Yoˇhanˬ li‸ 7
7
Yeˍsuˆ ve awˬ nyi paˍ teˇ hpaˍ yawˇ hta‸ maˇ yonˍ
1Oˇ ve awˬ hkʼaw‸ nawˉ Yeˍsuˆ lehˬ, Gaˍliˍlehˇ mvuhˇmiˬ awˬ hkʼaw lo teˇ kaˬ peuˬ teˇ kaˬ kʼai ve yoˬ. Yuˇda‸ chaw teˇ hpaˍ yawˇ hta‸ tiˇ pehˍ tuˬ ca chehˇ ve pa taw, Yuˇda‸ mvuhˇmiˬ awˬ hkʼaw lo yawˇ maˇ kʼai. 2Oˇ htaˇ, Yuˇda‸ chaw hui Aˉ po kʼo pawehˇ te ve awˬ yanˇ gaˬ la paˇ neˇ ve yoˬ. 3Yawˇ ve awˬ nyi paˍ teˇ hpaˍ kʼoˆ ve, Nawˬ te ve kanˉ teˇ hpaˍ hta‸ nawˬ ve awˬ la‸ gʼawˇ hui gʼa mawˬ tuˬ, choˬ kaˬ lo tawˆ kʼai leh Yuˇda‸ mvuhˇ miˬ lo kʼai-o. 4Awˬ lawn kʼo, a shu yawˇ ve awˬ meh bvuhˬ kʼai tuˬ heuˆ gaˇ ve chaw teˇ gʼaˇ lehˬ, baˬ kuiˬ lo yawˇ te‸ chiˉ maˇ te. Kanˉ chi teˇ hpaˍ hta‸ nawˬ te ve kʼo, miˬguiˬ yaˇ hui hta‸ nawˬ awˬ to hkʼa tawˍ lehˆ maˍ piˇ-oˆ teh‸, yawˇ hta‸ kʼoˆ piˇ ve yoˬ. 5Awˬ lawn kʼo, yawˇ ve awˬ nyi paˍ teˇ hpaˍ ka‸ yawˇ hta‸ maˇ yonˍ.
6Hkʼe te leh Yeˍsuˆ kʼoˆ ve, Ngaˬ ve awˬ yanˇ maˇ gaˬ sheˍ. Ya‸ hkʼaˇ, nawˬ hui awˬ pon hkʼaˬ htaˆ ka‸ awˬ yanˇ cawˇ ve yoˬ. 7Miˬguiˬ yaˇ nawˬ hui hta‸ canˇ maˇ hpeh‸. Ya‸ hkʼaˇ ngaˬ hta‸ canˇ ve yoˬ. Awˬ lawn kʼo, yawˇ hui te ve kanˉ lehˬ haiˬ ve yoˬ teh‸ ngaˬ shaˉ hkiˆ hkanˍ ve pa taw yoˬ. 8Pawehˇ oˇ ve awˬ hkʼaw lo nawˬ hui kʼai-o. Ngaˬ ve awˬ yanˇ hkʼa deh‸ maˇ gaˬ sheˍ ve pa taw, pawehˇ oˇ ve awˬ hkʼaw lo ngaˬ maˇ kʼai sheˍ teh‸, yawˇ hui hta‸ kʼoˆ piˇ ve yoˬ. 9Yawˇ oˇ hkʼe kʼoˆ piˇ peuˬ leh, Gaˍliˍlehˇ mvuhˇmiˬ awˬ hkʼaw lo chehˇ taˉ ve yoˬ.
Yeˍsuˆ Aˉ po kʼo pawehˇ lo taˆ-e ve
10Yawˇ ve awˬ nyi paˍ teˇ hpaˍ pawehˇ oˇ ve awˬ hkʼaw lo kʼai peuˬ hkʼaw‸ nawˉ, yawˇ htawˇ shu hta‸ maˇ mawˬ tcuh leh ta‸ iˉ gawˬ lehˍ kʼai ve yoˬ. 11Pawehˇ oˇ ve awˬ hkʼaw lo Yuˇda‸ chaw teˇ hpaˍ yawˇ hta‸ ca leh, Yawˇ hkʼaˬ lo chehˇ le teh‸ na nyi da‸ ve yoˬ.
