KU̧U̧NAŊMƆ 4
4
Kain in Abɛl
1Wíì duka in kóò kɔ‘i Ɛvɛ, a̧ baa zaŋ ɓɛɛ a̧ ko Kain, ɓɛɛ a̧ tɔ̧: «Mi kpaa bíí nɛ GASA WAN ha̧a̧ ha̧‘m.» 2A̧ koo mbe-a; nɛ́ Abɛl nya Kain. Abɛl duka só kɔ‘i nɛ́ wi-dai-mɔ, ɓɛɛ Kain nɛ́ wi-wa-fɔ. 3Sɛn tɛ ŋma ŋgimbi Kain kaia o waya-te tɛnɛ wen ŋmara zu-a ha̧ GASA WAN. 4Abɛl kaia kɔ‘i nɛ o kuti be-sami, ɓɛɛ kai o de mur-aa ha̧ nɛ zu mɔ-dai kɔ‘i; hegɔ GASA WAN kpɛka Abɛl in ha̧a̧mɔ kɔ̧-a̧ mbɛt.#Heb 11.4 5GASA WAN kpɛk Kain in ha̧a̧mɔ kɔ̧-a̧ na. Kain kpaa ɗaŋsee nyɛmna, ɓɛɛ a̧ zum zu-a. 6GASA WAN tɔ̧ɔ̧ ha̧ Kain: «Wen ge sá mɛ kpa ɗaŋsee zum nɛ zu-mɛ ge? 7Kà mɛ de so mɔ nɛ yuwar-a, mɛ tɛ̀ɛ́ ba zu-mɛ nɛ ŋgɔn. Kà mɛ de mɔ nɛ yuwar-a na, ɗaŋmɔ tɛ ba fara nú tua kɔ-mɛ mɛ́ kpa ŋgai zu mɛ, ɓɛɛ kɔ-mɛ, mɛ̀ kpá ŋgai zu a̧.»
8Kain tɔ̧ɔ̧ ha̧ nya-wi Abɛl: «Ɛ̀ɛ̀ nɛ́ kpɛɛfɔ.» Hee mɔ'ɔ nɛ wa a̧a̧ kpɛɛfɔ ga, Kain tika zu nya-wi Abɛl, ɓɛɛ gbɛ a̧.#Mt 23.35; Lk 11.51; 1 Jn 3.12
9GASA WAN aka Kain: «Nya-mɛ a̧a̧ dee?» A̧ kifa nú: «Mi iŋ na. Mi nɛ́ wi-pɛm nya'm nde?»
10GASA WAN aka a̧ woyo: «Mɛ dee hee ge? Mi zia tiger tɔk-tɛ nya-mɛ nɛ hiɗi mɔ nɛ mbɔɗɔnu pii sɛn tɛ‘m!#Heb 12.24 11Kinii, fom baa mɛ sɛn zu nù nɛ nɔɔ tɔk-tɛ nya-mɛ nɛ mɛ gbaia a nù nɛ er-mɛ. 12Mɛ́ tɛ́ wa fɔ, ɓɛɛ a̧ beka dɛm mɔ siti ha̧ mɛ nɛ dɔka-a ɓɔna. Mɛ́ tɛ́ duk nɛ́ wi-yar-war, yambala-bíí sɛn zaŋnu.»
13Kain tɔ̧ɔ̧ ha̧ GASA WAN: «Bɔnɛ kɔ‘m gana zu'm. 14K’ɛ̀nɛ̀ ndak am sɔsɔɔ sɛn zaŋnu’ɛ, ɛ́nɛ́ beka iŋ oi-am ɓɔna; mi tɛ́ yar yambali nɛ zaŋnu nɛnɛ, ɓɛɛ kóó o nde nɛ tɛ́ kpa'm, tɛ́ gbɛ‘m.»
15GASA WAN tɔ̧ɔ̧ ha̧ a̧: «Kà ŋma bíí gbɛ Kain, kifa-er a̧a̧ sɛnɛ war mɔɔrɔ-ɗoŋ-yiitoo.» Ɓɛɛ GASA WAN e mɔɔ-sedaako tɛ Kain, wen ká o nde nɛ tɛ kpa a̧ tɛɛ gbɛ a̧. 16Kain nɛ́ɛ̀ ɔ nyɛi̧ nɛ GASA WAN, ɓɛɛ a̧ yak si sɛn nù Nod, nɛ war daŋa-wese ha̧ Edɛn.
O bezaŋ Kain
17Kain duka in kóò kɔ‘i, ɓɛɛ kóò ba zaŋ ko nɛ Enɔk. Kain dee ye, ɓɛɛ a̧ a nin ye'i nɛ nin bem kɔ̧-a̧ Enɔk. 18Nɛ́ mɔ'ɔ nɛ Enɔk kòó Irad, ɓɛɛ Irad ko Mehiyaɛl. Mehiyaɛl kòó Metusaɛl, ɓɛɛ Metusaɛl ko Lamɛk. 19Lamɛk baa kóò yiitoo, nin nana-gun-aa nɛ́ Ada, nin zɔŋa-a nɛ́ Sila. 20Ada kòó Yabal, ɓɛɛ Yabal duka nɛ́ zɔmdáa ko wi ɔ kɔ̧ tua-laa in nɛ̀ dai nɛ́ o mɔ-dai. 21Nin nya-a̧ nɛ́ Yubal, ɓɛɛ Yubal duka nɛ́ zɔmdáa ko o wi-mbɛr-kunde in o wi-dɔm-fol. 22Ɓɛɛ Sila ko kɔ‘i nɛ́ Tubal-Kain nɛ̀ duka nɛ́ zɔmdáa ko o wi-dui-dɔra. Boko-nya Tubal-Kain duka nɛ́ Naama.
23Lamɛk tɔ̧ɔ̧ ha̧ o kóò kɔ̧-a̧:
«Ada in Sila, ɛ̀nɛ̀ zíí wen n'am tɛ́ tɔ̧‘i!
O okoo ko Lamɛk, ɛ̀nɛ̀ zíí wen kɔ‘m!
Mi gbɛɛ ŋma bíí wen n'aa ee da̧i̧ tɛ‘m;
mi gbɛɛ nɛ́ be-ŋgaiwi wen n'aa gusa'm.
24Kifa-er a̧a̧ sɛnɛ war mɔɔrɔ-ɗoŋ-yiitoo wen zu Kain,
ɓɛɛ kɔ‘m Lamɛk,
nɛ́ war ɓu-mɔɔrɔ-ɗoŋ-yiitoo-zua-mɔɔrɔ-ɗoŋ-yiitoo.»#Mt 18.22
Sɛt in Enɔs
25Adam duka in kóò kɔ‘i woyo, ɓɛɛ a̧ ko nɛ̀ be-wiwii nɛ wa saa nin-a'e Sɛt, wen kóò tɔ̧a̧: «Sɔ̧ kɔ̧ɔ̧ ɗɔɔ ha̧a̧ mbe bezaŋ ha̧‘m oi Abɛl, wen Kain gbɛɛ so a̧.» 26Sɛt kòó ŋma be-wiwii woyo, ɓɛɛ a̧ a nin-a'e Enɔs; nɛ́ tɛ ŋgimbi'i a̧ wa ku̧u̧ nɛ naŋ gasa nin GASA WAN.
Obecnie wybrane:
KU̧U̧NAŊMƆ 4: GB11
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.