Luˉka‸ li‸ 17

Shu ya‸ kʼai tuˬ te ve awˬ lawn

1Yawˇ ve awˬ la‸ gʼawˇ teˇ hpaˍ hta‸ yawˇ teˇ pawˆ kʼaw‸ kʼoˆ piˇ ve, Shu ya‸ kʼai tuˬ te ve teˇ ceuˬ lehˬ, cawˬ tuˬ yoˬ. Ya‸ hkʼaˇ shu ya‸ kʼai tuˬ te piˇ ve chaw lehˬ gʼa dawˇ haˍ jaˇ tuˬ yoˬ. 2Chaw oˇ ve lehˬ, yaˇ ehˉ chi teˇ hpaˍ awˬ hkʼaw lo teˇ gʼaˇ gʼaˇ hta‸ ya‸ kʼai tuˬ te ve a‸ kehˉ, yawˇ ve kʼawˍ peˍ hta‸ haˉ pui mawˍ hpeh kʼu leh, laˇ tsuhˇ gʼuiˬ awˬ hkʼaw lo ce peu ve kʼo, yawˇ awˬ pon da‸ leuˉ ve yoˬ. 3Nawˬ hui a shu yawˇ awˬ to shaˍ ti‸ te-o.

Nawˬ ve awˬ viˉ awˬ nyi nawˬ hta‸ te ya‸ laˇ ve kʼo, yawˇ hta‸ maˍ piˇ-oˆ. Yawˇ venˇbaˆ hta‸ dawˇ hpfuhˆ ve kʼo, yawˇ ve venˇbaˆ hta‸ hpehˇ piˇ-oˆ. 4Teˇ nyi tiˉ awˬ hkʼaw lo yawˇ nawˬ hta‸ suhˍ pawˆ hkʼa gaˬ te ya‸ laˇ leh, suhˍ pawˆ hkʼa gaˬ nawˬ geh kʼaw‸ laˬ leh, Ngaˬ ve venˇbaˆ hta‸ ngaˬ dawˇ hpfuhˆ ve yoˬ teh‸ kʼoˆ laˇ ve kʼo, yawˇ ve venˇbaˆ hta‸ nawˬ gʼa hpehˇ piˇ ve yoˬ teh‸ kʼoˆ piˇ ve yoˬ.

Yonˍ ve teˇ ceuˬ maˇ la tuˬ lawˬ ve

5Oˇ htaˇ tcuh yaˇ teˇ hpaˍ lehˬ, Ngaˬ hui yonˍ ve teˇ ceuˬ maˇ la tuˬ a ciˉ te laˇ-oˆ teh‸, Jawˇmawˇ Yeˍsuˆ hta‸ lawˬ ve yoˬ.

6Jawˇmawˇ Yeˍsuˆ kʼaw‸ kʼoˆ ve, Nawˬ hui yonˍ ve teˇ ceuˬ gʼawˇ caˉ yawˇ hkʼe hui cawˬ ve kʼo, naˬ hawˉ cehˬ chi hta‸, Nawˬ ve awˬ geu ka‸ teˇ pawˆ tiˉ gʼawˬ tawˆ leh laˇ tsuhˇ gʼuiˬ awˬ hkʼaw lo ca tcuhˉ naw‸ chehˇ-oˆ teh‸ kʼoˆ piˇ ve kʼo, nawˬ hui ve tawˇ hkawˇ hta‸ na yuˬ tuˬ yoˬ.

