Oosana 16
16
Qakaarafa narí amaaku Isamaeerana faqa ufa qu ufafa.
1Abarammana anaaqa Sarai nammarifa mifa qaafa anaasee marinau, sia faiqi maqanau. Mina ainainira maanaaqa Isipa maqannaa maanaaqa marinau. Mina auqu Qakaara nammarifa marinau. 2Sarai nammarifa nári oosana maraseenoo Abarammana qimaminoo qinau, anee iria, Anutufa sia faiqi qini qiminoo. Minara maa qini ainainira maanaaqa mara sainanoo mifa ani faqa finoo aqbee faiqi maqa sainaqa qinee qeeqara maraanaura. Miqi qufanoo Abarammafa eedoo qimaseenoo maranau. 3Abarammafa qisaukuqara taikasee aukuana Kannaana maqa maaqai marufanoo Sarai nammarifa narí ainainira maanaaqa Qakaara nammarina Abarammana aminau.
4Abarammafa Qakaara nammarina faqa aana fufanoo faiqi maranau. Qakaara nammarifa amuaquqaika mafufanoo nasuridanoo narí aqoonnana Sarai nammarina ramoo ramaa ira ufa qimamaqanau. 5Miqufanoo Sarai nammarifa Abarammana qimaminoo qinau. Ani oosanasaa Qakaara nammarifa qini fidiaqaamma qimaqaidanoo. Qinee qeeqa kai mina ani amisaafananoo amuaquqaika mafinoo qini uridaaqa raidanoo. Karaambaiqa fannoo kai anindiri ufa rainaannoo. Anee fee, qinee fee andeeqee fee.
6Abarammafa kafaa narí qimaminoo qinau. Doo amana ani ainainira maanaaqa ani ameemaanai maridanoo. Naqaamma amaqararee fee qimasee iridanee, doo miqia. Sarai nammarifa Akaara nammarina maqee maqee oofana qaidanoo ari aqimarunara quqasee sandanau.
7Qakaara nammarifa amaaqa firaree qimasee Suraa maqa maaqaki fimaru aatata sandee fifiiufanoo aadana maqa maaqa qambaanai nammari kaqikaafa ururee maruqoo Karaambaiqa angiroo fannoo Qakaara nammarina paqurimmasee qimaminoo qinau. 8Qakaara nammari, Sarai nammarina ainainira maanaaqa, anee yaindari fee anidanee maaqooqari yai fee fidanee. Miqi qufanoo Qakaara nammarifa qinau, qeeqa rakisirana Sarai nammarina aaqu rufiee sandaidaqa.
9Angiroo fannoo minara iriseenoo maaqi qimasee qimaminau, doo findi finana aneenna rakisira anaasee marinnai kafaa anirandee oonureenana mina ainainira manaaqaikia. 10Angiroo fannoo kafaa qimaminoo qinau. Qinee moomoo asumu ani amianaqa sia amana asaana rifaranoo.
11Maqee ani aranandaki faiqi rinoo anee akoonaiqi maqeennaranoo anee mina auqu Isamaeera nee qia.
Karaambaiqa fannoo anee aupuraranakiqari mina aaramasee faaqa ruannana irinara minara mi faiqina auqu Isamaeera nee qia.
12Mi faiqifa kaasau fainiara foora mariannoo.
Mifa aiqamausa namuqaakamma nimaqainaqa misa faqa narí namuqaakamma amaqeefaranoo.
Mifa narí ainaina rakeemasee aaduma mariannoo.
13Qakaara nammarifa narí kai qimirinoo qinau. Qinee kuqaa fee Anutuna qafamasee fee sia kuqirai kaqi maridee qimannimianauree. Miqi qimasee mina qimamu karaambaiqanara niqafee mari Anutu fee qinau. 14Miqooqari misa mi nammari dikaandana auqu reeqa kaqi marira Anutufa qini qiqafai nammari dikaanda fee qiqau. Mi nammari dikaandafa Kadeesa maqusa dinni Beereeda maqusa dinni qambaana marinau.
15Qakaara nammarifa kafaa anirandee oonureenoo faiqi maqasoofanoo Abarammafa mina auqu Isamaeera nee qinau. 16Mi aukuanna Abarammafa 86 aukuana faqaafa marufanoo mina faiqi kambiqanau.
Obecnie wybrane:
Oosana 16: bjr
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2017 Wycliffe Bible Translators, Inc. All rights reserved.