12Chaw awˬ moˍ lonˉ awˬ hkʼaw lo yawˇ awˬ lawn tawˇ gʼawˬ da‸ chehˇ ve yoˬ. Teˇ hpaˍ hpaˍ lehˬ, Yawˇ chaw da‸ hpeh‸ ve yoˬ teh‸ kʼoˆ ve yoˬ. Teˇ hpaˍ hpaˍ lehˬ, Yawˇ chaw da‸ hpeh‸ ve maˇ heˆ. Chaw chi ma ve hta‸ ya‸ kʼaw sheh ya‸ chehˇ ve chaw hpeh‸ ve yoˬ teh‸ kʼoˆ ve yoˬ. 13Ya‸ hkʼaˇ, Yuˇda‸ chaw hui hta‸ kawˆ ve pa taw, chaw teˇ gʼaˇ ka‸ yawˇ awˬ lawn hkʼa tawˍ lehˆ kʼoˆ maˇ haˆ.
14Pawehˇ oˇ ve te leh awˬ kʼaw ji hkʼeun la ve teˇ yanˇ, Yeˍsuˆ bon yehˬ lonˉ awˬ hkʼaw lo taˆ-e leh maˍ piˇ ve yoˬ. 15Hkʼe te leh Yuˇda‸ chaw teˇ hpaˍ anˇ leh, Chaw chi lehˬ li‸ maˇ henˇ jaw ve ka‸, hkʼaˬ hkʼe te chi taw taw shiˍ ve le teh‸ kʼoˆ da‸ ve yoˬ.
16Yeˍsuˆ kʼaw‸ kʼoˆ ve, Ngaˬ maˍ piˇ ve tawˇ hkawˇ lehˬ, ngaˬ ve tawˇ hkawˇ maˇ heˆ. Ngaˬ hta‸ peu laˇ shehˍ hpaˇ ve tawˇ hkawˇ hpeh‸ ve yoˬ. 17Gʼuiˬsha ve a loˍ hta‸ te gaˇ ve chaw lehˬ, ngaˬ maˍ piˇ ve tawˇ hkawˇ chi, Gʼuiˬsha lo laˬ ve tawˇ hkawˇ hpeh‸ ve leh naˍ, maˇ heˆ kʼo, ngaˬ hkʼaˇ ngaˬ kʼoˆ ve tawˇ hkawˇ hpeh‸ ve leh naˍ, yawˇ shiˍ tuˬ yoˬ. 18A shu yawˇ hkʼaˇ yawˇ kʼoˆ ve chaw lehˬ, a shu yawˇ awˬ pon awˬ me‸ awˇ hponˇ ca ve yoˬ. Ya‸ hkʼaˇ, yawˇ hta‸ peu laˇ shehˍ hpaˇ awˬ pon awˬ me‸ awˬ hponˇ ca ve chaw lehˬ, hteˇ ve cawˇ ve chaw hpeh‸ leh, yawˇ awˬ hkʼaw lo heˍ ve awˬ ceuˬ maˇ cawˬ. 19Moˉseˍ lehˬ, nawˬ hui hta‸ awˬliˇtawˇhkawˇ pe‸ laˇ taˍ ve maˇ heˆ laˇ. Ya‸ hkʼaˇ, awˬliˇtawˇhkawˇ oˇ ve hta‸ nawˬ hui teˇ gʼaˇ ka‸ maˇ na yuˬ. Aˬ hto‸ ma pa taw nawˬ hui ngaˬ hta‸ tiˇ pehˍ tuˬ ca ve le teh‸ yawˇ hui hta‸ kʼoˆ piˇ ve yoˬ.
