Ifyakutaŋga 4
4
1Popele apo umuntu uyo waliisiŵile Efa umukasi wakwe; naye aliimitile nekufyala Kaini, nekulaŵila ati: Napoko'muntu uwakuli ŵaYawe. 2Popele liŵili kaafyala Ebeli umukwaŵo. Lomba Ebeli wali mwembesi wambelele, sombi Kaini wali mulimi wamusili.
3Popele, ili syapitile insiku, lomba Kaini waliletele kuli ŵaYawe umulambu wafisepo ifyamwiŵala. 4Kaŵili Ebeli naye waliletele uwapasyakutaŋgo'kufyalwa petaŋga lyakwe newamafuta asiko. Popele ŵaYawe ŵalimusumine Ebeli nemulambu wakwe: sombi taŵasumine Kaini neli mulambu wakwe. 5Popele Kaini walifitilwe ukwakuti, napamenso pakwe napo palialucile. 6Popele apo ŵaYawe ŵalilaŵile kuli Kaini ati: Mbanindo ufitilwe? Mbanindo paalucile napamenso poŵe? 7Kani ulukucite'fiweme, kansi tokasumininwa? Kaŵili kani tolukucite'fiweme, ukuŵifya kulituŵamine kumulyaŋgo; kaŵili ukufwaya kwakuko kukalukuli kuli weŵo, sombi weŵo ewe uŋgakukomeka.
8Popele Kaini walimuŵulile Ebeli umukwaŵo. Popele apo lomba, ili ŵali mumpaŋga, Kaini walimwimine Ebeli umukwaŵo, nekumwipaya. 9Popele apo ŵaYawe ŵalilaŵile kuli Kaini ati: Mbomukwanu Ebeli ali kulipi? Naye ati: Nsiisi-po! Kansi neŵo enekalama uwakulamo'mukwasu? 10Naŵo ŵaYawe ati: Mbawacite'ndo? Isiwi lyamilopa yamukwanu lilukundilila mumusili. 11Popele ŵukumo ulifinjilwe kumusili uwacenama mukupoke'milopa yamukwanu kukuŵoko koŵe! 12Pakulukulimo'musili weŵo, ukufuma kumpindi ino, taukalukukwikatila koti makosa auko; weŵo ukalukuli nimfyusi iyakwendelela pacalo capansi. 13Popele Kaini walilaŵile kuli ŵaYawe ati: Umulandu wanji ukulu, nsiisi ukuupinta. 14Ŵoneni, lelo mwantamfisya pamenso pamusili; kaŵili ŋkalukufiseme kumenso enu; ŋkalukuli ninemfyusi iyakwendelela pacalo capansi; popele lomba aŵantu ŵonse ukambona akanjipaya. 15Popele ŵaYawe ŵalilaŵile kuli ye ati: Koku, pakuti aŵantu ŵonse ukamwipaya Kaini akacitwe'milandu isanu naiŵili. Popele ŵaYawe ŵalimupele Kaini akesiŵilo, eŋgeso'muntu mukumwipaya, pakumusaŋga.
16Popele Kaini alifumine pamenso aŵaYawe, nekulukwikele mucalo caNodo, kumutulesuŵa kuEdeni. 17Popele Kaini alimwisiŵile umukasi wakwe; naye aliimitile, nekufyala Enoci: popele aliiŵeke umusi, nekwilike'sina lyamusi uyo ati niEnoci, koti lisina lyamwana wakwe umwalalume. 18Popele kuli Enoci kwalifyelwe Iladi: naIladi naye walifyele Mekuyaeli: naMekuyaeli naye walifyele Metusaeli: naMetusaeli naye walifyele Lameci.
19Popele Lameci waliupile aŵakasi ŵaŵili: isina lyakwe umbi niAda, nesina lyakwe umbi naye niSila. 20Popele Ada walifyele Yabala: uyo ewisiŵo aŵekala mumasema, aŵali neŋombe. 21Kaŵili isina lyamukwaŵo niYubala: uyo ewisiŵo ŵonse aŵalisya'mesela nemisembe. 22Nakaŵili Sila naye walifyele Tubala-kaini, uwalukufule'fyakupinika fyonse ifyaluŵemba nefyamfitwe: kaŵili iŋkasi yakwe Tubala-kaini niNayama. 23Popele Lameci walilaŵile kuŵakasi ŵakwe ati:
Ada naSila, umfweni isiwi lyanji;
Mweŵakasi ŵakwe Lameci, kutikeni ukulaŵila kwanji:
Pakuti naipayo'muntu pakundasa neŵo,
Naipavo'musaŋkwa pakunsomesya:
24Kani uwakwipaya Kaini akacitwe'milandu isanu naiŵili,
Cine uwakwipaya Lameci akacitwe' milandu amakumi asanu naaŵili naisanu naiŵili.
25Kawili Adama walimwisiŵile liŵili umukasi wakwe; naye alifyele umwana umwalalume, nekumwilike'sina lyakwe ati niSeti: pakuti ŵaLesa ŵanjikalicilo'mwana umbi pamupunda wakwe Ebeli; pakuti Kaini ewamwipeye. 26Nakuli Seti nako kaŵili kwalifyelwe umwana umwalalume; popele alimwilicile isina lyakwe ati niEnosi: elyo ŵaŋgatatika aŵantu ukwite'sina lyaŵaYawe.
Obecnie wybrane:
Ifyakutaŋga 4: AAL59
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Lamba Bible Version © United Bible Societies, 1959.
