Awˬ hkuiˉ puiˍ ve li‸ 14
14
Aˍbranˍ Lawˇtaˍ hta‸ htaiˍ hkʼaw‸ piˇ ve
1Awˬ yanˇ oˇ ve awˬ hkʼaw lo, Baˍbuˍlonˍ jawˇmawˇ Aˍraˆhpeˍlaˆ, Eˇlaˍsaˍ jawˇmawˇ Aˍroˆ, Eˇlanˍ jawˇmawˇ Keˍdawˇraˆlawˇmaˍ, Gawˇyinˍ jawˇmawˇ Tiˉdaˍlaˆ hui lehˬ, 2Sawˉdonˍ jawˇmawˇ Beˍraˆ, Gawˇmawˇraˆ jawˇmawˇ Biˆraˍshaˆ, Aˍdaˍmaˍ jawˇmawˇ Shiˆnaˆ, Zeˍbonˍ jawˇmawˇ Sheˍmaˍbaˍ, Zawˇraˆ teh‸ kʼoˆ ve jawˇmawˇ Beˍlaˍ hui hta‸ ma‸ bawˆ da‸ chehˇ taˍ ve yoˬ. 3Jawˇmawˇ chi ve ngaˇ gʼaˇ lehˬ, chi beu‸ Suh ve laˇtsuhˇ gʼuiˬ teh‸ kʼoˆ ve Siˆdinˍ miˬ tawˬ kuiˬ lo ma‸ moˍ shawˍ chehˇ taˍ ve yoˬ. 4Yawˇ hui lehˬ, teˇ chi nyiˇ hkʼaw‸ hkʼa biˇ jawˇmawˇ Keˍdawˇraˆlawˇmaˍ ve awˬ ceˬ gʼa te chehˇ taˍ ve yoˬ. Ya‸ hkʼaˇ, teˇ chi shehˆ hkʼaw‸ teˇ hkʼaw‸ gaˬ ve teˇ yanˇ, yawˇ hui yawˇ hta‸ kʼaw‸ hpfuhˆ ve yoˬ. 5Teˇ chi awˇ hkʼaw‸ teˇ hkʼaw‸ gaˬ ve teˇ yanˇ, Keˍdawˇraˆlawˇmaˍ lehˬ yawˇ hta‸ nyi ma kʼaw ve chaw hui hta‸ shiˍ veu laˇ leh, Aˍshaˆtaˍroˆkaˍneˍ venˇ hkʼaw chehˇ ve Yeˍhpanˍ chaw, Haˍmaˆ venˇ hkʼaw chehˇ ve Zuˍzenˍ chaw, Kiˇriˇyaˆtenˍ miˬ tawˬ kuiˬ lo chehˇ ve Eˍmonˍ chaw, 6Eˇdonˍ hkʼaw hkʼoˆ lo chehˇ ve Hawˇriˆ chaw, hteunˍ lonˉ awˬ paˇ lo cawˬ ve Eˇlaˆpaˍranˍ venˇ lo hkʼa gaˬ, yawˇ hui laˬ leh te luˬ te sheˆ piˇ ve yoˬ. 7Yawˇ hui teˇ pawˆ kʼaw‸ hpfuhˆ kʼaw‸ la leh, chi beu‸ Kaˍdehˆ teh‸ kʼoˆ ve Eˍmiˆsaˍpaˆ venˇ lo gaˬ la ve yoˬ. Oˇ kaˬ lo yawˇ hui Aˍmaˍlehˆ chaw hui ve mvuhˇmiˬ teˇ hpaˍ leh, Haˍsaˍ sonˍtaˍmaˆ venˇ hkʼaw chehˇ ve Aˍmawˇriˆ chaw hui hta‸ htawˇ te luˬ te sheˆ piˇ ve yoˬ.
