Awˬ hkuiˉ puiˍ ve li‸ 9
9
Gʼuiˬsha Noˉa‸ hta‸ ka ti‸ te ve
1Gʼuiˬsha lehˬ, Noˉa‸ leh yawˇ ve awˬ yaˇ teˇ hpaˍ hta‸ awˬ bon na‸ piˇ leh kʼoˆ ve, Uiˍ la maˇ la leh miˬguiˬ chi ve hta‸ biˇ la piˇ-oˆ. 2To nuˇ to shaˆ hkʼa peu-eˬ, ngaˆ hkʼa peu-eˬ leh ngaˇ hkʼa peu-eˬ, nawˬ hui hta‸ gʼa kawˆ jehˇ chehˇ tuˬ yoˬ. Awˬ ceuˬ oˇ ve hkʼa peu-eˬ, nawˬ hui ve la‸ sheh hkʼaw ngaˬ chiˇ a‸ laˇ ve yoˬ. 3Awˬ ceuˬ oˇ ve hkʼa peu-eˬ leh suhˆ hpa‸ hawˆ hpa‸ teˇ hpaˍ hta‸ nawˬ hui caˇ hpeh‸ ve yoˬ. Oˇ ve hkʼa peu-eˬ ngaˬ nawˬ hui hta‸ piˇ laˇ ve yoˬ. 4Ya‸ hkʼaˇ, a sha‸ te‸ ve awˬ ceuˬ hpeh‸ ve awˬ suhˍ teˇ ceuˬ hta‸ awˬ shaˍ geh teˇ geh nawˬ hui maˇ gʼa hkaw‸ caˇ. 5Chaw teˇ gʼaˇ gʼaˇ shu hta‸ tiˇ pehˍ ve kʼo, yawˇ lehˬ ciˍ yanˍ ve hta‸ gʼa hkanˍ tuˬ yoˬ. Chaw yaˇ hta‸ tiˇ pehˍ ve to nuˇ to shaˆ hta‸ htawˇ, ngaˬ ciˍ yanˍ piˇ tuˬ yoˬ. 6Chaw yaˇ hta‸ Gʼuiˬsha ve awˬ ho‸ awˬ han hkʼa shuˍ te hpanˍ taˍ ve pa taw, chaw yaˇ hta‸ tiˇ pehˍ ve chaw hta‸ gʼa kʼaw‸ tiˇ pehˍ piˇ tuˬ yoˬ.
7Ya‸ hkʼaˇ, nawˬ hui lehˬ gʼa maˇ la piˇ leh, miˬguiˬ chi hta‸ gʼa uˉ peunˍ ve yoˬ, teh‸ kʼoˆ piˇ ve yoˬ.
8Gʼuiˬsha lehˬ, Noˉa‸ leh yawˇ ve awˬ yaˇ teˇ hpaˍ hta‸ chi hkʼe kʼaw‸ kʼoˆ piˇ ve yoˬ. 9Ngaˬ lehˬ, nawˬ hui leh nawˬ hui ve awˬ ceuˬ awˬ hkʼaˇ teˇ hpaˍ hta‸ maˇ kʼoˆ, 10nawˬ hui geh teˇ geh haw lo‸ kʼoˍ hkʼaw tawˆ la taˍ ve a sha‸ te‸ chehˇ ve to nuˇ to shaˆ leh ngaˆ teˇ hpaˍ hta‸ maˇ kʼoˆ, ka ti‸ chi hkʼe te laˇ ve yoˬ. 11Awˬ hkʼaw‸ nawˉ teˇ pawˆ ka‸ miˬguiˬ chi ve awˬ hkʼoˆ lo iˉ kaˆ uiˍ taˆ la leh, a sha‸ te‸ chehˇ ve awˬ ceuˬ hkʼa peu-eˬ hta‸ kʼaw‸ te luˬ piˇ tuˬ ve maˇ heˆ. 12Ngaˬ nawˬ hui hta‸ te piˇ taˍ ve ka ti‸ lehˬ, awˬ heˆ chi hkʼe cawˬ ve yoˬ. 13Ngaˬ lehˬ, miˬguiˬ chi awˬ kaˍ lo ka ti‸ te taˍ ve hta‸ shaˉ hkiˆ hpeh‸ tuˬ, moˬ awˬ hkʼaw lo aˉlaˇmiˬshiˉjaw tawˆ la piˇ taˍ ve yoˬ. 14Mvuhˇ naw ma hkʼoˆ lo moˬ hta‸ ngaˬ cawˬ la piˇ ve teˇ yanˇ, oˇ kaˬ lo aˉlaˇmiˬshiˉjaw hta‸ tawˆ la piˇ tuˬ yoˬ. 15Oˇ htaˇ, ngaˬ lehˬ nawˬ hui leh to nuˇ to shaˆ teˇ hpaˍ hta‸ ka ti‸ te taˍ ve hta‸ ngaˬ dawˇ nawˇ chehˇ tuˬ yoˬ. Awˬ hkʼaw‸ nawˉ teˇ pawˆ ka‸ iˉ kaˆ uiˍ taˆ la leh, a sha‸ te‸ chehˇ ve awˬ ceuˬ hkʼa peu-eˬ hta‸ te luˬ te sheˆ piˇ tuˬ ve maˇ heˆ. 16Aˉlaˇmiˬshiˉjaw hta‸ ngaˬ gʼa mawˬ ve teˇ yanˇ, miˬguiˬ hkʼoˆ lo a sha‸ hkʼa te‸ ve awˬ ceuˬ hkʼa peu-eˬ ve hta‸ ngaˬ te piˇ taˍ ve ka ti‸ hta‸ ngaˬ dawˇ nawˇ chehˇ tuˬ yoˬ. 17Chi ve lehˬ, a sha‸ te‸ chehˇ ve awˬ ceuˬ hkʼa peu-eˬ hta‸ ngaˬ te piˇ taˍ ve ka ti‸ shaˉ caˆ awˬ heˆ hpeh‸ ve yoˬ, teh‸ Noˉa‸ hta‸ kʼoˆ piˇ ve yoˬ.
