ọhẹ-lọhẹ kpong-kpong ka, Ayịbahị!” 6IJisọsị byaa yẹkẹẹ, “Anụ da ụgbọwụ nyanụ koye upwuriri nya ụmwụ nya enyi nyanụ mẹ. Aalẹ, anụ ka wu iyenyi ugbẹnyị lẹ.” Ịnyị, ụka kị da ụgbọwụ nyaa kele lẹ, ị wu iyenyi ju iru lụmẹ-lụmẹ gbee, kị jụ ụgbọwụ nyaa ọọwa gbile ka ẹpwụ nya ụmwụ nya enyi nyaa myị́ kaka lẹlẹ.
7Ịnyị, ọngọjụgbẹyị ọlẹ kọ há iJisọsị lụmẹ a byi iPita yẹkẹẹ, “Ọngọlahị ịnyị!” Ụka ká iPita wo yẹkẹẹ, nya Ọngọlahị ịnyị lẹ, ọ hu awụrụ ọtụka nyamwụ kụrụ lẹlẹ. Chajị, ọ pwọọ neeji ene-ene. Ọọwa lẹ, iPita a gba ju ka ẹpwụ nya enyi jurum lẹlẹ. 8Ma, angịjụgbẹyị ihihi jụ ụmwụ nya enyi nyaa ọlẹ kọ juwa gbile ụgbọwụ nyaa la iyenyi-iyenyi kele ka ọnụụka. Chajị ẹga ọlẹ ká ụgbọwụ nyaa ọọwa wu iyenyi lẹ, ọ lala apatẹ ẹdịyẹ ohu ịrụ kem, kele ka ọnụụka ọọwa. 9Ụka ká angịjụgbẹyị nya iJisọsị ịwẹ gba kụ eji ọ-ọnụụka lẹ, ị yẹ ila nya ịwa ọhẹ ọ-ọnụụka ọọwa ká iyenyi ịhyẹ guru u-uhye ụ-ụwa lẹlẹ. Ịkaa ịhyẹ juwa ịnyịnyị. 10IJisọsị a byaa yẹkẹẹ, “Anụ kpa iyenyi ịhyẹ bwu ẹpwụ nya ịlẹ kanụ wu warị wẹẹ.”
11Ịnyị, ịSayịmọn iPita a ju ka ẹpwụ nya ụmwụ nya enyi ọọwa lẹ, ọ gbile ụgbọwụ ọọwa ka ọnụụka lẹlẹ. Iyenyi ịtụka-ịtụka myị ụgbọwụ ọọwa kpọng-kpọng. Iru ojuju nyaa lala ohu irwiye kụrụ iwo, iwo kụrụ ịta. Iyenyi ịịwa ju iru lụmẹ odu ịnyị, ụgbọwụ ọọwa á tị gu ene kpong-kpong ka. 12Ịnyị, iJisọsị a byi angịjụgbẹyị ịwẹ yẹkẹẹ, anụ kẹwẹ kaka ri ang oriri nya ụtụrụ mẹ. Ma, angịjụgbẹyị nyamwụ á tị byẹjẹ tọọ wo yẹkẹẹ, “Ahụ owo, a tị́ wẹẹ?” kpong-kpong ka, chajị ịwa ayịdang jẹ́ yẹkẹẹ, Ọngọlahị ayịdang nyaa wẹ lẹ. 13Ịnyị, iJisọsị a kele kaka hu ịkaa ọọwa haa lẹ, ọ hu iyenyi haa ri ịnyịnyị lẹlẹ.
14Ọwẹ a ri ụka ọhata ká iJisọsị chị ịlọmwụ ehe mẹjẹ angịjụgbẹyị nyamwụ lahị-lahị lụka ọlẹ kọ wuleji bwula igu kpá lẹlẹ.
IJisọsị Bala ỊSayịmọn IPita
15Ụka kị ri ang oriri ọọwa kpá lẹ, iJisọsị a byi ịSayịmọn iPita yẹkẹẹ, “ỊSayịmọn, ọnyị nya iJona, m háng gụ angịlẹ wuu kpong-kpong?” IPita wẹ byoo yẹkẹẹ, “Ee, Ọngọlahị, ahụ ayịdang jẹ́ ká hám nya ịlẹhị-ịlẹhị.” IJisọsị wẹ byoo yẹkẹẹ, “IPita, aa tị tị kpahị ju anyị nya ịkpịlọ nyam mẹ!”
16IJisọsị myịmyị byi iPita ụka oheeye yẹkẹẹ, “ỊSayịmọn, ọnyị nya iJona ee, m háng nya ịlẹhị-ịlẹhị kpong-kpong?” iPita wẹ byoo yẹkẹẹ, “Ee, Ọngọlahị, ahụ ayịdang jẹ́ ká hám nya ịlẹhị-ịlẹhị.” IJisọsị wẹ byoo yẹkẹẹ, “IPita, aa tị tị kpa ịkpịlọ nyam la ang oriri mẹ.”