20Chaw awˬ moˍ lonˉ kʼaw‸ kʼoˆ ve, Nawˬ lehˬ neˇ geh ve chaw hpeh‸ ve yoˬ. Nawˬ hta‸ tiˇ pehˍ tuˬ a shu ca ve le teh‸ kʼoˆ ve yoˬ.
21Yeˍsuˆ kʼaw‸ kʼoˇ ve, Ngaˬ kanˉ teˇ maˬ te leh, nawˬ hui hkʼa peu-eˬ anˇ ve yoˬ. 22Moˉseˍ lehˬ, awˬ guiˬ meuˇ shoˍ ve awˬ liˇ nawˬ hui hta‸ pe‸ laˇ taˍ ve yoˬ. (Awˬ tehˬ kʼoˆ kʼo, Moˉseˍ geh awˉ lawˉ laˬ ve maˇ heˆ. Awˬ puˍ awˬ pi teˇ hpaˍ geh awˉ lawˉ laˬ ve yoˬ.) Shinˉ nyi htaˇ ka‸ nawˬ hui chaw hta‸ awˬ guiˬ meuˇ shoˍ piˇ ve yoˬ. 23Moˉseˍ ve awˬliˇtawˇhkawˇ hta‸ maˇ gʼa te luˬ tuˬ, shinˉ nyi teˇ nyi awˬ hkʼaw lo ka‸ chaw yaˇ hta‸ nawˬ hui awˬ guiˬ meuˇ shoˍ piˇ ve law kʼo, ngaˬ lehˬ shinˉ nyi teˇ nyi awˬ hkʼaw lo chaw teˇ gʼaˇ ve awˬ to hkʼa peu-eˬ hta‸ gu na-e piˇ ve pa taw, nawˬ hui ngaˬ hta‸ nyi ma zuhˆ ve laˇ. 24Nawˬ hui gʼa mawˬ ve awˬ ceuˬ hta‸ ceh nyi leh suhˉ jehˬ ve taˇ te. Hteˇ ve cawˇ ve awˬ hkʼaw lo ceh tiˉ suhˉ jehˬ-o‸ teh‸, yawˇ hui hta‸ kʼoˆ piˇ ve yoˬ.
Chi lehˬ Hkri‸ yoˬ laˇ
25Hkʼe te leh, Yeˍruˆsaˍlehnˍ venˇ yaˇ teˇ hpaˍ hpaˍ kʼoˆ ve, Yawˇ hui tiˇ pehˍ tuˬ ca chehˇ ve lehˬ, chaw chi hpaˇ maˇ heˆ laˇ. 26Nyi sheˍ. Yawˇ hkʼa tawˍ lehˆ maˍ piˇ chehˇ ve ka‸, shu yawˇ hta‸ te‸ chiˉ maˇ kʼoˆ. Chaw chi hpaˇ lehˬ, Hkri‸ hpeh‸ ve hta‸ jawˇmawˇ teˇ hpaˍ awˬ tehˬ awˬ na shiˍ ve leh naˍ. 27Ya‸ hkʼaˇ, chaw chi hpaˇ hkʼaˬ lo tawˆ la ve hta‸ ngaˬ hui shiˍ ve yoˬ. Hkri‸ laˬ ve teˇ yanˇ, yawˇ hkʼaˬ lo tawˆ la tuˬ ve hta‸ chaw teˇ gʼaˇ ka‸ shiˍ tuˬ maˇ heˆ teh‸ yawˇ hui kʼoˆ da‸ ve yoˬ.
