Pi zi tiki 39
39
Yosef aha war Egipte
Yosef ahani Potifar, ɗif n'Egipte
1Won hlai na Yosef a ga azumai Egipte li, Potifar, ɗif zi sda n'abai na wiini Faraw, abaiɗi askarai zi gɗam, a wuraŋ tiɗi Ismayitekai na e kiŋsi aha war Egipte. 2EPIƊ-ƊAI a za gaini Yosef, a za wazagai paŋ pɗamai, a sumna ahani epin-gezani n'Egipte. 3Ni a sɗa ɓa EPIƊ-ƊAI a na gaini Yosef, wala n'a yimaŋ tini aŋ zi paŋ a za pɗem. 4Yosef a nava yum wuzani arni epin-gezani, a tikaŋ war sdani, Potifar a tikaŋ aŋ n'abaini dalamni lai, a hinini gɗamni wasgaini paŋ war tini.
5Amma hlai n'a tikaŋ li amai midini dalamni gaini wazagaini paŋ lai, EPIƊ-ƊAI a ɓaka dalamni ɗif n'Egipte burini Yosef. Ɓiki na wiini EPIƊ-ƊAI a wa tini edi miɗini wazagai n'aha war dalamni gaini n'edi war vowaini lai. 6Nɵa Potifar a hina wazagaini paŋ war tini, sdani n'a hina tar ɗa a simi n'a sumaŋ tar.
Yosef gaiɗi munini epin-gezani
Yosef a na fu a tala juf gara, 7asakalni wazagai hanɗa, munini epin-gezani te za suuna sini, te miɗini: Fana gaya. 8Amma a ɗiya kai, a miɗiɗi wiiɗi munini epin-gezani: Tala mu na gaini epin-geza, a na tika hangalni sini wala ktai aha war dalam na kir kai. A saŋa wazagaini paŋ war ta, 9aha war dalam hanɗa maa, ni abai a suwaŋa kai, a ɗalaŋa sini wala ktai maa kai, sna suku tuku na munini. Mu sɗa aŋ za meefeŋ n'abai arni Alaw nɵa maɵa maɵa ɗa; 10mefeŋ paŋ te miɗini wiini Yosef buri a fana azumai ɵimaɗi, aŋ tapa sini gaiɗi lai, amma a dara a ɵina seŋɗi kai. 11Amma mefeŋ ktai a halasi aha buri a za sda na wiini, bege ktai maa a na fu aha kai, 12te yima sapa pini te muɗa: Fana gaya. A hinitiɗi sapaini tiɗi, a pra edi gaini luwi a niyasi anene war dalam ɗa par.
13Won hlai na te tala ɓa a hinitiɗi sapaini tiɗi yaw, a pra edi su ɗa, 14Te yikiɗisi bagakaiɗi te miɗiɗi: Ammaa! e kumusi ɗif na hebre mudumu ta, a yima ɗai maini wala zi dawaŋ ɵa, a halasi ɓa a fana gaya ɗa! Mu ɗuula gaini gdaŋa, 15won hlai n'a tala ɓa mu na ɗuula, mu na yika lai ɗa, a hiniti ka sapaini azumai ɵima puk, a pra edi gaini luwi, a niyaɗi anene sek. 16Te militi sapaini Yosef ɵimaɗi ca haa mofaɗi a wayasi aha, 17te miɗini a seŋ ni dama, te muɗa: Bege na hebre na ku kiŋyisi hanɗa a halasi sa a firiya a ɵa dawaŋ gaya ɗa, 18Won hlai n'a tala ɓa mu na ɗuula, mu na yika lai a hiniti ka sapaini azumai ɵima puk, a praɗi anene sek. 19Won hlai na epin-gezani a ɵina seŋ na munini te miɗiŋni ɓa: Tala sda na begeku a zaŋ sa, a faka gaini hiy n'abai. 20A yima Yosef aŋ ɵaŋ warɗi daŋgai won hlai n'e miliɗi ɗai zi daŋgai na wiini pai woni.
Yosef war daŋgai
Won hlai n'a na war daŋgai, 21EPIƊ-ƊAI a za gaini, a za pɗemni sini a hinaŋ aŋ nava yum arni abaiɗi daŋgai. 22Abaiɗi daŋgai hanɗa a hiniɗi ɗai zi daŋgai n'e ɗa warɗi daŋgai paŋ war tini Yosef, sda zi zi na woni paŋ a zaŋ ɗa a Yosef. 23Abaiɗi daŋgai a tala sda n'a siŋni tini Yosef aŋ zaŋ ɗa kir kai, buri EPIƊ-ƊAI a na fu gaini, wala n'a yimaŋ tini aŋ zi paŋ, EPIƊ-ƊAI a vaŋ amai war pɗem.
Atualmente selecionado:
Pi zi tiki 39: MUSGUM
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964