17IJisọsị myịmyị byi iPita ụka ọhata yẹkẹẹ, “ỊSayịmọn, ọnyị nya iJona ee, a ya kam háng nya ịlẹhị-ịlẹhị kpong-kpong?” Ụka ọọwa, ọ hi iPita ọnụ, chajị nyọlẹ ká iJisọsị tọọ wo yẹkẹẹ, “M háng kpong-kpong?” ịnyị bawụlẹ bawụlẹ ụka ịta. Ọọwa lẹ, ọ wẹ byi iJisọsị yẹkẹẹ, “Ọngọlahị, ahụ ayịdang jẹ́ ang myị́ ang wuu. A tị jẹ́ yẹkẹẹ, ọwa nyị hám nya ịlẹhị-ịlẹhị ịnyịlẹhị.” IJisọsị byoo yẹkẹẹ, “Aa tị tị kpẹhị rịrị ịkpịlọ nyam yẹẹyẹẹ mẹ.”
18IJisọsị myịmyị byi iPita yẹkẹẹ, “Nya ịlẹhị-ịlẹhị, m bying yẹkẹẹ, ụka ọlẹ ká ri onjwo okolobya lẹ, a kaa ya ugba chị ọhị, kaa hu ang ka ẹga myị́ ẹga ọlẹ kọ bang la ịlọng myị́. Ma, ụka ọlẹ ká ka chị okwirichi, a ka nịra ụbwọ nyang kpaaa ha ọngọkịla. Ọọwa lẹ, ọngọọwa a ka chịng iri a-abwọ lẹ, ọ ka kpang rụ ka ẹga ọlẹ ká tịtọ nya ọkaka kpong-kpong kaka lẹlẹ.” 19IJisọsị ya ẹlẹwẹ rụ́ ụma nya igu ọlẹ ká iPita juwa ka gbu, chajị nyọka ya ogbo ha ẹnyị nya Ohe Oluhye. Ụka ká iJisọsị ya ẹla ọọwa kpá, ọ byi iPita yẹkẹẹ, “Kẹwẹ ká bam jẹ mẹ.”
IJisọsị Bala Ọngọjụgbẹyị nyamwụ Ọkịla Ọhẹ
20Ụka ọọwa, iPita chẹhị kẹkpẹ kaka yẹ ọngọjụgbẹyị nya iJisọsị ọkịla ọlẹ kọ há iJisọsị lụmẹ. Ọngọọwa a ri ọngọlẹ kọ kpụ nịrọ iJisọsị lụka kị juwa kpa Ang Oriri Ọchịpwụrụ ri, kọ tọ iJisọsị wo yẹkẹẹ, “Ọngọlahị, o-owo a tị́ juwa ka pịrịng ha?” lẹ. 21Ụka ká iPita chẹhị kaka yẹ ọngọjụgbẹyị ọkịla ọọwa lẹ, ọ tọ iJisọsị wo yẹkẹẹ, “Ọngọlahị ee, ọngọjụgbẹyị nyang ọkịla ọwẹ tị bẹ?”
22IJisọsị wẹ byi iPita yẹkẹẹ, “Ó ri kam yẹkẹẹ, ọngọjụgbẹyị ọọwa ka ri ehe gbee pwụ ụka ọlẹ kam ka tịrẹkpẹ warị, oyina a tị́ ri ẹla nyang ẹ-ẹpwụ nya ọọwa? M bying yẹkẹẹ, kẹwẹ, ká bam jẹ mẹ!”
23Ọọwa lẹ, angịlẹ kị myị la Ohe Oluhye a juwa kpa ẹla ọọwa ya pyẹ ẹ-ẹpwarịrị nyaa yẹkẹẹ, ọngọjụgbẹyị nya iJisọsị ọkịla ọọwa nyị́ ka gbu kaka lẹlẹ. Ma, iJisọsị ayịdang á tị yẹkẹẹ, ọngọọwa nyị́ ka gbu kaka lẹ ka. Ẹla ọlẹ kọ ya ri yẹkẹẹ, “Ó ri kam tịtọ ká ọngọjụgbẹyị ọọwa á ka ri ehe gbee kam ka tịrẹkpẹ warị, oyina, a tị́ ri ẹla nyang ẹ-ẹpwụ nya ọọwa?”
24Ọngọjụgbẹyị nya iJisọsị ọọwa kpangga, a ya ala ịlẹ bala ọ-daa ju ẹ-ẹpwụ nya ụpwụ lẹẹ ịnyịnyị lẹ. Ahị tị jẹ́ yẹkẹẹ, ẹla nya ịlẹhị a wẹ kọ ya lẹ.
Ẹla Otuku
25Iru nya ụkụrwọ ẹbyẹbyị ịkịla lụmẹ-lụmẹ, ịlẹ ká iJisọsị họ, kị da ju ẹ-ẹpwụ nya ụpwụ kpong-kpong ka. Ó ri kị yẹkẹẹ, nyị da ju ẹ-ẹpwụ nya ụpwụ wuu mẹ, ịnọ, apwụ ịịwa ka lụmẹ gbee lẹ, odehe ọlẹ wuu lẹpwụ-lẹpwụ á ka nwa, ọ-ya apwụ ịịwa gu myị́ kpong-kpong ka.
Atualmente selecionado:
ỊJỌN 21: IBNO
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Igede Bible © The Bible Society of Nigeria, 2019.