Pi zi tiki 40
40
1Mefeŋ yaw asakalni wazagai hanɗa par, ɗif n'abai n'a sini wala zi ci wiini pai gaini ɗif n'abai na midiɗi nagai n'e zi peŋ ɗa lai, e zi meefeŋ sini pai n'Epgpte n'epingezaɗi.
2Faraw a za hiy siɗi ɗaini n'abakai sulu: Ɗif n'abai na sini wala zi ci, gaini n'abai na midiɗi nagai n'e zi peŋ ɗa lai. 3A yimiɗi, a kiɗi ahani abaiɗi askarai zi gɗam warɗi daŋgai na Yosef aŋ warɗi. 4Abaiɗi askarai zi gɗam a siɗi Yosef buri a zina piɗ ɗai war ɵeŋ, e simi daŋgai mefeŋ yaw.
Yosef a siŋka ezini weseŋ n'a pɵiɗi ɗai n'abakai na sulu na wiini pai edi
5War duvuk ktai, ɗif n'abai n'a sini wala zi ci wiini pai n'Egipte gaini abai na midiɗi nagai n'e zi peŋ ɗa, weseŋ a pɵiɗi won hlai n'e ɗa warɗi daŋgai. Ɗif weseŋ a pɵaŋ, weseŋ paŋ a siŋka miɗini wala kiini kiini lai. 6Dawai par Yosef a halasi siɗi, a niviɗi siɗi a yima edi kai. 7A zilbiɗi ɗai n'abakai na wiini Faraw n'e ɗa gaini war daŋgai aha war dalamni epin-gezani: Girna siki a tala gaini pli edi kai ɗa buri maɗa? 8E wiyi seŋ e miɗi: Weseŋ a piɵiyi, ɗif n'a sɗa aŋ siŋkiyi ezini edi aŋ kai. Nɵa Yosef a miɗiɗi: a Siŋka ezini wala edi a Alaw kai ɗi? Vurnaŋa weseŋ hanɗa haw.
9Ɗif n'abai n'a sini wala zi ci wiini pai a vurna weseŋ n'a pɵaŋ wiini Yosef, a muɗa: Weseŋ a pɵaŋa mu tala luwuŋ zi vin wuza zaw, 10tini gaini wi edi hu, a guɗasi amlai par viya, flerni a mala edi, ali na sini sumulni gaini niyi. 11Kawai zi ci na wiini Faraw te na fu ta. Mu yima sumulni luwuŋ zi vin mu supuɗaŋ warni kawai zi ci na wiini Faraw, asakal par mu sitini amai tini ta.
12Yosef a miɗini: Weseŋ a siŋka maini nɵa: Tini luwuŋ na hu a mefeŋ hu, 13mefeŋ a hina hu pra, Faraw aga a yumuku arku amai, aga a tukuku war sdaku n'avut ɗa, aga ku sitini kawai zi ci war tini Faraw maini na ku na ka ku zaŋ avut par, hlai na ku na ka war sdani nɵa. 14Amma won hlai n'e zi pɗem li suku, ku hina muduku a wula gaya kai, mu siiwuku ɓa ku za pɗem sa ta, ku muɗa seŋŋa wiini Faraw ta kapai a ɵaŋaɗi edi war daŋgai par su. 15Buri ɓa e yimiŋasi na ɗa gaini gdaŋ midini afti na wiiɗi Hebrekai par, won hlai na ɗe, mu za wala ktai na meefeŋ na kapai mu suma daŋgai pini kaalai.
16Won hlai n'a tala ɓa Yosef a siŋka ezini weseŋ hanɗa edi pɗem, abaiɗi ɗai na e zi peŋ ɗa a miɗini: Tala lai weseŋ a pɵaŋa, mu tala dologo hu na wiini gamla amai mada ca. 17Dologoi n'amai par midiɗi marɗi ɗa pinzibani gamla paŋ na e ziŋsi war hlai zi peŋ par, na Faraw a sumaŋ ɗa a na fu warɗi. Wala zi ɗûfli a halasi a sumaŋ warɗi dologoi n'amai mada ta ɗa par. 18Yosef a tika seŋ a muɗa: Weseŋku a siŋka maini nɵa: Dologo na hu a mefeŋ hu, 19mefeŋ a hina hu pra, Faraw aga a ɗukla humokku edi, aga a hukuku amai sini luwuŋ, wazagai zi ɗufli aga a halasi a suma neŋku.
20Maini wala ktai ɵa, mefeŋ n'ag'aŋ hu a mefeŋ na wiiɗi fet na wiini wii na wiini pai Faraw, a ziti fet n'amai buriɗi ɗai zi sda paŋ, arbaɗi ɗai paŋ, n'a siŋka edi gara ɗa a abai n'a sini wala zi ci wiini pai gaini abaiɗi ɗai n'e zi peŋ ɗa. 21A waya ɗif n'abai n'a sini wala zi ci war sdani, ni a tika pini aŋ sini wala zi ci wiini pai. 22A haga abaiɗi ɗai n'e zi peŋ ɗa amai sini luwuŋ maini na Yosef a siŋkaŋ edi nɵa. 23Amma ɗif n'abai zi sini wala zi ci wiini pai, a muɗa miɗini Yosef kai, miɗini a wula gaini lai.
Atualmente selecionado:
Pi zi tiki 40: MUSGUM
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964