KUZOYA 7
7
Gharika
1Nao BWANA ukamzera Nuhu, “Ngia safinenyi, na kinyumba chako chose; angu nakuwona oho kukaia na hachi aghadi ya kivalwa ichi. 2Nyamandu rose rielie kurido mfungade mfungade ra womi na ra waka; 3na nyonyi ra mbeonyi wokoni kungire mfungade mfungade ra womi na ra waka, vichuku varo vipate kukaia moyo ndoenyi. 4Angu nyuma ya matuku mfungade nichanyesha vua ndoenyi kose kwa matuku mirongo ina kio na dime, na kula kindo chiko moyo nerechibonyereghe nichachiinja ndoenyi.” 5Nao Nuhu ukabonya wokoni sa iji orelaghiriloghe ni BWANA.
6Nuhu orekoghe na miaka maghana arandadu iji gharika erechieghe ndoenyi. 7Nuhu andwamweri na wana wake, na muka wake, na waka wa wana wake, wikangia safinenyi, kukukira na ija gharika.#Mat. 24.38-39; Lk. 17.27 8Nyamandu rose rielie na riseelie, nyonyi, na shimandu rose riavuagha andoenyi, 9viwi viwi va womi na va waka verengiriloghe safinenyi andwamweri na Nuhu, sa iji koni Nuhu orelaghiriloghe ni Mlungu. 10Na nyuma ya matuku mfungade, iyo gharika ikacha ndoenyi.
11Niko ugho mwaka ghwa maghana arandadu ghwa Nuhu, mori ghwa kawi, na ituku ja ikumi na mfungade ja ugho mori, ndoria rose ra machi gha ndoenyi rikarughuka kwa wungi, na madirisha gha mlungunyi ghikarughuka.#2 Pet. 3.6 12Vua ikanya aighu ndoenyi matuku mirongo ina kio na dime. 13Ijo ituku jeni Nuhu orengirieghe safinenyi, uo, na wana wake, Shemu, Hamu, na Jafethi, muka wake, na waka wadadu wa wana wake werengirieghe safinenyi. 14Nyamandu rose ra kula kichuku, na mfugho ra kula kichuku, na shimandu rose riavuagha andoenyi ra kula kichuku, rerengirieghe andwamweri nawo; 15rose ra kula kichuku rerengirieghe safinenyi andwamweri na Nuhu, viwi viwi va icho chose cherekoghe na miruke ya irangi. 16Rose rerengiriloghe ra womi na ra waka sa iji koni Mlungu oremlaghirieghe; nao BWANA ukamrughia andenyi.
17Nao gharika ikakaia ndoenyi matuku mirongo ina, hata machi ghikachua ghikaiwusira ija safina nokoighu. 18Machi ghikachurikia nandighi aighu ndoenyi, na ija safina ikawusirwa nokoighu ikakaia ikidukwa-dukwa ni machi. 19Machi ghikachurikia nandighi aighu ndoenyi hata mighondi mibaa yose ikamilika. 20Machi agho ghikachurikia na ndighi, ghikafinikira na kuida mighondi meta mfungade nokoighu. 21Kula kilambo chiko moyo cherekoghe ndoenyi chikafwa; nyonyi, mfugho, nyamandu, na shimandu rose na kula mdamu, 22na icho chose chisodagha cherekoghe aighu ya ndoe iomie chikafwa; 23ikaiagha ni mdamu, angu nyamandu, angu shimandu, angu nyonyi; rose rikafwa na kuinjwa ndoenyi. Nuhu tu nuo oresigharikieghe andwamweri na awo werekwanyeghe nao safinenyi. 24Agho machi ghikakaia aighu ndoenyi matuku ighana na mirongo misanu.
Atualmente selecionado:
KUZOYA 7: TAITA
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
©Bible Society of Kenya, 1997
All rights reserved.