Awˬ ceˬ teˇ hpaˍ te keunˍ ve kanˉ awˬ lawn

7Nawˬ ve awˬ ceˬ teˇ gʼaˇ ti mi mehˇ kuiˬ lo maˇ kʼoˆ, yawˬ hawˉ kuiˬ lo maˇ kʼoˆ, kʼaw‸ la ve teˇ yanˇ, Haˆ mui leh caˇ la-o teh‸, yawˇ hta‸ kʼoˆ piˇ tuˬ ve, nawˬ hui awˬ hkʼaw lo teˇ gʼaˇ gʼaˇ cawˬ laˇ. 8Ya‸ hkʼaˇ awˬ ceˬ oˇ ve hta‸, Ngaˬ awˬ pon caˇ tuˬ gu loˬ. Ngaˬ caˇ peuˬ htaˇ hkʼa gaˬ nawˬ haˍ pi tsuh‸ taˍ leh, ngaˬ hta‸ te caˍ te taw laˇ-oˆ. Ngaˬ caˇ peuˬ hkʼaw‸ nawˉ nawˬ gʼa caˇ tuˬ yoˬ teh‸ kʼoˆ piˇ tuˬ yoˬ maˇ heˆ laˇ. 9Awˬ ceˬ oˇ ve lehˬ, awˬ shehˍ hpaˇ kʼoˆ ve hkʼe te ve pa taw, awˬ shehˍ hpaˇ yawˇ hta‸ chiˇ mvuh piˇ tuˬ laˇ. 10Oˇ ve hkʼa shuˍ shuˍ nawˬ hui htawˇ, nawˬ hui hta‸ hkʼa kʼoˆ laˇ ve awˬ ceuˬ hkʼa peu-eˬ hta‸ te peuˬ hkʼaw‸ nawˉ chi hkʼe kʼoˆ loˬ. Ngaˬ hui lehˬ maˇ keunˍ ve awˬ ceˬ teˇ hpaˍ hpeh‸ ve yoˬ. Ngaˬ hui gʼa te cawˇ ve kanˉ hta‸ ceh ngaˬ hui te peuˬ ve yoˬ.

Hkiˬ tu‸ paˍ teˇ chi gʼaˇ hta‸ gu na-e piˇ ve

11Yawˇ Yeˍruˆsaˍlehnˍ venˇ lo kʼai chehˇ ve teˇ yanˇ, Saˍmaˍriˆ mvuhˇmiˬ leh Gaˍliˍ lehˇ mvuhˇmiˬ awˬ tcuhˉ kaˍ lo hpanˍ kʼai ve yoˬ. 12Hkʼaˆ teˇ hkʼaˆ awˬ hkʼaw lo yawˇ lo‸-e ve teˇ yanˇ, hkiˬ tu‸ paˍ teˇ chi gʼaˇ vuiˇ kuiˬ lo chehˇ taˍ leh yawˇ hta‸ ha‸ yuˬ ve yoˬ. 13Yawˇ hui bvuhˬ chaweh kuˬ leh, Jawˇmawˇ Yeˍsuˆ-oˬ, ngaˬ hui hta‸ ha kʼaˉ laˇ-oˆ teh‸ kʼoˆ ve yoˬ.

14Yeˍsuˆ yawˇ hui hta‸ mawˬ ve teˇ yanˇ yawˇ kʼoˆ ve, Kʼai leh, paw hkuˇ teˇ hpaˍ hta‸ nawˬ hui ve awˬ to ca maw piˇ-oˆ teh‸ kʼoˆ piˇ ve yoˬ.

Hkʼe te leh, yawˇ hui kʼai chehˇ ve teˇ yanˇ, da‸ la kehˬ la ve yoˬ. 15Yawˇ hui awˬ hkʼaw lo chaw teˇ gʼaˇ lehˬ, yawˇ awˬ to na-e la ve hta‸ gʼa shiˍ ve teˇ yanˇ, yawˇ kʼaw‸ la leh, awˬ hkawˇ bvuhˬ chaweh kuˬ leh Gʼuiˬsha hta‸ chiˇ uiˍ chiˇ mvuh ve yoˬ. 16Yeˍsuˆ ve hkui paˇ lo yawˇ mehˆ hpfuhˇ miˬ chaˇ hkʼoˆ boˆ taˍ leh, yawˇ ve bon hta‸ chiˇ mvuh ve yoˬ. Chaw oˇ ve teˇ gʼaˇ lehˬ Saˍmaˍriˆ chaw hpeh‸ ve yoˬ. 17Oˇ htaˇ Yeˍsuˆ kʼoˆ ve, Na-e la ve chaw lehˬ, teˇ chi gʼaˇ yoˬ maˇ heˆ leh laˇ. Kʼawˇ gʼaˇ hkʼaˬ lo kʼai le. 18Buiˇ shaˆ aˉ naˆ chaw chi teˇ gʼaˇ maˇ heˆ kʼo, Gʼuiˬsha hta‸ chiˇ uiˍ chiˇ mvuh piˇ tuˬ kʼaw‸ la ve chaw teˇ gʼaˇ ka‸ maˇ cawˬ laˇ teh‸, kʼoˆ peuˬ hkʼaw‸ nawˉ yawˇ hta‸ kʼoˆ piˇ ve, 19Tu leh kʼo‸-e loˬ. Nawˬ yonˍ ve teˇ ceuˬ lehˬ, nawˬ hta‸ na-e la piˇ peuˬ teh‸ Yeˍsuˆ kʼoˆ ve yoˬ.