28Hkʼe te leh, Yeˍsuˆ bon yehˬ lonˉ awˬ hkʼaw lo maˍ piˇ chehˇ htaˇ yawˇ kuˬ leh kʼoˆ ve, Nawˬ hui ngaˬ hta‸ shiˍ ve yoˬ. Ngaˬ hkʼaˬ lo tawˆ la ve hta‸ ka‸ nawˬ hui shiˍ ve yoˬ. Ya‸ hkʼaˇ, ngaˬ hkʼaˇ ngaˬ laˬ gaˇ leh laˬ ve maˇ heˆ. Ngaˬ hta‸ peu laˇ shehˍ hpaˇ lehˬ, hteˇ ve cawˇ ve yoˬ. Nawˬ hui yawˇ hta‸ maˇ shiˍ. 29Ngaˬ lehˬ yawˇ hta‸ shiˍ ve yoˬ. Awˬ lawn kʼo, ngaˬ yawˇ geh lo laˬ leh, yawˇ ngaˬ hta‸ peu laˇ ve yoˬ teh‸ kʼoˆ ve yoˬ.
30Hkʼe te leh, yawˇ hui yawˇ hta‸ hpeh yuˬ tuˬ te ve yoˬ. Ya‸ hkʼaˇ, yawˇ ve awˬ yanˇ maˇ gaˬ sheˍ ve pa taw, chaw teˇ gʼaˇ ka‸ yawˇ hta‸ maˇ ca hpeh yuˬ. 31Chaw awˬ moˍ lonˉ awˬ hkʼaw lo chaw laiˉ gʼaˇ yawˇ hta‸ yonˍ ve yoˬ. Yawˇ hui kʼoˆ ve, Hkri‸ laˬ ve teˇ yanˇ, chaw chi teˇ gʼaˇ te ve awˬ heˆ teˇ hpaˍ a‸ kehˉ yawˇ te tuˬ laˇ teh‸ kʼoˆ da‸ ve yoˬ.
Yeˍsuˆ hta‸ hpeh yuˬ tuˬ bon yehˬ lonˉ ve ma‸ yaˇ teˇ hpaˍ kʼai ve
32Chaw awˬ moˍ lonˉ lehˬ, yawˇ ve awˬ lawn kʼoˆ da‸ gʼawˬ da‸ chehˇ ve hta‸ Hpaˍriˍsehˇ hui gʼa kaˇ htaˇ, paw hkuˇ lonˉ teˇ hpaˍ leh Hpaˍriˍsehˇ teˇ hpaˍ lehˬ, yawˇ hta‸ hpeh yuˬ tuˬ bon yehˬ lonˉ ve ma‸ yaˇ teˇ hpaˍ hta‸ kʼai tcuh ve yoˬ. 33Hkʼe te leh Yeˍsuˆ kʼoˆ ve, Ngaˬ nawˬ hui geh teˇ hkui teˇ yanˇ chehˇ peuˬ hkʼaw‸ nawˉ, ngaˬ hta‸ peu laˇ shehˍ hpaˇ geh lo kʼaw‸ kʼo‸-e tuˬ yoˬ. 34Nawˬ hui ngaˬ hta‸ ca tuˬ yoˬ. Ca ve htawˇ mawˬ tuˬ maˇ heˆ. Ngaˬ ve chehˇ kuiˬ lo nawˬ hui laˬ maˇ hpeh‸ teh‸ yawˇ hui hta‸ kʼoˆ piˇ ve yoˬ.
35Hkʼe te leh Yuˇda‸ chaw teˇ hpaˍ kʼoˆ da‸ ve, Ngaˬ hui yawˇ hta‸ maˇ gʼa mawˬ tuˬ yawˇ hkʼaˬ lo kʼai tuˬ ve le. Hpaˆ da‸ leh Heˍlaˍsaˆ chaw hui geh ca chehˇ kʼai peuˬ ve chaw hui ve chehˇ kuiˬ lo kʼai leh, Heˍlaˍsaˆ chaw hui hta‸ yawˇ ca maˍ piˇ tuˬ ve laˇ. 36Nawˬ hui ngaˬ hta‸ ca tuˬ yoˬ. Ca ve htawˇ mawˬ tuˬ maˇ heˆ. Ngaˬ ve chehˇ kuiˬ lo nawˬ hui laˬ maˇ hpeh‸ teh‸ yawˇ kʼoˆ ve tawˇ lehˬ, hkʼaˬ hkʼe kʼoˆ gaˇ ve leh naˍ teh‸, yawˇ hui teˇ gʼaˇ leh teˇ gʼaˇ kʼoˆ da‸ ve yoˬ.
