Ifyakutaŋga 15
15
1Panuma yafintu ifyo, isiwi lyaŵaYawe lyaliisile kuli Ablama pakuŵoneka ati: Witina Ablama: Neŵo eneŋgawo yoŵe, enekulambulwa koŵe ukukulu makosa. 2Naye Ablama ati: MweŴasikulu Yawe, mbamukampele' ndo, pakuti ndiŵulile umwana, kaŵili uyo ukapyane'nanda yanji niElyesa uwakuDamasiko? 3Kaŵili Ablama ati: Ŵoneni, neŵo tamwampele-po umwana: popele umbi uwafyelwe muŋanda yanji empyani yanji. 4Popele lomba isiwi lyaŵaYawe lyaliisile kuli ye ati: Uyumuntu tesi akalukuli nimpyani yoŵe; sombi uyo ukafuma muluŵunda loŵe wemwine eukalukuli nimpyani yoŵe. 5Popele ŵalimufumisye pesonde, nekulaŵila ati: Pano tontomeka kwi ulu, upende utuwaŋgawaŋga, kani uli nempendelo; naŵo ŵalilaŵile kaŵili kuli ye ati: Fyopele'fyo efikaŵa neŵana ŵoŵe. 6Naye alicetekele muli ŵaYawe, naŵo ŵaYawe ŵalifyeŵele ati kuluŋgama kwakwe.
7Popele ŵalilaŵile kuli ye ati: Neŵo eneŵaYawe aŵakufumisye kuUle uwaŵaKalidaya, mukukupele'calo ici ati ukacipyane. 8Naye ati: MweŴasikulu Yawe, mbakundo nakwisiŵa ati ŋkacipyana? 9Naŵo ŵalilaŵile kuli ye ati: Mbulile-ko impwisi iyalele-po imyaka itatu, nanyina-mbusi uwalele-po imyaka itatu, nembelele iyalalume iyalele-po imyaka itatu, nasikampele, nekana kaŋkulimba. 10Popele aliŵulile fyonse'fyo, nekufipandula pakati, nekufiŵike'fipeswa fyonse ukwesyanya nefiŵyaŵo: sombi ifyuni taapandwile-po. 11Popele ifyuni ifikali fyaliselucile pafitumbi, naye Ablama alifiamine.
12Popele pampindi yakuwa akasuŵa, utulo utulemene twaliponene pali Ablama; popele lomba nekususwa kwamfinsi ikulu kwalimuponene. 13Naŵo ŵaYawe ŵalilaŵile kuli Ablama ati: Wisiŵe icine ati aŵana ŵoŵe ŵakalukuli ŵensu mucalo icitacili caŵo, nekulukuŵapyunjila aŵene; naŵo aŵene ŵacalo ŵakalukuŵakatasya imyaka imyanda ine; 14kaŵili ico-cikoto caŵantu ico ŵakapyunjila ŋkasololola naco: popele pantanjile ŵakafuma-mo nemaŵoni akulu. 15Sombi weŵo ukaya kuli ŵawisinwe neŵutende; ukasikwa lomba wacekwisya bwino ukwakuti. 16Popele pacitentekwa icaŵufine ŵakabwelela kuno; pakuti ukuŵifya kwaŵaAmoli takuŋgakumanisya. 17Popele apo lomba, ili kawile akasuŵa, lomba pafita, kuŵona nikwisiko ililukufutumo'ŵusi nemumosyo ulukwacisya, filukupitila pakati pafipeswe'fyo.
18Ako-kasuŵa ŵaYawe ŵalilayene nakwe Ablama ati: Kuŵana ŵoŵe napele'calo ici, ukufuma kunika yaIjipiti ukufika nakunika ikulu, inika yaYufilate: 19aŵaKeni, neŵaKenesi, neŵaKadimoni, 20neŵaYeti, newaPelisi, neŵaLefa, 21neŵaAmoli, neŵaKanani, neŵaGiligasi, newaJebusi.
Obecnie wybrane:
Ifyakutaŋga 15: AAL59
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Lamba Bible Version © United Bible Societies, 1959.