Gʼuiˬsha ve mvuhˇmiˬ gaˬ la ve awˬ lawn

20Gʼuiˬsha ve mvuhˇmiˬ hkʼaˬ htaˆ gaˬ la tuˬ ve awˬ lawn Hpaˍriˍsehˇ teˇ hpaˍ na nyi ve teˇ yanˇ, Yeˍsuˆ kʼaw‸ kʼoˆ ve, Gʼuiˬsha ve mvuhˇmiˬ gaˬ la ve lehˬ, mehˆ shiˍ nyi leh mawˬ ve teˇ ceuˬ maˇ heˆ. 21Nyi loˬ, choˬ kaˬ cawˬ ve yoˬ, oˇ kaˬ cawˬ ve yoˬ teh‸ shu kʼoˆ tuˬ maˇ heˆ. Awˬ lawn kʼo, Gʼuiˬsha ve mvuhˇmiˬ lehˬ, nawˬ hui awˬ hkʼaw lo cawˬ taˍve yoˬ teh‸, yawˇ hui hta‸ kʼoˆ piˇ ve yoˬ.

22Awˬ la‸ gʼawˇ teˇ hpaˍ hta‸ yawˇ kʼaw‸ kʼoˆ piˇ ve, Chaw yaˇ ve Yaˇ hpu ve awˬ nyi hta‸ nawˬ hui mawˬ gaˇ ve awˬ yanˇ gaˬ la tuˬ yoˬ. Ya‸ hkʼaˇ, nawˬ hui gʼa mawˬ tuˬ maˇ heˆ. 23Choˬ kaˬ nyi-o, oˇ kaˬ nyi-o teh‸ shu nawˬ hui hta‸ kʼoˆ laˇ tuˬ yoˬ. Ya‸ hkʼaˇ taˇ kʼai, yawˇ hui awˬ hkʼaˇ suh taˇ gʼa‸. 24Awˬ lawn kʼo, mvuhˇ tiˉ po-e‸ lehˬ, mvuhˇ naw ma teˇ ceˍ lo ba la leh teˇ ceˍ lo ba gaˬ ve hkʼe, chaw yaˇ ve Yaˇ hpu lehˬ, yawˇ ya‸ la ve awˬ nyi awˬ hkʼaw lo oˇ hkʼe hpeh‸ tuˬ yoˬ. 25Ya‸ hkʼaˇ, oˇ hkʼe maˇ hpeh‸ la sheˍ htaˇ yawˇ lehˬ, tu‸ ve hkanˍ ve laiˉ ceuˬ hta‸ ka‸, chaw chi teˇ co chiˇ baˬ ve hta‸ ka‸ gʼa hkanˍ tuˬ yoˬ. 26Noˉa‸ ve awˬ co-e htaˇ hpeh‸ la ve hkʼa shuˍ shuˍ, chaw yaˇ ve Yaˇ hpu ve awˬ co-e awˬ hkʼaw lo htawˇ hpeh‸ la tuˬ yoˬ. 27Noˉa‸ haw lo‸ kʼoˍ hkʼaw lo‸-e ve teˇ nyi hkʼa gaˬ, yawˇ hui caˇ chehˇ dawˬ chehˇ leh, awˬ hpawˇ awˬ miˇ heuˆ da‸ leh ka piˇ chehˇ ve yoˬ. Oˇ ve hkʼaw‸ nawˉ iˉ kaˆ htonˍ la leh, chaw hkʼa peu-eˬ luˬ kʼai sheˆ kʼai ve yoˬ. 28Lawˇtaˍ ve awˬ co-e htaˇ htawˇ oˇ ve hkʼa shuˍ shuˍ hpeh‸ ve yoˬ. Yawˇ hui caˇ chehˇ dawˬ chehˇ ve, mawˇ vuiˬ mawˇ hawˇ chehˇ ve, mawˇ ti chehˇ leh, yehˬ te chehˇ ve yoˬ. 29Ya‸ hkʼaˇ, Lawˇtaˍ lehˬ Sawˉdonˍ venˇ hkʼaw tawˆ kʼai ve teˇ nyi htaˇ, mvuhˇ naw ma lo aˬ miˍ leh ma‸ shiˉ mvuhˇ yeˬ hkʼa shuˍ ce la leh, yawˇ hui hkʼa peu-eˬ hta‸ te luˬ ve yoˬ. 30Chaw yaˇ ve Yaˇ hpu tawˆ la ve teˇ nyi htaˇ, oˇ ve hkʼa shuˍ shuˍ hpeh‸ la tuˬ yoˬ.