Co ha te‸ piˇ lawˬ ve iˉ kaˆ lawˬ teˇ hpaˍ
37Pawehˇ te ve awˬ leh meuˇ teˇ nyi, awˬ nyi uiˍ ve teˇ nyi awˬ hkʼaw lo, Yeˍsuˆ huˉ taˍ leh kuˬ ve, Iˉ kaˆ shiˉ ve chaw cawˬ kʼo, ngaˬ geh ca dawˬ la-o. 38Ngaˬ hta‸ yonˍ ve chaw lehˬ, Li‸ hpu awˬ hkʼaw lo bvuh‸ taˍ ve hkʼe, Yawˇ ve nyi ma awˬ hkʼaw lo co ha te‸ piˇ lawˬ ve iˉ kaˆ lawˬ teˇ hpaˍ tawˆ la leh yoˬ ya‸-e tuˬ yoˬ teh‸ kʼoˆ ve yoˬ. 39Yawˇ chi hkʼe kʼoˆ ve lehˬ, yawˇ hta‸ yonˍ ve chaw hui gʼa tuˬ ve Awˬ ha hpu awˬ lawn hta‸ kʼoˆ ve yoˬ. Awˬ lawn kʼo, Yeˍsuˆ lehˬ awˬ me‸ awˬ hponˇ hta‸ maˇ gʼa sheˍ ve pa taw, Gʼuiˬsha lehˬ Awˬ ha hpu maˇ pe‸ laˇ sheˍ.
Chaw chi ma ve nyi ma maˇ hawˍ da‸
40Chi hkʼe kʼoˆ ve hta‸ gʼa kaˇ ve teˇ yanˇ, chaw teˇ hpaˍ hpaˍ lehˬ, Chi teˇ gʼaˇ awˬ tehˬ awˬ na Gʼuiˬsha ve tcuhˍ kaˍ paˍ oˇ ve teˇ gʼaˇ hpeh‸ ve yoˬ teh‸ kʼoˆ ve yoˬ.
41Teˇ hpaˍ hpaˍ kʼoˆ ve, Chi teˇ gʼaˇ lehˬ, Hkri‸ hpeh‸ ve yoˬ. Ya‸ hkʼaˇ teˇ hpaˍ hpaˍ kʼoˆ ve, Hkri‸ lehˬ Gaˍliˍlehˇ mvuhˇmiˬ awˬ hkʼaw lo tawˆ la tuˬ laˇ. 42Hkri‸ lehˬ Daˍviˆ ve awˬ ceuˬ awˬ hkʼaˇ hpeh‸ leh Daˍviˆ ve chehˇ kuiˬ Behˍlehˍhehnˍ hkʼaˆ lo tawˆ la tuˬ yoˬ teh‸, Li‸ hpu awˬ hkʼaw lo bvuh‸ taˍ ve maˇ heˆ laˇ teh‸ kʼoˆ da‸ ve yoˬ. #Mlk 5:2 43Hkʼe te leh, yawˇ ve awˬ lawn hta‸ pa taw chaw chi ma ve nyi ma maˇ hawˍ da‸. 44Yawˇ hui teˇ hpaˍ hpaˍ yawˇ hta‸ hpeh yuˬ gaˇ ve yoˬ. Ya‸ hkʼaˇ, chaw teˇ gʼaˇ ka‸ yawˇ hta‸ maˇ ca hpeh yuˬ.