Noˉa‸ leh yawˇ ve yaˇ teˇ hpaˍ
18Haw lo‸ kʼoˍ hkʼaw lo tawˆ la taˍ ve Noˉa‸ ve yaˇ paˍ teˇ hpaˍ lehˬ, Sheˍmaˆ, Haˍmaˆ leh Yaˍhpehˆ hui hpeh‸ ve yoˬ. (Haˍmaˆ lehˬ, Hkaˍnanˍ ve awˬ pa hpeh‸ ve yoˬ.) 19Chaw chi ve shehˆ gʼaˇ lehˬ, Noˉa‸ ve awˬ yaˇ teˇ hpaˍ hpeh‸ leh, yawˇ hui ve awˬ ceuˬ awˬ hkʼaˇ teˇ hpaˍ miˬguiˬ chi hkʼoˆ lo biˇ la ve yoˬ.
20Noˉa‸ lehˬ muiˬ caˇ shehˍ hpaˇ hpeh‸ leh a pehˉ meuˇ hko awˉ lawˉ tanˬ te shehˍ hpaˇ hpeh‸ ve yoˬ. 21Yawˇ lehˬ a pehˉ meuˇ gʼuiˬ dawˬ bvuhˆ ve pa taw, yawˇ ve aˉ po kʼo hkʼaw awˬ kʼu nyi te zuh‸ taˍ ve yoˬ. 22Yawˇ oˇ hkʼe hpeh‸ chehˇ ve hta‸ yawˇ ve yaˇ paˍ, Hkaˍnanˍ awˬ pa Haˍmaˆ gʼa mawˬ leh, Sheˍmaˆ leh Yaˍhpehˆ hta‸ ca hto piˇ ve yoˬ. 23Sheˍmaˆ leh Yaˍhpehˆ yawˇ huiˉ maˬ leh, yawˇ hui ve awˬ pa awˬ kʼu nyi hpeh‸ chehˇ ve hta‸ maˇ mawˬ gaˇ ve pa taw, aˉ po‸ lonˉ teˇ hkʼoˆ yuˬ leh awˬ hkʼaw‸ nawˉ hpawˇ lo te juˇ kʼo‸-e leh awˬ pa hta‸ ca beh piˇ ve yoˬ. 24Noˉa‸ nawˇ la leh, yawˇ ve yaˇ paˍ Yaˍhpehˆ yawˇ hta‸ hkʼaˬ hkʼe te laˇ taˍ ve hta‸ gʼa shiˍ ve teˇ yanˇ, 25yawˇ kʼoˆ ve,
Hkeu ve teˇ ceuˬ Hkaˍnanˍ awˬ hkʼoˆ gaˬ la piˇ-oˆ.
Yawˇ lehˬ, yawˇ ve awˬ viˉ awˬ nyi ve awˬ ceˬ hpeh‸ la tuˬ yoˬ.
26Sheˍmaˆ ve Gʼuiˬsha hta‸ chiˇ uiˍ chiˇ mvuh piˇ-oˆ.
Hkaˍnanˍ lehˬ, Sheˍmaˆ ve awˬ ceˬ gʼa te tuˬ yoˬ.
27Gʼuiˬsha lehˬ, Yaˍhpehˆ hta‸uiˍ la maˇ la piˇ leh,
yawˇ ve awˬ ceuˬ awˬ hkʼaˇ teˇ hpaˍ, Sheˍmaˆ ve chaw hui geh gʼa chehˇ piˇ-oˆ.
Hkaˍnanˍ lehˬ, Yaˍhpehˆ ve awˬ ceˬ hpeh‸ la tuˬ yoˬ, teh‸ kʼoˆ ve yoˬ.
28Miˬguiˬ hta‸ iˉ kaˆ htonˍ peuˬ hkʼaw‸ nawˉ, Noˉa‸ lehˬ 350 hkʼaw‸ a sha‸ gʼa te‸ chehˇ sheˬ ve yoˬ. 29Yawˇ a sha‸ 950 hkʼaw‸ gaˬ htaˇ suh-e ve yoˬ.
Obecnie wybrane:
Awˬ hkuiˉ puiˍ ve li‸ 9: LHBE
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Lahu Bible Edited © Thailand Bible Society and Bible Society of Myanmar, 2010, 2020.