8Oˇ htaˇ, Sawˉdonˍ jawˇmawˇ, Gawˇmawˇra‸ jawˇmawˇ, Aˍdaˍmaˍ jawˇmawˇ, Zeˍboˍyinˍ jawˇmawˇ leh Beˍlaˆ jawˇmawˇ chi teˇ hpaˍ lehˬ Siˆdinˍ miˬ tawˬ kuiˬ lo hpoˆ chehˇ taˍ leh ma‸ moˍ shawˍ chehˇ ve yoˬ. 9Yawˇ hui lehˬ, Eˇlaˍ jawˇmawˇ, Gawˇyinˍ jawˇmawˇ, Baˍbuˍlonˍ jawˇmawˇ, Eˇlaˍsaˍ jawˇmawˇ hui hta‸ bawˆ da‸ tuˬ gu chehˇ taˍ ve yoˬ. Teˇ hpawˇ lo jawˇmawˇ awˇ gʼaˇ leh, teˇ hpawˇ lo jawˇmawˇ ngaˇ gʼaˇ chehˇ taˍ ve yoˬ. 10Miˬ tawˬ kuiˬ chi ve hkʼaw, haˉ tcuhˇ tawˆ ve miˬ kʼoˍ hkʼa biˇ cawˬ ve yoˬ. Sawˉdonˍ jawˇmawˇ leh Gawˇmawˇra‸ jawˇmawˇ gʼuiˇ hpaw-e leh miˬ kʼoˍ chi teˇ hpaˍ hkʼaw ce lo‸-e ve yoˬ. Awˬ nu ve jawˇmawˇ shehˆ gʼaˇ lehˬ hkʼaw hkʼoˆ lo hpaw taˆ-e ve yoˬ. 11Jawˇmawˇ oˇ ve awˇ gʼaˇ lehˬ, Sawˉdonˍ leh Gawˇmawˇra‸ venˇ hkʼaw cawˬ ve mawˇ hkʼa peu-eˬ leh caˇ tuˬ dawˬ tuˬ hta‸ yuˬ leh tawˆ kʼai ve yoˬ. 12Sawˉdonˍ venˇ hkʼaw chehˇ taˍ ve Aˍbranˍ ve awˬ shaˍ paˍ Lawˇtaˍ leh yawˇ ve ceˇ hkʼa peu-eˬ hta‸ htawˇ yawˇ hui yuˬ kʼai ve yoˬ.
13Oˇ htaˇ, bawˆ da‸ kuiˬ lo hpaw tawˆ la ve chaw teˇ gʼaˇ, Aˍmawˇriˆ chaw Maˍreˍ ve maˉ kuˇ cehˬ lonˉ cawˬ kuiˬ lo chehˇ taˍ ve Heˍbrehˇ chaw Aˍbranˍ hta‸ awˬ lawn chi ca hto piˇ la ve yoˬ. Maˍreˍ leh yawˇ ve awˬ nyi paˍ Eˇshaˍkawˆlaˆ leh Aˍneˍraˆ hui lehˬ, Aˍbranˍ hpawˇ chehˇ ve yoˬ. 14Aˍbranˍ lehˬ, yawˇ ve awˬ shaˍ paˍ hta‸ shu hpeh kʼai ve awˬ hkawˇ gʼa kaˇ htaˇ, yawˇ ve chaw 318 gʼaˇ hta‸ shiˍ veu leh, Danˍ venˇ lo hkʼa gaˬ jawˇmawˇ oˇ ve awˇ gʼaˇ hkʼaˇ suh gʼa‸ yuˬ kʼai ve yoˬ. 15Aˍbranˍ leh yawˇ ve chaw teˇ hpaˍ, canˇ paˍ teˇ hpaˍ hta‸ mvuhˇ hpeu‸ htaˇ hoˆ taˍ leh lo‸ bawˆ piˇ ve yoˬ. Daˍmaˍsehˆ venˇ awˬ na hpawˇ Hawˇbaˆ venˇ lo hkʼa gaˬ gʼa‸ yuˬ kʼoˬ piˇ ve yoˬ. 16Oˇ hkʼe te peuˬ hkʼaw‸ nawˉ, Lawˇtaˍ leh yawˇ ve ceˇ hkʼa peu-eˬ, shu hpeh kʼai taˍ ve chaw leh yawˇ hui ve ceˇ hkʼa peu-eˬ hta‸ kʼaw‸ gʼa‸ hkʼaw‸ veu laˇ ve yoˬ.