Yawˇ maˍ piˇ ve hkʼa shuˍ shuˍ chaw teˇ gʼaˇ ka‸ maˇ maˍ piˇ jaw
45Oˇ htaˇ, bon yehˬ lonˉ ve ma‸ yaˇ teˇ hpaˍ lehˬ, paw hkuˇ lonˉ hui leh Hpaˍriˍsehˇ hui geh kʼaw‸ la ve yoˬ. Paw hkuˇ lonˉ hui leh Hpaˍriˍsehˇ hui kʼoˆ ve, Aˬ hto‸ ma te nawˬ hui yawˇ hta‸ maˇ yuˬ laˬ ve le teh‸ na nyi ve teˇ yanˇ,
46bon yehˬ lonˉ ve ma‸ yaˇ teˇ hpaˍ kʼaw‸ kʼoˆ ve, Chaw oˇ ve teˇ gʼaˇ maˍ piˇ ve hkʼa shuˍ shuˍ chaw teˇ gʼaˇ ka‸ maˇ maˍ piˇ jaw teh‸ kʼoˇ ve yoˬ.
47Hpaˍriˍsehˇ hui kʼaw‸ kʼoˆ ve, Nawˬ hui hta‸ htawˇ yawˇ heˍ gʼa peuˬ laˇ. 48Jawˇmawˇ teˇ hpaˍ awˬ hkʼaw lo maˇ kʼoˆ, Hpaˍriˍsehˇ teˇ hpaˍ awˬ hkʼaw lo maˇ kʼoˆ, yawˇ hta‸ yonˍ ve chaw teˇ gʼaˇ gʼaˇ cawˬ laˇ. 49Awˬliˇtawˇhkawˇ hta‸ maˇ shiˍ ve chaw chi teˇ hpaˍ lehˬ, hkeu ve hta‸ gʼa hkanˍ ve chaw hpeh‸ ve yoˬ teh‸ yawˇ hui hta‸ kʼoˆ piˇ ve yoˬ.
50Yawˇ hui awˬ hkʼaw lo chehˇ ve, awˉ lawˉ htaˇ Yeˍsuˆ geh laˬ jaw ve Niˆkawˇdeˍ teˇ gʼaˇ kʼoˆ ve, 51Ngaˬ hui ve awˬliˇtawˇhkawˇ lehˬ, chaw teˇ gʼaˇ yawˇ kʼoˆ ve tawˇ hkawˇ hta‸ maˇ gʼa kaˇ leh yawˇ te ve hta‸ maˇ gʼa shiˍ ve ceh ceh, yawˇ hta‸ suhˉ taˆ ve awˬ liˇ cawˬ laˇ teh‸, yawˇ hui hta‸ kʼoˆ piˇ ve yoˬ.
52Yawˇ hui kʼaw‸ kʼoˆ ve, Nawˬ htawˇ Gaˍliˍlehˇ chaw hpeh‸ ve laˇ. Nawˬ hkʼa deh‸ chaˬ nyi sheˍ. Gaˍliˍlehˇ mvuhˇmiˬ awˬ hkʼaw lo Gʼuiˬsha ve tcuh kaˍ paˍ teˇ gʼaˇ ka‸ maˇ tawˆ la ve hta‸ nawˬ gʼa mawˬ tuˬ yoˬ teh‸ kʼoˆ ve yoˬ.
Haˉ chawˇ te chehˇ ve yaˇ miˇ teˇ gʼaˇ hta‸ shu yuˬ veu laˇ ve
53Oˇ htaˇ yawˇ hui lehˬ, a shu yawˇ ve aˉ hkʼaw lo kʼo‸-e ve yoˬ.
Obecnie wybrane:
Yoˇhanˬ li‸ 7: LHBE
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Lahu Bible Edited © Thailand Bible Society and Bible Society of Myanmar, 2010, 2020.
