Ifyakutaŋga 12
12
1Popele ŵaYawe ŵalilaŵile kuli Ablama ati: Ufume-ko kucalo cakwenu nakuŵakwaŵenu, nakunanda yaŵawiso, uye kucalo ico ici ŋkakulanjisya: 2eli ŋkakwalula cikoto caŵantu icikulu, nekukusyucisya, nekukusya impupo syoŵe; nawe ukaŵa lisyuko: 3popele ŋkawasyucisya aŵo aŵalukukusyucisya weŵo, nakaŵili uyo ukakufiŋga ŋkamufiŋga: nakaŵili muli weŵo emo ikasyucila imikoka yawantu iyamucalo yonse. 4Popele apo Ablama waliile, koti nifyopele'fyo ifi ŵalaŵile ŵaYawe kuli ye; naLoti naye aliile nakwe: lomba umweo wakwe Ablama walikumene imyaka amakumi asanu naaŵili naisanu, ili afumine kuKalani. 5Popele Ablama walipintile Salai, umukasi wakwe, naLoti umwana wamukwaŵo, nemaŵoni aŵo onse ayo ŵaŵuŋgenye, pamo nemitima iyo ŵapokele kuKalani; naŵo ŵalifumine ukulukuya kucalo caKanani; nakucalo caKanani nako kaŵafika.
6Popele Ablama walipitile pacalo nekufika kumupunda wakwe Syekemi, nakumweloni wakwe Mole. Kaŵili aŵaKanani emo ŵali mucalo impindi iyo. 7Popele ŵaYawe ŵalibwenekele kuli Ablama, nekulaŵila ati: Kuŵana ŵoŵe ŋkapele'calo ici! Popele apo waliŵeŵacile ŵaYawe iconto, aŵabwenekele kuli ye.
8Popele ali kucile uko ukuya kulupili kumutulesuŵa kuBeteli, nekukome'sema lyakwe; lomba Beteli ali kumbonsi, naAi naye ali kumutulesuŵa; popele kopele uko aliŵeŵacile ŵaYawe iconto, nekwite'sina lyaŵaYawe. 9Popele apo Ablama aliendele, ili aciya kusaufu.
10Lomba mwali insala mucalo: popele Ablama waliile kwIjipiti mukulukwikele ko pele uko; pakuti insala yalikolele ukwakuti mucalo. 11Popele apo lomba, ili apalamine ukwinjila mucalo caIjipiti, alilaŵile kuli Salai umukasi wakwe ati: Ŵona tanje, ndiisi ati uli mwanakasi uweme uwakutamba; 12popele lomba, ili ŵakakuŵona aŵaIjipiti, ŵakalaŵila ati: Uyu mukasi wakwe! eli ŵakanjipaya, sombi ŵakakupulusya umulaŵi. 13Ndukukukombetela ati ukalaŵile ati: Nineŋkasi yakwe! ati ŋkekale bwino, pakuti pali weŵo, nakaŵili ati umutima wanji ukalukwikele nemweo, pakuti pali weŵo.
14Popele apo lomba, ili ainjile mwIjipiti Ablama, aŵaIjipiti ŵalimubwene umwanakasi uyo ati uweme ukwakuti pamenso. 15Kaŵili nempemba syakwe Falo nasyo syalimubwene, nekumutota kuli Falo: popele umwanakasi walitwitwe kunanda yakwe Falo. 16Popele alimucitile bwino Ablama pakuti pamwanakasi uyo: naye wali nembelele neŋombe nemboŋgolo isyalalume, neŵantu ŵamilimo aŵalalume neŵanakasi, nemboŋgolo isyanakasi neŋgamela. 17Popele ŵaYawe walimukatesye Falo newamuŋanda yakwe nefincinsya ifikulu pakuti pali Salai umukasi wakwe Ablama. 18Popele apo Falo walimwitile Ablama, nekulaŵila ati: Mbafindo ifi mwancitila? 19Mbanindo tamwambulile ati mukasi wenu? Mbanindo mwalaŵilile ati: Niŋkasi yanji? fyopele'fyo nalimupokele ati ekale mukasi wanji; pakuti pali fyefyo lomba ŵoneni umukasi wenu, mupokeni, kamuyeni. 20Popele Falo walifundile aŵantu ati ŵamulame: naŵo ŵalimusindicisye, nemukasi wakwe, nafyo fyonse ifi ali nafyo.
Obecnie wybrane:
Ifyakutaŋga 12: AAL59
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Lamba Bible Version © United Bible Societies, 1959.