Maˍlaˍhkiˆsaˍdehˆ Aˍbranˍ hta‸ bon na‸ piˇ ve
17Aˍbranˍ lehˬ, Keˍdawˇraˆlawˇmaˍ leh yawˇ ve awˬ chawˇ teˇ hpaˍ hta‸ bawˆ gʼaˇ taˉ leh kʼaw‸ la chehˇ ve hta‸ Sawˉdonˍ jawˇmawˇ lehˬ, (chi beu‸ jawˇmawˇ ve miˬ tawˬ kuiˬ teh‸ kʼoˆ ve) Shaˍveˍ miˬ tawˬ kuiˬ lo ca ha‸ yuˬ la ve yoˬ. 18Oˇ htaˇ, Saˍlehnˍ ve Jawˇmawˇ Maˍlaˍhkiˆsaˍdehˆ lehˬ, caˇ tuˬ leh a pehˉ meuˇ gʼuiˬ yuˬ laˬ ve yoˬ. Yawˇ lehˬ, uiˍ jaˇ mvuh jaˇ ve Gʼuiˬsha ve paw hkuˇ hpeh‸ ve yoˬ. 19Yawˇ Aˍbranˍ hta‸ bon na‸ piˇ leh kʼoˆ ve, Miˬguiˬ mvuhˇ naw ma hta‸ te hpanˍ shehˍ hpaˇ uiˍ jaˇ mvuh jaˇ ve Gʼuiˬsha nawˬ hta‸ awˬ bon na‸ laˇ piˇ-oˆ. 20Nawˬ ve canˇ paˍ hta‸ nawˬ ve la‸ sheh hkʼaw lo chiˇ a‸ laˇ shehˍ hpaˇ uiˍ jaˇ mvuh jaˇ ve Gʼuiˬsha hta‸ chiˇ mvuh piˇ-oˆ, teh‸ kʼoˆ ve yoˬ. Aˍbranˍ htawˇ yawˇ hkʼa gʼa taˍ ve teˇ hpaˍ awˬ hkʼaw lo, yawˇ hta‸ teˇ chi pun teˇ pun kʼaw‸ tanˇ piˇ ve yoˬ.
21Oˇ htaˇ, Sawˉdonˍ jawˇmawˇ Aˍbranˍ hta‸ kʼoˆ piˇ ve, Chaw yaˇ teˇ hpaˍ ngaˬ hta‸ hkʼaw‸ pe‸ laˇ-oˆ. Mawˇ jeˬ teˇ hpaˍ lehˬ nawˬ yuˬ kʼai-o, teh‸ kʼoˆ piˇ ve yoˬ.
22Ya‸ hkʼaˇ, Aˍbranˍ kʼaw‸ yaw hkʼaw‸ leh kʼoˆ ve, Miˬguiˬ leh mvuhˇ naw ma hta‸ te hpanˍ shehˍ hpaˇ uiˍ jaˇ mvuh jaˇ ve Gʼuiˬsha mehˆ gʼuˇ suhˍ ngaˬ hkanˍ ve yoˬ. 23Nawˬ ve mawˇ jeˬ teˇ ceuˬ hta‸ ka‸ ngaˬ maˇ yuˬ. Gʼo‸ hkeh teˇ caˆ ehˉ hta‸ ka‸ ngaˬ maˇ yuˬ. Ngaˬ hta‸ pa taw, Aˍbranˍ paw sha la ve yoˬ, teh‸ nawˬ teˇ pawˆ ka‸ taˇ kʼoˆ. 24Ya‸ hkʼaˇ, ngaˬ geh teˇ geh kʼai taˍ ve Eˇshaˍkawˇlaˆ, Aˍneˍraˆ leh Maˍreˍ hui lehˬ, yawˇ hui gʼa keunˍ ve hkʼe yuˬ piˇ lawˬ-o‸, teh‸ kʼoˆ piˇ ve yoˬ.
Obecnie wybrane:
Awˬ hkuiˉ puiˍ ve li‸ 14: LHBE
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Lahu Bible Edited © Thailand Bible Society and Bible Society of Myanmar, 2010, 2020.