31Oˇ ve teˇ nyi awˬ hkʼaw lo, yehˬ awˬ hkʼoˆ lo chehˇ ve chaw a shu yawˇ ve yehˬ awˬ hkʼaw lo ve mawˇ cawˬ ve kʼo, mawˇ oˇ ve hta‸ ca yuˬ tuˬ taˇ kʼaw‸ ya‸-e. Oˇ ve hkʼa shuˍ shuˍ heh hkʼaw chehˇ ve chaw htawˇ, taˇ kʼo‸-e. 32Lawˇtaˍ ve awˬ miˇ ma hta‸ dawˇ nawˇ loˬ. 33A shu yawˇ ve a sha‸ ponˬ tuˬ ca ve chaw hkʼaˬ ve teˇ gʼaˇ maˇ kʼoˆ, yawˇ a sha‸ shonˇ tuˬ yoˬ. A sha‸ shonˇ ve chaw hkʼaˬ ve teˇ gʼaˇ maˇ kʼoˆ, yawˇ ve a sha‸ gʼa ponˬ tuˬ yoˬ. 34Ngaˬ nawˬ hui hta‸ kʼoˆ laˇ ve, oˇ ve teˇ haˉ awˬ hkʼaw lo hawˉ hkʼaˆ nyiˇ gʼaˇ lehˬ, zuh‸ hpui teˇ maˬ tiˉ awˬ hkʼaw lo zuh‸ chehˇ ve teˇ yanˇ, teˇ gʼaˇ hta‸ shiˍ veu leh, teˇ gʼaˇ hta‸ teh taˉ tuˬ yoˬ. 35Yaˇ miˇ nyiˇ gʼaˇ teˇ geh haˉ pui maw geuˆ chehˇ ve teˇ yanˇ, teˇ gʼaˇ hta‸ shiˍ veu leh, teˇ gʼaˇ hta‸ teh taˉ tuˬ yoˬ teh‸ kʼoˆ ve yoˬ.#17:35 Li‸ hpu teˇ hpaˍ hpaˍ awˬ hkʼaw lo ka nanˉ ehˉ chi teˇ maˬ cawˬ ve yoˬ. -36 Chaw nyiˇ g’aˇ heh hk’aw lo teˇ geh chehˇ taˍ ve teˇ yanˇ, teˇ g’aˇ hta‸ shiˍ veu leh, teˇ g’aˇ hta‸ teh taˉ tuˬ yoˬ.

37Oˇ htaˇ, awˬ la‸ gʼawˇ teˇ hpaˍ lehˬ, Jawˇ mawˇ-oˬ, hkʼaˬ lo hpeh‸ la tuˬ le teh‸ yawˇ hta‸ na nyi ve teˇ yanˇ,

Suh ve awˬ to cawˬ kuiˬ lo naˬ beuˬ ngaˆ teˇ hpaˍ hpawnˬ chehˇ tuˬ yoˬ teh‸, yawˇ yawˇ hui hta‸ kʼaw‸ kʼoˆ piˇ ve yoˬ.

Obecnie wybrane:

Luˉka‸ li‸ 17: LHBE

Podkreślenie

Udostępnij

Kopiuj